Na paradeysi di o kon baka gi grani na Gado
„Na presi fu mi futu mi sa meki kon moy.” — Yesaya 60:13
1, 2. (a) San Gado ben taki a fesi fu a grontapu nanga mofo fu en profeyti Yesaya? (b) San wi e si efu wi e luku go dusun yari na ini na ten di e kon?
YEHOVAH ben meki grontapu leki wan planeet na ondro en futu, leki en agersi futubangi. Nanga mofo fu en profeyti Yesaya Gado ben taki a fesi taki a ben sa meki ’a presi fu en futu kon moy’ (Yesaya 60:13). Nanga yepi fu na beybri di skrifi nanga krakti fu santa yeye wi kan luku leki nanga wan krakti teloskoop dusun yari go na ini a tamara fu libisma. Fa a de wan kofarlek moy prenki di e sori en srefi a wi ay! A heri grontapu e brenki fu wan moyfasi sondro flaka, di na moro bigi Dyariman ini na heri universum ben meki. Na paradeysi sa kon baka gi libisma na a heri grontapu!
2 Iya, na moro hey Sma, Gado, di ben meki libisma ini a bigin fu a libi na ini wan paradeysi, wani taki libisma de so koloku leki a kan. Fa libisma abi fu tru wan lobi Mekiman, di sondro fu taki sani psa marki wi kan taki fu en: „Gado na lobi”! (1 Yohanes 4:8, 16) Na ini a paradeysi di o kon baka dan mansma nanga umasma di de bigisma sa libi makandra na ini wan libisma volmaaktifasi sondro flaka (Yesaya 9:6). Fu lobi ede meki den saka den srefi na wan volmaakti fasi na ondro na glori Mekiman fu heymel nanga grontapu, Yehovah Gado.
3, 4. (a) Na sortu fasi heymel nanga grontapu sa de ini akruderi nanga makandra? (b) Fa den engel sa du te na paradeysi kon baka na grontapu?
3 Dusun dusun yari a fesi Gado ben taki ini wan sani di a ben fruteri ondro krakti fu Gado santa yeye ini den wortu di e kon èn di e seki yu ati èn disi ben de gi a pipri fu en di a ben teki puru: „Na heymel na mi kownusturu èn na grontapu mi futubangi” (Yesaya 66:1). Na heri glori fu en „futubangi”, na paradeysi gronatpu, musu den wan sori fu sani di fiti na glori fu en kownusturu na ini den heymel di no de fu si.
4 Na a ten fu na meki di Gado ben meki grontapu den sma di de na ini na kontren fu heymel lontu Gado kownusturu ben luku na grontapu toneel di de na ondro den. Fa den ben musu fruwondru di den ay ben si na glori moyfasi fu en! Fa den ben sa man fu hori den srefi fu no bari wan singi? (Teki gersi nanga Sefanya 3:17; Psalm 100:2, GNB.) Na breyti èn prisiri Mekiman ben tyari en grontapu skrifiman kon ondro krakti fu santa yeye fu fruteri soyfri san ben feni presi na ini heymel: ’Den mmantenstari makandra ben bigin wan prisiri bbari, èn ala manpikin fu Gado ben agri moro fara nanga prisiri’ (Yob 38:7). Omeni moro den engel manpikin fu Gado sa bigin wan prisiri bbari fu na grani fu Gado te na paradeysi sa kon baka!
5. Fa wi musu denki fu na kontru fu Gado fosi prakseri di a ben abi nanga na grontapu?
5 A de trutru wan sani di e waran yu ati taki nanga yepi fu a Santa Buku agen wi e kisi na dyaranti taki na moro bigi kontru fu wan paradeysi grontapu ben de na marki di Yehovah Gado fu sensi bigin abi na prakseri. Na prisiri preysesingi disi di e gi yu frede èn di e tyari Gado prakseri kon a wan heymarki ini a tori fu na grontapu disi de precies na yoysti sani di yu kan fruwakti fu wan Gado di e go a fesi fu glori go miti glori nanga a sori fu tumusi bun wroko sondro fu misi. A musu kisi ala grani! — Psalm 150:1, 2; Yesaya 45:18; Openbaring 21:3-5.
