Moro krakti tapu a Bijbel!

1. Gi suma spesrutu A Waktitoren ben tyari kon na doro na ini a bigin, èn gi suma a tijdschrift Het Gouden Tijdperk ben tyari kon na doro?

¹ Tapu 1 oktober 1919, a fosiwan fu na Ingrisi tijdschrift Het Gouden Tijdperk ben kon na doro. A tijdschrift disi ben de wan warti wrokosani na ini a preikiwroko. Fu san ede? Fu di a ben skrifi spesrutu gi ala sma. Disi no ben de so nanga A Waktitoren, di sma ben e si furu yari leki wan tijdschrift spesrutu gi a „pikin ipi” (Luk. 12:32). Kownukondre preikiman ben breiti so te nanga a nyun publikâsi disi, taki furu yari den ben prati moro fu a tijdschrift Het Gouden Tijdperk leki A Waktitoren.

2. Fa a tijdschrift Het Gouden Tijdperk nen na ini a ten disi, èn fu san ede a ben tyari kon na doro biginbigin?

² A tijdschrift Het Gouden Tijdperk ben tyari kon na doro fu sori sma taki na a Dusun Yari Tiri fu Krestes wawan sa lusu den problema fu a libisma famiri, èn taki disi o de wan trutru prisiriten gi a libisma famiri. Na ini den yari baka dati, wan tu kenki ben kon na ini a tijdschrift Het Gouden Tijdperk; disi ben du fu fiti a tijdschrift na den difrenti sani di ben de fanowdu na a ten dati. Na ini 1937, a nen fu a tijdschrift kenki kon tron Vertroosting. Na ini 1946, a nen fu a tijdschrift kenki kon tron Ontwaakt!, a nen di wi sabi na ini a ten disi.

3. Na ini a kontru fu sortu profeititori Ontwaakt! de wan prenspari wrokosani?

³ Sensi a bigin, a tijdschrift disi yepi furu fu horibaka gi a bigi kotoigi wroko di du sensi 1919 (Mat. 24:14). Ma fu di wi sabi o prenspari a ten fu wi de, meki a de wan koni sani fu tyari moro kenki kon na a tijdschrift Ontwaakt!

4. (a) San wan sma musu du efu a wani kisi kibri na „a dei fu Yehovah en atibron”? (b) Soleki fa Openbaring 14:6, 7 e sori, dan san na ’engel di e frei na mindrisei fu hemel’ e kari sma fu du?

⁴ Milyunmilyun sma lobi fu leisi Ontwaakt! fu di a e taki na wan switi fasi fu so furu sani di abi fu du nanga a grontapu. A no de fu taki dati furu sma di e go na a Memrefesa ibri yari na sma di e leisi Ontwaakt! doronomo. Toku, efu wan sma e howpu fu kisi kibri na „a dei fu Yehovah en atibron”, dan a sa musu du moro leki fu leisi den publikâsi fu wi doronomo.​—Sef. 2:3; Opb. 14:6, 7.

5. (a) Bigin nanga yanuari 2006, tapu san wi sa poti moro krakti na ini Ontwaakt!? (b) San furu sma sa wani du kande, èn sortu profeititori e kon tru te den sa du dati?

⁵ Fu dati ede, bigin nanga yanuari 2006, Ontwaakt! sa poti moro krakti tapu a Kownukondre fu Gado. A sa gi den leisiman moro deki-ati fu si Bijbel leki a lusu fu den problema fu den, èn a sa poti moro krakti tapu a fasi fa Bijbel e fruklari den sani di e pasa na ini a ten disi. Na a fasi disi, den leisiman sa man frustan den sani di e pasa na ini a ten disi moro bun, èn kande den sani di den e leisi kan naki den ati fu kon sabi moro fu Yehovah.​—Sak. 8:23.

6, 7. (a) Fa Ontwaakt! sa man yepi furu sma fu fiti densrefi na 1 Tesalonikasma 2:13? (b) Omeni leisi Ontwaakt! sa kon na doro, èn omeni tongo sa abi fu du nanga a kenki disi?

⁶ Ontwaakt! sa tan taki ete fu ala sortu sani di sma wani sabi, ma a sa poti moro krakti tapu a Bijbel (1 Tes. 2:13). Fu di A Waktitoren e taki kaba fu dipi Bijbel tori, èn Ontwaakt! sa taki moro fu sani di abi fu du nanga Bijbel, meki a no de fanowdu fu tan tyari Ontwaakt! kon na doro tu leisi na ini wan mun. Fu dati ede, bigin nanga yanuari 2006, wi sa tyari Ontwaakt! kon na doro wán leisi na ini wan mun. Disi sa abi leki bakapisi taki sani sa go moro makriki fu sreka, fu vertaal, èn fu seni a lektuur go na den gemeente.

⁷ Sowan 40 procent fu den tongo na ini san Ontwaakt! e tyari kon na doro sa abi fu du nanga a kenki disi. Na ini furu fu den tongo, Ontwaakt! e tyari kon na doro kaba, wán leisi na ini a mun noso wán leisi na ini dri mun. A Waktitoren sa tan tyari kon na doro na a srefi fasi.

8. Fa preikiman kan gebroiki Ontwaakt! makandra nanga A Waktitoren?

⁸ Preikiman kan pristeri Ontwaakt!, ibri mun makandra nanga wan fu den tu Waktitoren fu a mun dati. Den sma di e pristeri Ontwaakt! sa man gebroiki a srefi tijdschrift a heri mun langa sondro fu kenki a takimakandra fu den na a mindri fu a mun, soleki fa disi e pasa now.

9. Sortu prenspari presi Ontwaakt! sa tan abi na ini a preikiwroko?

⁹ Sma kon sabi a tijdschrift fosi leki Het Gouden Tijdperk, baka dati leki Vertroosting, èn now leki Ontwaakt! Sensi a tijdschrift disi kon na doro na ini 1919, a ben de wan prenspari wrokosani na ini a preikiwroko. Wi e begi taki Yehovah sa tan blesi a prati fu a tijdschrift disi na a fasi fa disi e pasa now, èn taki a tijdschrift sa yepi moro furu sma „di komoto na ala kondre nanga lo nanga pipel nanga tongo” fu kon si a Kownukondre fu Gado leki a wan-enkri howpu di den abi.​—Opb. 7:9.