Nyun Kring Konmakandra programa

Na ini den ’muilek ten disi di tranga fu pasa’, wi abi a koni fu Gado fanowdu efu wi wani taki Yehovah feni wi bun (2 Tim. 3:1). Na a kring konmakandra fu 2005 wi sa kisi bun rai nanga deki-ati, te wi sa poti prakseri na a thema: „Meki ’a koni fu tapusei’ tiri yu.”—Yak. 3:17.

A fosi symposium di nen „Fa wi kan sori ’a koni fu tapusei’ na ini wi libi”, sa yepi wi fu frustan san a wani taki fu de krin, fu lobi vrede, fu fiti wisrefi, èn fu de klariklari fu gi yesi. Baka dati, a kringopziener sa poti prakseri na ete dri fasi fa wi kan sori taki wi abi a koni fu Gado. Na a kaba fu a fosi dei, a distriktopziener sa sori fa a du kon taki Kresten dinari man taki fu a koni fu Gado, aladi son sma e si den leki sma di ’no sabi leisi noso skrifi èn di de neleki ala tra sma’.—Tori. 4:13.

Na a di fu tu dei, wan symposium di nen „Du muiti fu du den sani di e tranga a bribi”, sa yepi wi fu kon sabi san na den sani di kan meki wi kon swaki na yeye fasi, èn fa wi kan wai pasi gi den sani dati. A sa sori wi tu fa wi kan gi trawan deki-ati na den gemeente konmakandra, na ini a preikiwroko, èn na ini na osofamiri. A publikitaki di nen „Fa wi e kisi wini fu a koni fu Gado”, sa meki wi kisi moro warderi gi den wini di wi e kisi te wi e fiti den gronprakseri fu Gado na ini wi libi. A lasti lezing di nen „Wi kan kisi kibri te wi e meki a koni fu Gado tiri wi”, sa tranga a bosroiti di wi abi, fu suku koni na Yehovah na ini den lasti dei disi.

Wan heimarki fu ibri bigi konmakandra na a dopu fu nyun disipel. Wi sa poti prakseri tu na a Theokrasia Diniwroko-skoro nanga a Waktitoren-studie fu a wiki dati. Yehovah wani trutru taki wi alamala e kisi wini fu a koni di a e gi wi. A rai nanga a deki-ati di wi sa kisi na a kring konmakandra fu wi sa meki wi kon moro tranga na yeye fasi.—Odo 3:13-18.