Sma di opo baka fu dede e yepi fu meki na paradeysi kon baka
6. Fa sma sa furu na grontapu baka Armageddon?
6 Aladi den sma di o psa Armageddon libilibi de pikinso ini nomru te yu sa teki den gersi nanga bigi ipi sma, toku na grontapu no sa kon furu nanga lbisma leki wan bakapisi fu soso den pikin di den o meki. Yehovah sa ’meki na presi fu en futu’ so srefi tu ’kon moy’ fu di a e tyari den sma kon baka na libi di de na ini den memregrebi èn di e kon ondro na verdienste fu na frulusu-ofrandl fu Krestes. Den sma disi sa kisi dan na grani fu abi wan prati na a tumusi moy wroko di de na ini a kenki fu wi grontapu planeet kon na ini wan paradeysi fu moyfasi di no abi en speri. — Tori fu den apostru 24:15.
7. Sortu wortu di Yeyses ben taki den sma di psa Armageddon sa hori na prakseri?
7 Den sma di o psa Armageddon libilibi alaten sa hori den elektrik wortu na ini prakseri di Masra Yeyses Krestes ben taki di sani ben buweygi en fu taki: „No fruwondru fu disi, bika na yuru e kon pe ala sma di de na ini den memregrebi sa yere en sten èn sa kon a doro” (Yohanes 5:28, 29). Fa disi sa de wan yuru te den dedesma sa bigin yere na ini den memregrebi fu den na sten fu na manpikin fu Gado aladi a e taki wortu gi den di e kruderi nanga san a ben taygi na Lasarus di ben beri na ini Betaniya, namku: „Lasarus, kon na doro!” — Yohanes 11:43.
8, 9. Suma seyker kande sa de den fosiwan di sa wiki opo fu kisi libi nyun na grontapu, èn sortu prisiri disi sa de gi den sma di psa Armageddon libilibi?
8 Suma kande seyker sa kisi opobaka fu libi nyun baka na grontapu leki den fosiwan ondro na Dusun yari tiri fu Yeyses Krestes èn leki na yere fu Yeyses komando? A wan reydelek sani taki den „tra skapu” sa de den sma di dede na ini na ten fu den lasti dey di ben waka a fesi na kba fu a seti fu sani disi. Den sa kisi wan fruku opobaka (Yohanes 10:16). Seyker den no sa abi furu muyti fu fiti den srefi na a nyun grontapu. — Teki gersi Mateyus 25:34; Yohanes 6:53, 54.
9 Fa a sa de wan tumusi moy sani gi den sma di psa Armageddon te den e si taki den sma fu den „tra skapu” di ben dede na ini na ten fu na geslakti di ben libi bifo na „bigi banawtu”, e kisi wan opobaka! (Mateyus 24:21) Fu di den sma di psa Armageddon kan sabi den bunbun, meki den sa herken den, bari den wan switikon èn makandra nanga den go abra fu du na ini wanfasi na dienst fu den nyun baka gi na moro Hey Gado!
10. Yu kan de kotoygi fu san efu yu psa Armageddon?
10 Leki wan fu den sma di o psa Armageddon yu kan de kotoygi fu na opobaka fu na fosiwan fu yu eygi grontapu famiriman. Fa na sani disi di o abi krakti tapu yu firi no kan de trafasi leki di fu a ppa nanga mma di ben si fa Masra Yeyses ben tyari na twarfu yari umapikin fu den kon baka na libi, so taki nanga furu firi fu lobi den ben brasa en? „Wantewante den ben prisiri psamarki” (Markus 5:42). Iya, fu tru, bigi prisiri sa de na porsi fu yu te den dedewan e wiki opo fu Hades nanga na se (Openbaring 20:13). Ow, fa disi sa de wan tumusi moy tamara, wan tamara di sa doro beri esi!
