Tyari tijdschrift doronomo gi sma fu meki taki den wani kon sabi moro
1. Fa wi kan gebroiki den tijdschrift di wi e tyari gi sma doronomo, fu meki taki den wani kon sabi moro?
1 Furu fu den sma di wi e miti na ini a preikiwroko lobi en te wi e go na den èn den lobi fu teki den publikâsi fu wi, ma furu tron den e draidrai fu studeri Bijbel doronomo. Wan sani di wi kan du fu meki wan sma kon sabi moro, na te wi e tyari tijdschrift gi den doronomo. Te yu prati tijdschrift, dan skrifi a nen nanga na adres fu a sma, èn skrifi sosrefi o ten yu go na en, sortu tijdschrift a teki, èn fu sortu bijbeltekst yu ben taki. Boiti dati, te yu e si taki wan sani e hari a sma prakseri, dan yu kan skrifi dati tu. Ibri leisi te nyun tijdschrift kon, dan suku tori di o hari a prakseri fu den sma di e teki tijdschrift doronomo, èn taki fu den tori dati te yu e go na den (1 Kor. 9:19-23). Baka wan pisi ten kande, den o leisi wan sani na ini den tijdschrift di kan meki taki den wani kon leri sabi moro.
2. Fu san ede a de tumusi prenspari taki sma e suku Yehovah now, èn san wi kan du moro fu yepi den sma disi?
2 Ma wi e frustan taki furu sma no sa tron futuboi fu Yehovah soso fu di den e leisi den tijdschrift. A de tumusi prenspari taki sma e suku Yehovah now. Fu dati ede, san wi kan du moro fu yepi den sma disi? (Sef. 2:2, 3; Openb. 14:6, 7) Wi kan meki taki den wani kon sabi moro, te wi e taki nanga den fu wan spesrutu bijbeltekst, ibri leisi te wi e tyari den tijdschrift gi den.
3. (a) Fa wi kan sreka wisrefi fu abi wan tu takimakandra nanga sma, aladi wi e gebroiki wan bijbeltekst nomo? (b) Nanga sortu tori moro furu sma na ini a kontren fu yu e broko den ede?
3 Abi wan takimakandra fu wán bijbeltekst: Prakseri den sma gi suma yu e tyari den tijdschrift doronomo, èn sreka wan tu takimakandra pe yu e gebroiki wan bijbeltekst di fiti na ibriwan fu den (Fil. 2:4). Fu eksempre, efu wan sma lasi wan lobiwan na ini dede no so langa pasa, dan kande yu kan go wan tu leisi na a sma fu sori en san Bijbel e taki fu den dedewan èn fu na opobaka howpu. Yu kan luku na ini a Redeneren-buku na a ondro edeprakseri „Dood” (Dede) nanga „Opstanding” (Opobaka) fu sreka yusrefi gi den takimakandra di yu sa abi, aladi yu e gebroiki wán bijbeltekst nomo. Kande yu sa abi tra takimakandra baka dati fu tori di abi fu du nanga disi; tori soleki a siki di sma e siki, na owru di sma e kon owru, èn fa dede no sa de moro te fu kaba. A marki fu yu musu de taki yu e suku wan tori di o hari a prakseri fu a sma, èn na so fasi yu kan sori a sma safrisafri san Bijbel e taki.
4. Fu san ede a de prenspari fu meki wan sma frustan den bijbeltekst di wi e gebroiki, èn fa wi kan du dati?
4 Meki a sma frustan a tori: Aladi a moro bun fu hori den takimakandra disi syatu èn fu no go tumusi dipi na ini a tori, toku moro de fanowdu leki fu leisi wan bijbeltekst nomo. Satan breni a frustan fu sma so taki den no man frustan a bun nyunsu (2 Kor. 4:3, 4). Srefi den sma di sabi Bijbel, abi yepi fanowdu fu frustan en (Tori. 8:30, 31). Fu dati ede, teki ten fu fruklari san a tekst wani taki èn gebroiki wan eksempre fu tyari sani kon na krin; du disi neleki fa yu ben o hori wan lezing na a Theokrasia Diniwroko-skoro (Tori. 17:3). Sorgu taki a sma e frustan taki den sani na ini Gado Wortu sa gi en wini na ini en eigi libi.
5. San yu kan du so taki wan sma di e teki tijdschrift doronomo kan tron wan bijbelstudie?
5 Efu a sma lobi den sani di a e leri, dan safrisafri yu kan taki moro langa nanga a sma fu di yu e gebroiki tu noso dri bijbeltekst ibri leisi te yu e go na en. Suku wan okasi pe yu kan sori a sma a San Gado e aksi-brochure noso a Sabi-buku. Na a fasi disi, wan sma di e teki tijdschrift doronomo, kan tron wan bijbelstudie te fu kaba.