WI KRESTEN LIBI
Fa fu hori a preikiwroko konmakandra moro bun
Neleki ala den tra konmakandra na so den preikiwroko konmakandra de wan seti fu Yehovah, fu gi makandra deki-ati, fu sori lobi èn fu du bun wroko (Heb 10:24, 25). A musu hori na ini feifi te go miti seibi miniti. Na ini a pisi ten disi a grupu nanga a kontren musu prati èn den musu begi. (Efu wi e hori en baka wan tra konmakandra, dan a musu moro syatu srefi.) A brada di o hori a preikiwroko konmakandra musu sreka wan sani di den preikiman kan gebroiki bun a dei dati. Fu eksempre, tapu satra a kan taki furu preikiman no go ini a preikiwroko ete gi a wiki dati. Dati meki a ben o bun fu sori san un kan taki te wi miti wan sma. Fu sortu tra sani a brada kan taki na a preikiwroko konmakandra?
A kan gebroiki wan fu den eksempre na ini a Wi Kresten libi nanga a preikiwroko—Studie-buku
Fa fu gebroiki wan sani di pasa noso wan tori di kon na nyunsu fu bigin wan takimakandra
San fu taki te wan sma taki wan sani fu tapu a takimakandra
Fa fu taki nanga wan sma di no e bribi na ini Gado, wan sma di e bribi na ini evolutie, wan sma di e taki wan tra tongo noso wan sma di de fu wan bribi di furu sma no gwenti na ini a gebied fu unu
Fa fu gebroiki den sani tapu jw.org, a JW Library® app, noso a Bijbel
Fa fu gebroiki den sani na ini a Teaching Toolbox
Fa fu teki prati na ini a preikiwroko nanga yepi fu telefon noso brifi, fa fu preiki pe furu sma de, fa fu tyari gobaka noso hori Bijbelstudie
Memre den preikiman fu fiti densrefi, fu sori bun maniri èn fu du a preikiwroko nanga prisiri. Yepi den fu si fa fu du sani nanga koni èn fu sorgu taki den no kisi mankeri
Taki fu wan les noso sori wan felem fu a Gi leri-brochure
Fa yu kan yepi yu preikiwroko patna èn gi en deki-ati
Taki fu wan tekst di abi fu du nanga a preikiwroko noso fruteri wan moi ondrofenitori di abi fu du nanga a preikiwroko