„Granman na a heri grontapu”
11, 12. (a) Psalm 45:16 e poti krakti tapu san? (b) A mindri fu suma na kownu Yeyses Krestes sa teki sma poti leki „granman tapu a heri grontapu”?
11 Fu di Yeyses e kobroyki en makti fu wiki den dedewan di a ben gi en volmaakti libisma libi abra gi den leki wan frulusu ofrandi, meki a kan meki kon tru san tanapu na ini Psalm 45:16. Na Psalm disi na profeytifasi e taki nanga Yeyses Krestes leki na kownu di Gado poti na wroko: „Na ini na presi fu yu [grontapu] fositen tta, yu manpikin sa sori taki den de, di yu sa poti leki granman na a heri grontapu.” Na psalm disi e poti krakti a tapu taki Yeyses Krestes sa tron wan heymel tta fu pikin dya na grontapu èn taki a sa teki manpikin a mindri den poti leki ’granman na a heri grontapu’. Leki na „manpikin fu David” èn leki na fosi koboru manpikin fu na dyu wenke Mariya meki Yeyses ben abi libisma fositen tta di a famirilin fu den e go te na a fosi tta, Adam. — Lukas 3:23-38.
12 Psalm 45:16 wani taki taki den sma di fositen ben de Yeyses fositen tta na skinfasi, sa tron en manpikin fu di a e wiki den opo fu dede? Iya. Psalm 45:16 wani taki so srefi tu taki Yeyses, fu respeki ede fu en rutu di kon fu den, sa sori spesrutu bun ati gi den leki kownu èn sa poti den wwan leki ’granman na a heri grontapu’ ini en paradeysi toestand? Nôno. Efu na profeytitori na a fasi dati ben sa kon tru, dan soso wan skotu nomru fu ’granman’ ben sa de na a heri grontapu. Boyti fu dati, a no ala fu den fositen tta disi fu en ben de na a fasi disi taki den e frudini fu kisi na ini a ten fu en dusun yari tiri spesrutu prenspari presi na a heri grontapu. Na Kownu, Yeyses Krestes, sa abi furu moro sma leki soso en grontapu fositen tta di a kan poti leki „granman” — bekwaam sma fu a mindri fu den sma di psa Armageddon libilibi èn a mindri fu den „tra skapu” di wiki opo fu dede, makandra nanga den man fu bribi bifo a ten fu Krestes. A mindri fu den alamala a kan teki poti bekwaam man di warti fu teki a wroko leki wan granman èn fu teki presi gi en na grontapu.
13, 14. Sortu sma di wiki opo fu dede den sma di psa Armageddon libilibi sa abi na grani fu si den nanga den eygi ay?
13 Go prakseri pikinso na den sma di bun fu kisi wan opobaka na ondro na Mesiyas kownukondre. Luku pikinso! Wi kan bribi wi ay? Drape Abel de, na fosi libisma di dede fu en bribi ede, nanga Heynok di ben tan waka nanga na tru Gado. Drape Noa de tu di ben bow na ark. Drape Abraham, Isak, nanga Yakob de, den fositen tta fu na nâsi Israèl. Drape Moses de (fu na pristri lo Leyfi) so srefi tu David, di na têgo frubontu gi wan kownukondre ben meki nanga en. Èn drape Yesaya, Yeremiya, Esykièl, Danièl nanga tra Hebrew profeyti de, di ben de beybri skrifiman, te nanga na lasti wan fu den, Maleaki, èn a no de fu taki, Yohanes na Dopuman èn so srefi tu Yosef, na kweki ppa fu Yeyses.
14 Na wán okasi, Yeyses ben taygi den dyu taki den „[ben sa] si Abralam nanga Isak nanga Yakob nanga ala den profeyti na ini na kownukondre fu Gado, ma den srefi [ben sa] trowe go na dorosei” (Lukas 13:28). Na „bigi ipi” sma na grontapu di sa psa libilibi na „feti fu na bigi dey fu Gado na Almaktiwan” sa kisi na grani fu si nanga den eygi ay taki na „Abraham nanga Isak nanga Yakob nanga ala den profeyti” di wiki opo fu dede de dya baka tapu na paradeysi grontapu èn e du kownuwroko ondro na kownukondre fu Gado di na „Têgo Tta”, Yeyses Krestes, e tiri. — Openbaring 7:9, 14; 16:14; Yesaya 9:6.
