A e gi prisiri fu preiki makandra na ini wan grupu
1 Di Yesus seni den 70 disipel fu go preiki, dan a leri den san den ben musu taki, a prati den na ini pikin grupu fu tu sma, èn a sori den pe den ben musu wroko. Disi ben gi den prisiri (Luk. 10:1-17). Na so a de tu na ini a ten disi. A seti fu preiki makandra na ini wan grupu e yepi fu sreka, fu orga, èn fu gi a pipel fu Gado deki-ati fu du a preikiwroko.
2 Owruman e teki fesi: Owruman abi wan prenspari frantwortu fu yepi ala sma fu teki prati na a preikiwroko doronomo. A dienstopziener e teki fesi fu seti sani so taki preikiwroko kan du mindriwiki. Ibri bukustudie opziener abi a frantwortu fu orga a wroko gi a grupu fu en, spesrutu tapu satra nanga sonde. Tapu den dei te a heri gemeente e kon makandra fu go du preikiwroko, soleki baka a Waktitoren-studie, dan ibri bukustudie opziener musu seti sani gi a grupu fu en.
3 „Na wan fasi di fiti èn leki fa sani seti”: A sma di kisi a wroko fu hori a preikiwroko konmakandra musu bigin biten èn a no musu hori en moro langa leki 10 noso 15 miniti. Wan bun sani di a kan du fosi a begi, na fu seti a grupu èn fu taki pe den musu wroko (boiti te a bukustudie opziener sa du disi, soleki fa wi ben taki kaba). Disi sa meki taki den preikiman no abi fu tan wakti na a presi pe den musu wroko, bika disi kan meki taki sma e kisi wan takru denki fu a preikiwroko di wi e du. A de soleki fa Paulus ben gi a deki-ati: „Meki ala sani pasa na wan fasi di fiti èn leki fa sani seti” (1 Kor. 14:40). Fu meki ala sani waka bun, dan ala sma di e go na a preikiwroko konmakandra musu kon biten, den musu de klariklari fu wroko makandra nanga a sma di e teki fesi, èn te a konmakandra kaba, dan den musu go wantewante na a presi pe den o wroko.
4 Wi e kon makandra na ini wánfasi: A seti fu preiki makandra na ini wan grupu na wan tumusi moi okasi gi wi fu kon leri sabi trawan na ini a gemeente. Aladi a no de wan fowtu sani fu meki mofo fu wroko nanga wan sma, toku wi kan kisi wini tu te wi e go na den preikiwroko konmakandra sondro taki wi meki mofo na fesi. Kande wi sa wroko nanga sma di wi no sabi so bun, èn na so wan fasi wi kan sori lobi gi trawan tu.—2 Kor. 6:11-13.
5 A preiki di wi e preiki makandra na ini wan grupu e gi wi deki-ati èn a e tyari wi kon na wán leki „sma di e wroko nanga makandra ini a waarheid” (3 Yoh. 8). Meki wi teki prati fayafaya na ini a wroko disi!