Suku den wan di warti
1 A de wan tyalensi gi wi fu fiti den rai di Yesus gi wi fu du a preikiwroko. A ben taki: „Na ini sortu foto noso na sortu dorpu unu e go, suku suma de drape di warti en” (Mat. 10:11). Fa wi kan suku den sma disi na wan moro bun fasi, aladi sma ini a ten disi no e tan na oso so furu moro?
2 Ondrosuku a kontren fu yu: Na a fosi presi, yu musu ondrosuku a kontren fu yu. Na sortu ten yu denki taki sma de na oso? Pe yu kan miti den deiten? Wan spesrutu dei noso ten na ini a wiki de te den sa poti moro prakseri? Te yu e fiti a diniwroko fu yu na den gwenti fu den, nanga a situwâsi fu den sma di e libi na ini a kontren fu yu, dan dati kan meki yu abi moro bun bakapisi.—1 Kor. 9:23, 26.
3 Furu preikiman ben abi bun bakapisi di den wroko mofoneti. Son ososma no e broko den ede so furu èn den e firi moro bun fu arki na a ten dati. A kan abi bun bakapisi te wi e gi kotoigi nanga yepi fu telefon te a weer takru na alenten (efu wi abi primisi fu du dati). Tra okasi fa wi kan doro sma nanga a bun nyunsu, na fu wroko na bisnispresi èn fu gi kotoigi na presi pe furu sma e go.
4 Na ini wan mun pe wi e du spesrutu diniwroko, dan wan gemeente ben seti sani fu gi kotoigi satra nanga sonde bakadina, èn dridewroko nanga freida mofoneti. Den ben seti sani sosrefi fu gi kotoigi nanga yepi fu telefon, èn fu gi kotoigi na bisnispresi. Den seti disi ben meki taki den ben du a preikiwroko fayafaya, èn fu dati ede a gemeente ben teki a bosroiti fu go doro nanga den seti disi.
5 Meki muiti fu go baka wantewante: Efu yu no e miti den sma na ini yu kontren so makriki na oso te yu e tyari gobaka, dan pruberi fu meki mofo nanga den fu kon baka na wan spesrutu ten. Yu kan du dati na a fosi leisi yu miti a sma, èn sosrefi na ibri tron te yu e go baka. Baka dati, yu musu sorgu taki yu go baka na a sma (Mat. 5:37). Efu a fiti, dan yu kan aksi na ososma san na en telefon-nomru. Disi kan yepi yu sosrefi fu meki kontakti baka nanga a sma.
6 Fu tru, wi kan abi na overtoigi taki Yehovah sa blesi den tranga muiti di wi e meki fu suku den wan di warti, èn den muiti di wi e meki fu tyari gobaka na den sma di wani sabi moro.—Odo 21:5.