Yeye nyanyan na a reti ten
1. Fa Esekièl 36:29 e kon tru na ini a ten disi?
1 „Mi sa . . . bari kari gi a nyanyan fu a gron èn meki a kon de bogobogo, èn mi no sa tyari angriten kon gi unu”, na so Yehovah, a Moro Hei Masra taki (Esek. 36:29). Den profeiti wortu disi abi fu du nanga a pipel fu Gado na ini a ten disi. Na wan agersi fasi, Yehovah sorgu taki bogobogo nyanyan e opo kon gi a pipel fu en, so taki den kan tan na libi. A yeye nyanyan di wi e kisi na a reti ten na den distrikt kongres, e sori krin taki dati de so trutru.
2. Fa Yehovah gebroiki den kongres fu gi yeye nyanyan na a yoisti ten?
2 Na a kongres fu 1931, di hori na Columbus, Ohio, Yehovah ben tiri sani na so wan fasi taki den anbegiman fu en ben kan teki wan nyun nen, namku Yehovah Kotoigi (Yes. 43:10-12). Na ini 1935, a bigi ipi fu san Openbaring 7:9-17 e taki, ben de krin fu si. Na ini 1942, Brada Knorr ben hori a publikitaki „Vrede—A sa tan?” A publikitaki dati ben meki a preikiwroko gro na heri grontapu, èn a ben meki taki den brada seti a Waktitoren Bijbelskoro Gilead. Aladi son kongres prenspari trutru, toku wi ondrofeni taki ibri kongres de leki wan tafra di seti nanga bogobogo gosontu yeye nyanyan di seti na a reti ten.—Ps. 23:5; Mat. 24:45.
3. San wi musu du efu wi wani nyan bun fu a fesa-nyanyan na yeye fasi, na wi distrikt kongres?
3 O bun yu e nyan? A kan taki wi abi furu nyanyan lontu wi, ma efu wi no meki muiti fu nyan bun, dan wi no sa de gosuntu (Odo 26:15). Na yeye fasi dati de so tu. Na wan tu kongres, a ben de fu si taki furu sma e waka lontu na dorosei sondro taki dati ben de fanowdu, noso den e taki nanga trawan te a programa e hori. Aladi wan fu den prenspari marki fu a kongres na fu abi demakandra di e gi deki-ati, toku a ten fu du dati, na bifo noso baka a programa (Preik. 3:1, 7). Efu wi no de na wi sidonpresi e arki, dan wi kan misi wan prenspari penti. Kande a de fanowdu taki a kongres-opziener nanga den brada di e dini leki yepiman musu taki fu sani di abi fu du nanga a seti fu a kongres, aladi a konmakandra e hori. Efu dati no de fanowdu, dan den musu gi na eksempre fu di den o poti prakseri na a programa. Nowan fu wi musu misi a yeye nyanyan di wi e kisi.—1 Kor. 10:12; Fil. 2:12.
4. Fa wi kan sori taki wi de nanga tangi na ati gi a bogobogo yeye nyanyan di Yehovah seti gi wi?
4 Tra fasi leki den falsi leri fu Krestenhèit, wi e prisiri trutru nanga a bogobogo yeye waarheid di Yehovah seti gi wi! (Yes. 65:13, 14) Wan fasi fa wi kan ’sori taki wi de nanga tangi na ati’, na fu si a kongres leki wan okasi pe Yehovah e gi wi leri (Kol. 3:15). No si a boskopu leki a e komoto fu a takiman, ma si en leki a e komoto fu wi „Gran Leriman” (Yes. 30:20, 21; 54:13). Arki bun. Skrifi syatu san na den prenspari penti. Luku baka san na den prenspari sani, ibri mofoneti. Fiti san yu e leri na ini yu libi.
5. Fu san ede wi e prisiri fu den distrikt kongres?
5 Ibri kongres di wi e hori fosi Armagedon doro, e sori taki wi wini Satan! Dati de so awansi a kongres de na ini wan loweman kampu, na ini wan kondre pe sma e feti, noso na tra presi pe a situwâsi no takru so. Leki brada nanga sisa di de na ini wánfasi, wi e warderi den okasi di wi abi fu kon makandra na den distrikt kongres (Esek. 36:38). Wi abi a frutrow, taki Yehovah sa sori a lobi fu en baka, fu di a sa gi wi ’a nyanyan di wi abi fanowdu na a reti ten’.—Luk. 12:42.
[Faki na tapu bladzijde 4]
Sori taki yu e warderi a tafra fu Yehovah
◼ Arki bun
◼ Skrifi syatu san na den prenspari penti
◼ Luku baka san na den prenspari penti, ibri mofoneti
◼ Fiti san yu e leri na ini yu libi