A bow fu Kownukondre zaal—Wan prenspari fasi fu du santa diniwroko
1. O furu wroko du kaba fu bow Kownukondre zaal, ma san de fanowdu ete?
1 Na ini den tu yari di pasa, fo Kownukondre zaal ben bow na ini Sranan. Sosrefi wán zaal ben bow na Gakaba di den brada kan gebroiki tu gi den bigi konmakandra. Fu tru, wi e warderi a tranga wroko fu a bowgrupu èn fu den tra sma di yepi den. Aladi someni wroko du kaba, toku furu wroko de fu du ete fu bow Kownukondre zaal. Fa wi alamala kan horibaka gi a prenspari fasi disi fu du santa diniwroko gi Yehovah?—Openb. 7:15.
2. Fa wi kan horibaka gi a bow fu Kownukondre zaal?
2 De klariklari fu wroko: Efu yu na wan dopu preikiman, wi e gi yu wan kari fu gi yu nen fu wroko makandra nanga a bowgrupu. Yu kan skrifi yu nen na tapu a papira fu go wroko leki friwani-wrokoman fu bow Kownukondre zaal (A-25) (Ps. 110:3). Ibri sma di wani yepi musu de klariklari fu wroko makandra nanga tra sma (Ps. 133:1). Awinsi yu no abi ondrofeni na ini bow-wroko, toku yu kan du furu fu meki a bow fu wan zaal waka bun. Den brada sa leri yu tra sani tu di abi fu du nanga a bow-wroko, èn disi sa meki taki den kan gebroiki yu moro bun bakaten.
3. Na sortu tra fasi wi kan horibaka gi a seti disi?
3 Efu yu no man wroko leki friwani-wrokoman, dan yu kan horibaka gi a wroko fu di yu e gi trawan deki-ati fu gi den nen efu den kan. Te trawan gowe fu a gemeente fu go yepi bow wan Kownukondre zaal, dan yu kan yepi den nanga den frantwortu di den abi na ini a gemeente. Owruman kan seti sani na fesi, so taki sani kan waka bun nanga a gemeente te wan tu sma e go yepi bow wan Kownukondre zaal. Den gemeente kan horibaka gi a wroko disi te den e seni bijdrage ibri mun go na a bowfonsu. A no de fu taki dati Yehovah e prisiri te wi e wroko makandra na ini wánfasi fu meki Kownukondre afersi go na fesi.—Hebr. 13:16.
4. Fa wi kan gi deki-ati na den wan di e teki prati na a wroko fu bow Kownukondre zaal?
4 Gi trawan deki-ati: A e teki furu ten fu bow presi pe wi kan kon makandra, èn a wroko hebi. Wi kan frustan taki den wan di kisi wan kari fu go yepi nanga den bow-wroko, no sa de na ini den eigi gemeente ten na ten. Meki a de so taki wi e prèise den friwani-wrokoman èn gi den deki-ati, fu di den de klariklari fu libi son sani, soso fu du „a prenspari wroko” disi.—Tori. 6:3; Rom. 14:19.
5. Sortu bun bakapisi wi e kisi te ala sma na ini a gemeente e wroko makandra fu meki a tru anbegi go na fesi?
5 Na apostel Paulus ben taki dati den memre fu a gemeente e wroko makandra na ini wánfasi so taki ’a skin kan gro kon tranga nanga yepi fu lobi’ (Ef. 4:16). Fu di wi abi lobi gi Yehovah èn gi a tru anbegi, meki wi e wroko makandra fu preiki a bun nyunsu èn fu yepi bow Kownukondre zaal.