Yu gebroiki a kafti na bakasei?

Te sma e teki wan tijdschrift, dan nofo tron den e luku a kafti na fesisei èn sondro fu denki den e drai luku a bakasei kafti. A kafti na bakasei fu A Waktitoren gi a publiki abi wan tu moi aksi di e hari sma prakseri èn wan tu sani skrifi tu di moi fu sabi. Boiti dati, den bladzijde skrifi sosrefi pe sma kan feni den tori dati.

Wi kan gebroiki den sani disi di skrifi na bakasei fu poti aksi gi sma so taki wi kan bigin wan takimakandra. Efu wi e wroko furu leisi na ini wan kontren, dan wi kan hori difrenti pristeri fu di wi e poti difrenti aksi na ini a mun. Te na ososma abi furu fu du, wi kan hori wan syatu pristeri fu di wi e sori en wan fu den aksi na bakasei. Kande wi kan taki: „Efu yu wani sabi a piki tapu na aksi disi, dan mi kan libi den tijdschrift disi gi yu èn wi kan taki moro fu den te yu abi ten.” Son preikiman kande wani bigin wan takimakandra fu di den e sori na ososma a kafti na bakasei èn den e aksi en sortuwan fu den aksi a ben sa wani sabi a piki na tapu. Baka dati, a preikiman kan sori a sma pe a kan feni a piki tapu na aksi èn a kan leisi wan Bijbeltekst di a ben sreka ensrefi na fesi fu leisi. Kande yu kan prakseri na sortu tra fasi yu kan gebroiki a kafti na bakasei fu A Waktitoren fu hari sma prakseri.