Poku di kan meki wi firi bun
1 Singi nanga poku na prenspari sani fu a tru anbegi. Na ini Israel fu owruten, Asaf nanga den brada fu en ben singi: „Gi tangi na Yehovah, unu pipel. . . . Singi gi en, prei poku gi en, poti prakseri na ala den wondruwroko fu en” (1 Kron. 16:8, 9). Na ini a ten disi, wi e singi gi Yehovah na den gemeente konmakandra di wi e hori ibri wiki (Ef. 5:19). Disi na trutru wan tumusi moi okasi fu prèise a nen fu en!—Ps. 69:30.
2 Te wi e arki den Koninkrijksmelodieën (Kownukondre poku) tapu cassette noso cd, dan dati e furu wi prakseri nanga yeye afersi. Wan sisa ben taki: „Te den poku e prei, dan mi e memre den wortu fu den poku tu. Disi na trutru wan moi fasi fu prakseri Yehovah aladi mi e nyan bun fu poku!”—Fil. 4:8.
3 Okasi fu nyan bun fu den poku disi: Te wi e prei Kownukondre poku na oso, dan dati e meki wi firi switi èn a e meki wi prakseri yeye sani. Disi e meki taki vrede de na ini na osofamiri. Wan osofamiri ben skrifi: „Ibri tron baka wi e prei den poku disi na oso èn na ini a wagi, èn noiti wi no e fruferi fu den poku disi di meki na so wan fasi taki den e naki wi ati trutru. Furu tron den Kownukondre poku e gi wi a yoisti firi di wi musu abi te wi e teki sreka fu go na den Kresten konmakandra, noso te wi de na pasi fu go na den bigi konmakandra.” Wan sisa ben taki: „Te mi e arki den Kownukondre poku aladi mi e du mi wroko na oso, dan dati e meki mi firi bun baka; suma ben o denki taki mi ben o prisiri te mi e fow krosi? Ala ten te mi e firi brokosaka, mi e prei den poku disi. Den poku e meki mi kisi krakti baka trutru! . . . Ibriwan fu den singi e meki mi firi koloku.” Yu sabi wan tu okasi pe yu kan nyan bun fu den moi poku disi?
4 Furu fu den poku na ini a ten disi, e sori a yeye fu grontapu. Te papa nanga mama e gebroiki den Kownukondre poku bun, di de tapu cassette noso cd, dan den kan yepi den pikin fu den fu kon kisi lobi gi poku di bun. Furu bijbelstudenti, nanga sma di wani sabi moro fu Bijbel, ben o prisiri fu arki den poku disi di e gi Yehovah glori èn di e gi wi krakti baka na yeye fasi.—Ps. 47:1, 2, 6, 7.