Anbegi Yehovah leki osofamiri
1 Na ini Bijbel ten, osofamiri ben du furu sani makandra. Ibri dei den ben du osowroko, ma a moro prenspari sani di den ben du, na taki den ben e anbegi Yehovah leki osofamiri (Lef. 10:12-14; Deut. 31:12). Na ini a ten disi, osofamiri na ini furu kondre no e du furu sani makandra. Ma Kresten e frustan o prenspari a de fu du sani makandra leki osofamiri, spesrutu te den sani dati abi fu du nanga na anbegi. A no de fu taki dati a Sma di seti na osofamiri-libi e prisiri trutru te a e si taki osofamiri e anbegi en!
2 Preiki makandra leki osofamiri: Te osofamiri e preiki makandra, dan dati sa meki taki den abi wan moro bun matifasi. Boiti taki wan owruman e go nanga tra sma fu a gemeente na ini a preikiwroko, a musu abi a gwenti tu fu wroko makandra nanga en wefi èn nanga den pikin fu en, fu di dati de prenspari (1 Tim. 3:4, 5). Srefi kring-opziener nanga distrikt-opziener di abi furu fu du, e meki ten fu wroko makandra nanga den wefi fu den na ini a preikiwroko.
3 Papa nanga mama di e preiki makandra nanga den pikin fu den, o man yepi den pikin fu tron moro bun preikiman. Den pikin o si fa den papa nanga mama e prisiri na ini a preikiwroko. Ma boiti dati, den sa si tu taki den papa nanga mama lobi Yehovah nanga tra sma (Deut. 6:5-7). Srefi te den pikin kon bigi kaba, a de prenspari taki papa nanga mama e wroko makandra nanga den na ini a preikiwroko. Wan trowpaar di abi dri boi, wan fu 15 yari, wan fu 18 yari, nanga wan fu 21 yari, abi a gwenti te now ete fu wroko makandra nanga den na ini a preikiwroko. A papa ben taki: „Ibri tron te wi e wroko nanga den, wi e leri den wan sani. Wi e sorgu tu taki den feni en wan prisiri sani fu de na ini a preikiwroko, èn wi e sorgu taki den e kisi deki-ati fu dati.”
4 Den e sreka densrefi leki osofamiri: Osofamiri kon si taki den e kisi wini te den e sidon makandra fu sreka densrefi fu go na ini a preikiwroko. Nofo tron a de so taki pikin lobi fu sreka densrefi makandra nanga trawan fu na osofamiri. Son leisi den kan du neleki den na a ososma, èn wan tra leisi den kan du neleki den na a preikiman. Wan tu papa nanga mama e teki wan tu miniti baka na osofamiri studie, fu sidon makandra nanga den pikin fu sreka densrefi gi a preikiwroko.
5 Te wi e du prenspari sani makandra nanga sma di wi lobi, èn te wi e du sani di e meki wi firi bun, dan dati o gi wi moro prisiri. A e gi den sma na ini wan osofamiri prisiri trutru te den e wroko makandra oso-fu-oso, te den e go baka na sma, èn te den e hori bijbelstudie. Sobun, te yu e dini Yehovah makandra nanga yu osofamiri, yu sa man taki nanga prisiri: „Mi nanga mi osofamiri, wi sa dini Yehovah.”—Yos. 24:15.