„Dini Yehovah nanga prisiri”
1. San kan gi dinari fu Yehovah bigi prisiri?
1 „Abi prisiri na ini Masra ala ten,” na apostel Paulus ben skrifi. „Ete wan leisi mi sa taki: Abi prisiri!” (Fil. 4:4) A grani di wi abi fu prati a bun nyunsu èn fu yepi sma di de leki skapu tron anbegiman fu Yehovah, e gi wi bigi prisiri (Luk. 10:17; Tori. 15:3; 1 Tes. 2:19). Ma fa a de efu son tron wi no abi prisiri ini a preikiwroko fu wi? San wi kan du?
2. Fa wi kan kisi moro prisiri te wi e hori na prakseri suma gi wi a komando fu preiki?
2 Wan wroko di Gado gi wi: Memre taki a komando di wi kisi fu preiki, komoto fu Yehovah. Iya, a de wan trutru grani fu „wroko makandra nanga Gado” te wi e meki a Kownukondre boskopu bekènti èn te wi e meki disipel! (1 Kor. 3:9) Krestes Yesus de nanga wi na ini a wroko disi di noiti sa du baka (Mat. 28:18-20). Den engel sosrefi e wroko makandra nanga wi èn den de fayafaya na ini a kotiwroko na yeye fasi di e feni presi na ini a ten disi (Tori. 8:26; Openb. 14:6). Bijbel, makandra nanga den sani di a pipel fu Gado e ondrofeni sosrefi, na trutru buweisi taki Gado e horibaka gi a wroko disi. Fu dati ede, te wi e preiki, dan wi e du dati „leki Gado ben seni wi, ondro na ai fu Gado, leki kompe fu Krestes” (2 Kor. 2:17). Disi na trutru wan sani fu prisiri!
3. O prenspari begi de fu man tan abi prisiri ini a preikiwroko fu wi?
3 Begi de prenspari efu wi wani tan abi prisiri ini a diniwroko fu Gado (Gal. 5:22). Fu di wi man du a wroko fu Gado soso nanga a krakti fu en, meki wi musu tan aksi en fu gi wi en yeye, bika a e gi dati bogobogo na den wan di aksi en dati (Luk. 11:13; 2 Kor. 4:1, 7; Ef. 6:18-20). Te wi e taki na ini begi fu a diniwroko fu wi, dan dati sa yepi wi fu tan si a wroko disi na wan yoisti fasi, awansi wi e miti sma di no wani arki a boskopu. Na so wan fasi wi sa man tan preiki nanga prisiri èn sondro frede.—Tori. 4:29-31; 5:40-42; 13:50-52.
4. Te wi e sreka wisrefi bun, dan fa dati kan yepi wi fu abi moro prisiri ini a preikiwroko? San na wan tu fasi fa wi kan sreka wisrefi bun?
4 Sreka yusrefi bun: Wan sani di wi kan du fu abi moro prisiri te wi e teki prati na a diniwroko, na fu sreka wisrefi bun (1 Petr. 3:15). A no abi fu teki langa fu du disi. Wan tu miniti nomo de fanowdu fu luku den rai baka di ben gi fu sori wi fa wi kan pristeri den nyun tijdschrift, noso tra publikâsi di wi wani gi wan sma. Yu kan luku a Redeneren-buku noso wan tu owru Wi Kownukondre diniwroko, fu feni rai di e sori fa yu kan bigin wan takimakandra. Son Kownukondre preikiman e feni en wan yepi fu skrifi syatu na tapu wan pisi papira fa den ben o pristeri wan sani. Wanwan leisi den e fringi ai luku san skrifi na tapu a papira fu memre baka san den o taki. Disi e yepi den fu no senwe moro èn a e gi den deki-ati fu preiki sondro fu frede.
5. Efu wi abi prisiri, dan sortu winimarki a abi gi wi èn gi tra sma?
5 Wi sa kisi furu winimarki te wi de nanga prisiri. Te wi e prisiri, dan disi e hari sma fu arki a boskopu fu wi. Te wi e prisiri dan dati e gi wi krakti fu horidoro (Neh. 8:10; Hebr. 12:2). San de moro prenspari, na taki te wi e du wi diniwroko nanga prisiri, dan disi e gi Yehovah glori. Fu dati ede, meki wi „dini Yehovah nanga prisiri”.—Ps. 100:2.