15. Sortu grani di no abi en speri e wakti den sma di psa Armageddon?
15 Fa disi sa seki yu ati, yu, di e psa libilibi na kba fu na disiten takru grontapu, fu kenki prakseri nanga Noa nanga en krosibey famiri, „ayti sili”, di na ini 2370 bifo G.T ben psa libilibi na kba fu na fosi grontapu, di ben way puru na ini wan frudu di ben de na a heri grontapu! Na ini ala têgo ten no wan sma moro sa ondrofeni den sani disi leki yu èn na so fasi sa man na ini na spesrutu èn aparti fasi disl fu dini leki wan kotoygi fu Yehovah Gado. — 1 Petrus 3:20; Markus 13:19; 2 Petrus 3:5-7.
Yeyses e memre wan ogriman di ben firi gi en
16, 17. (a) Sortu grani den sma di psa Armageddon nanga trawan di de dan a libi sa kisi te Yeyses e memre na ogriman di ben firi gi en? (b) Sortu howpu de gi na ogriman di o wiki opo fu dede?
16 A no de fu taki taki, na a ten dati na kon baka fu na grontapu paradeysi sa de bun fara kba. Na ogriman di ben anga na sey Yeyses na wan postu na Kalfari èn di ben taki fu di a ben erken na marki di ben poti tapusey fu na ede fu Yeyses: „Yeyses, memre mi te yu kon na ini yu kownukondre”, sa kisi wan opobaka na grontapu na ini na paradeysi di o kon baka (Lukas 23:42). Den sma di psa Armageddon libilibi èn den trawan di e libi dan, sa kisi na grani fu bari en wan switi odi te a dray kon baka fu dede. Den sa gi en leri dorodoro fu na Kownu, Yeyses Krestes, di o tiri na a ten dati, di tapu 14 Nisan fu na yari 33 G.T a ben sori so wan dipi firi gi en.
17 Masra Yeyses Krestes sa memre en seyker na wan ten fu en dusun yari tiri. A no de fu taki taki na ogriman di ben firi gi Yeyses èn di sa opo baka na dede sa sori warderi gi na kownu, Yeyses Krestes di e tiri. A abi fu taki Yeyses tangi fu na opobaka fu en fu di a o buweysi en kotrowfasi gi na a Universele Soeverein, Yehovah Gado. Dan den sa feni en warti fu nyanbun fu têgo fu na libi na ini wan paradeysi nyun grontapu makandra nanga tra pisi fu a libismafamiri di kon bun baka èn di e gi yesi.
Na libi na ini na dyari fu Eden, di o kon baka na a heri grontapu
18. Fa na libi sa de na ini a paradeysi di o kon baka?
18 Na ini na paradeysi di o kon baka ala sma sa de mati fu makandra. Te na ini a moro dipi pisi fu na sili ibriwan sma sa firi en srefi wan nanga na famiri na a heri grontapu. Ala sma e frustan makandra. Den e taki wan gemeenschappelijk tongo na a heri grontapu, seyker kande na fosi tongo fu libisma, di ibriwan sma ben taki na ini na ten fu den fosi 1800 yari fu a libisma libi fu sensi den ben meki Adam na ini 4026 bifo G.T. te na a ten fu Peleg, (2269 - 2030 bifo G.T.), bika „na ini den dey fu en na grontapu [dati wani taki den sma di ben libi na grontapu] ben kon prati” (Genesis 10:25; 11:1). Ibriwan sma e prisiri na ini na grani fu libi èn ibri nyun dey den e gi odi nanga grantangi fu na dey ede di poti a tapu fu libi. Swakifasi na skinsey no e gro te a ten a psa gwe safrisafri. Den krakti fu skin e kon moro tranga èn a skin no e kon weri. — Teki gersi nanga Yob 33:25.
