Nyun kring konmakandra programa

Fa wi kan tanapu kánkan te sma e gens a tru anbegi fayafaya? Fa wi kan wini Satan di e tan du ala san a man fu meki wi go baka na ini na ogri grontapu disi? A kring konmakandra programa fu a dienstyari 2009 sa gi piki tapu den prenspari aksi disi. A thema fu a kring konmakandra na: „Tan du bun fu kan wini na ogri” (Rom. 12:21). Luku wan tu sani fu a programa.

A distrikt-opziener sa hori den lezing di nen „Wi e kisi krakti fu du bun so taki wi kan wini na ogri”, „No denki tumusi furu fu yusrefi!”, „Heri esi ala ogri o kon na wan kaba!”, nanga „Wi musu tranga wi bribi fu wini grontapu”. A kring-opziener sa hori den lezing di nen „Disi na a ten fu tan na ai” di teki puru fu Romesma 13:11-13, nanga „No lasi-ati na a dei fu banawtu” di teki puru fu Odo 24:10. Wi e angri sosrefi fu yere a pisi di a kring-opziener sa hori èn di nen „Poti prakseri na den sani di a kring abi fanowdu”. Wan tra lezing di o gi wi furu deki-ati, na a lezing di nen „Yu kan ’du a diniwroko’ leki pionier?” A fosiwan fu den tu symposium di sa hori na a kring konmakandra disi, abi leki nen „Kakafutu gi den triki fu Didibri”. A symposium disi sa yepi wi fu si san na den triki fu en, èn a sa yepi wi fu sabi fa wi kan wai pasi gi den triki dati te a abi fu du nanga nyun sani di sabiman e meki, te a abi fu du nanga prisiriten èn nanga skoroleri. A symposium di nen „Kisi krakti fu man kakafutu gi Satan na ini na ogri ten disi” sa sori wi fa fu fiti a rai fu Gado Wortu moro bun, soleki fa a skrifi na ini Efeisesma 6:10-18.

A preiki di wi e preiki a Kownukondre boskopu, na wan prenspari fasi fa wi e wini a sma fu pe ogri komoto (Openb. 12:17). Fu dati ede a no e fruwondru wi taki Satan e tan frufolgu den Kotoigi fu Yehovah fayafaya! (Yes. 43:10, 12) Ma Didibri no sa wini kwetikweti, fu di wi no e meki noti tapu wi fu „tan du bun fu kan wini na ogri”. Sorgu taki yu de ala den tu dei na a kring konmakandra disi, so taki yu kan kisi wini dorodoro fu a heri programa.