Bigin wan takimakandra nanga a brochure San Gado Wortu e leri wi?
1. Sortu nyun yepisani wi kisi gi a preikiwroko?
1 Na a kongres fu 2014, wi kisi a brochure di nen San Gado Wortu e leri wi? Fa wi kan gebroiki a nyun yepisani disi fu sreka wisrefi gi a preikiwroko? A brochure abi difrenti Bijbel tori nanga Bijbeltekst di abi fu du nanga den tori dati. Neleki fa a de nanga a Bijbel takimakandra-brochure, na so wi kan gebroiki a brochure disi bun fu bigin wan takimakandra.
2. Fa wi kan gebroiki a brochure San Gado Wortu e leri wi?
2 Yu kan gebroiki aksi 8 èn taki: „Wi e kon na sma na ini a birti fu di furu sma e aksi densrefi efu ’Na Gado e meki taki libisma e pina?’ [Na ini son kontren a moro bun fu sori na ososma na aksi na ini a brochure.] San yu denki? [Gi a sma na okasi fu piki.] Bijbel e gi bun piki tapu na aksi disi.” Teki yu Bijbel fu leisi èn taki fu wán noso moro fu den tekst di kari. Efu na ososma wani sabi moro, dan yu kan sori en den 20 aksi na a bigin fu a brochure. Aksi en fu sortuwan fu den aksi a wani taki wan tra leisi. Noso yu kan pristeri en wan fu den buku di wi e gebroiki fu studeri nanga sma èn di e taki moro fu a tori di unu ben taki.
3. Fa wi kan gebroiki a brochure San Gado Wortu e leri wi? fu bigin takimakandra na ini kontren pe sma no abi a Kresten bribi?
3 Yu kan gebroiki aksi 4 nanga aksi 13 te go miti 17 te yu e preiki na ini kontren pe sma no abi a Kresten bribi. Fu eksempre, yu kan gebroiki den sani di skrifi na aksi 17 èn taki: „Wi e kon na sma fu di wi wani yepi den nanga den osofamiri. Yu feni taki osofamiri na ini a ten disi abi furu problema? [Gi a sma na okasi fu piki.] Furu trowpaar kisi yepi di den teki a koni rai disi: ’A wefi musu abi bigi lespeki gi en masra.’ [Yu no abi fu taki dati den wortu disi skrifi na ini Efeisesma 5:33. Efu yu e taki nanga wan uma, dan a ben o moro bun fu leisi den wortu fu Efeisesma 5:28.] Yu denki taki a trowlibi o waka moro bun te wi teki a rai disi?”
4. San yu kan du na a kaba fu wan takimakandra nanga wan sma di no abi a Kresten bribi?
4 Na a kaba fu a takimakandra, yu kan seti sani fu taki a tori moro fara nanga a sma wan tra leisi. Kande yu kan taki fu wan fu den tra Bijbeltekst di abi fu du nanga na aksi di yu gebroiki. Luku o ten a fiti fu taigi na ososma taki den koni rai di yu sori en de fu feni na ini Bijbel. Efu yu e hori na prakseri fu san yu ben taki nanga en èn fa a sma e denki fu Bijbel, dan yu kan gi en wan buku di a o wani leisi.—Luku na inibere pisi fu Wi Kownukondre diniwroko fu december 2013.