19. San sma sa kon si fu den sma di ben malengri fositen?
19 En luku pikinso! Den sma di ben malengri wan dey, e waka, iya, den e dyonpo fu prisiri. Sma di ben lasi anu nanga bonfutu kisi den baka nanga yepi fu wan wondru. Den di ben breni fositen, e si, den dofuwan e yere, den babaw-wan e taki èn e singi soso fu prisiri ede. (Teki gersi nanga Yesaya 35:5, 6.) Libisma no sa abi wan takru sortu skin ofu wan malengri skin. Na fasi fu man nanga uma sa de tumusi moy ini balansi nanga makandra (Genesis 2:18). Libisma volmaaktifasi e gi Yehovah Gado, na Mekiman fu na volmaakti libisma skin, grani.
20. San sma sa kon si fu den natuurkrakti, den nnyan voorraad, den meti èn na fasi fa sma sa kobroyki grontapu?
20 Na heri grontapu e tron wán presi fu moyfasi na ala sey. Fu no wan enkri pisi fu na grontapu nyunsu sa kon fu drey ofu sibibusi alen di e pori sani, bigi winti, orkaan, nanga den sortu sani dati. (Teki gersi nanga Markus 4:37-41.) Ala krakti fu na natuur e tyari kon ini volmaakti balansifasi fu meki na heri grontapu tron wan moy tanpe. No wan presi sa abi mankeri fu nnyan bika grontapu sa gi en froktu dorodoro (Psalm 72:16). Libisma nanga meti na a heri grontapu sa prisiri na ini vrede nanga seykerfasi precies so leki Yehovah e taki: „Sma no sa du nowan ogri èn no sa pori sani tapu heri mi santa bergi” (Yesaya 11:9; luku so srefi tu vers 6-8). Na a fasi disi grontapu sa meki kon tron wan tumusi moy presi pe sma kan libi èn kan anbegi èn dini Yehovah Gado, na Mekiman èn Eyginari fu grontapu. Fu di grontapu nanga leti de fu Gado leki Mekiman, meki nanga reti sma musu kobroyki grontapu tapu wan fasi di e prisiri en èn di e gi en grani. — Teki gersi nanga Yesaya 35:1, 2, 6, 7.
21. Fa na libismafamiri di bay kon fri sa si ala sani na grontapu, èn sortu poku den sa yere?
21 Verfrissend nyun — na so ala sani na grontapu sa de gi den libisma di bay kon fri èn di noyti ben de na ini na paradeysi dyari fu Eden, pe na libi fu libisma ben bigin na ini tumusi moy volmaaktifasi! (Openbaring 21:5) Fa yu sa yere wan tumusi moy poku, nanga instrument èn nanga sten — poku di soso sa de gi Yehovah fu preyse en! — 1 Kronieken 23:4, 5; Psalm 150:3-6.
22. Fa yu o feni en fu libi na ini na paradeysi fu na nyun grontapu?
22 Fa a sa de wan tumusi moy sani na grontapu fu libi, pe sma sa kan prisiri na ini na heri furu libi fu libisma èn pe ala fasi fu na proces fu dede di yu kan tyari go baka te na a fosi sondu fu Adam, sa puru na pasi! (Teki gersi nanga Yohanes 10:10.) Iya, a sa de wan grontapu pe ibri libisma mekisani di den feni bun sa sori na prenki èn na fasi fa Yehovah Gado de, di den ben meki a fosi libisma Adam nanga den! (Genesis 1:26, 27) Na grontapu no sa de moro wan maka na ini na ay fu den serafs, den cherubs nanga den tumusi moy engri fu heymel. Te den sa poti den lobi fesi go na a sey fu na paradeysi moyfasi di de lontu a grontapu èn meki den ay psa a tapu dan soso preyse nanga tangi den sa tyari kon na fesi gi na Sma di den abi na grani fu kan si en langalanga — Yehovah, na Universele Soeverein. — Mateyus 18:10.
Wan koloku tamara sondro kba
23. San ben kan de a tori nanga den salfu kresten, èn nanga sortu bakapisi gi den sma di e libi tapu an grontapu paradeysi?
23 A de na inisey fu san kan èn a no de wan sani di no de seyker taki tapu wan dey na ini na ten di e kon na nen fu ala salfu kresten di ben meki si a „kari nanga frukisi fu den” fu go na a heymel kownukondre de fasti èn di kisi blesi fu di den kisi na bovennatuurlijk opobaka disi, sa poti alamala na ini buku fu na libismafamiri na ini a grontapu paradeysi sabi disi (2 Petrus 1:10: Psalm 87:5, 6). Na so fasi ala sma sa frustan krinkrin èn abi satisfaksi taki den 144.000 salfu disipri fu Yeyses Krestes di wiki nanga santa yeye no de moro na ini na grontapu paradeysi so taki ala sma nanga den heri ati sa kan prisiri nanga den èn makandra nanga den.
24. (a) San Yehovah sa meki kon tru fu en „futubangi”? (b) Fa wi sabi taki na nyun grontapu noyti sa kon na wan kba èn sortu profeyti singi sa kon tru?
24 Koloku na tamara sondro wan kba sa de gi ala sma di e tan gi den srefi sondro fu stòp na Yehovah, na tumusi bun Soeverein fu heri na universum. Na paradeysi grontapu di furu nanga sma na wan switi fasi sa de wan bun presi, wan presi di warti fu kisi preyse, leki „futubangi” pe Gado futu, fu taki en na gersi fasi, kan rostu. Iya, te ini ala têgo ten Yehovah sa meki ’na presi fu en futu’ kon moy, èn na heri libismafamiri sondro fu seki, sa saka na en ondro! (Mateyus 5:34, 35; Tori fu den apostru 7:49). Na nyun grontapu sa de wan grontapu sondro wan kba, bika „na a kownu tirimakti psa marki èn na a vrede wan kba no sa de” (Yesaya 9:7). Dan na profeyti singi di na ipi engri fu heymel ben singi, di Yeyses ben koboru na ini 2 bifo G.T. na ini Bètlehem na ini Yudea, sa kon tru: „Glori ini den moro hey pesi na Gado èn na grontapu vrede a mindri sma fu bun wani.” — Lukas 2:43, 44.
25. (a) San den sma di de fu na ’bigi ipi’ „tra skapu” e warderi now? (b) San musu de na tranga winsi fu wi?
25 Den sma di de fu na „bigi ipi” „tra skapu” fu na tumusi bun herder, e warderi na elektrik pramisi taki na paradeysi sa kon baka. A de na grani fu den na ini na ten disi fu tay hori na Yehovah organisâsi èn fu de fayafaya nanga na wroko di Masra Yeyses Krestes ben taki na fesi di a ben taki taki na bun nyunsu fu na Kownukondre sa preyki na a heri grontapu pe sma e libi leki wan lasti kotoygi (Mateyus 24:14; Markus 13:10). Leki Yehovah Kotoygi a de wi opregti èn tranga winsi fu kibri wi soyfri retifasi na ini ala têgo ten sondro flaka na ondro na tiri fu Gado wan enkri koboru Manpikin, na Kownu Yeyses Krestes, fu na têgo glori èn poti reti fu na universele soeverein, Yehovah Gado. „Halleluya!” — Openbaring 19:1, 3, 4, 6, Statenvertaling; Odo 10:9.
San yu ben sa piki?
◻ San Yehovah ben du nanga a pramisi fu en na ini a tori fu en agersi futubangi, na grontapu?
◻ Suma sa yepi fu meki na paradeysi kon baka?
◻ Na mindri fu suma na Kownu, Yeyses Krestes, sa teki ’granman poti na a heri grontapu’?
◻ Sortu ondrofenitori di e seki na ati yu kan kisi te na opobaka o feni presi?
◻ Sortu tamara e wakti den sma di e tan gi den srefi na Yehovah sondro fu stòp?