Bijbel e kenki sma libi

FA WAN yongu uma di ben ondrofeni sari sani di a ben pikin, kon de koloku trutru? San meki taki wan man di ben opo ensrefi teige a politiek sistema, tron wan safri-ati preikiman fu a bun nyunsu? Leisi den tori disi fu kisi piki tapu den aksi dati.

„Mi ben wani taki sma lobi mi èn taki den sori switifasi gi mi.”​—INNA LEZHNINA

A GEBORE NA INI 1981

KONDRE: ROSIAKONDRE

A BEN DE WAN SMA DI ONDROFENI SARI SANI

A LIBI FU MI FOSI: Mi dofu sensi mi gebore èn mi papa nanga mama dofu tu. Den fosi siksi yari fu mi libi ben switi. Ne mi papa nanga mama broko trow. Aladi mi ben pikin ete, toku mi ben e frustan san a wani taki te sma broko trow, èn mi ben e sari srefisrefi. Baka di den broko trow, dan mi papa nanga mi bigi brada tan na ini Troitsk, ma mi mama froisi go na Chelyabinsk èn a tyari mi go nanga en. Baka wan pisi ten a trow baka. Mi kwekipapa ben de wan sopiman èn a ben gwenti fon mi nanga mi mama.

Na ini 1993, mi lobi bigi brada dede na watra. Mi famiri no ben man bribi srefisrefi san pasa. Mi mama bigin dringi sopi, èn neleki mi kwekipapa a bigin libi takru tu nanga mi. Mi bigin suku wan moro bun libi. Mi ben wani taki sma lobi mi èn taki den sori switifasi gi mi. Mi bigin go na difrenti kerki fu suku trowstu, ma mi no ben man feni trowstu.

A FASI FA BIJBEL KENKI MI LIBI: Di mi ben abi 13 yari, dan wan pikin na ini mi klas, wan Kotoigi fu Yehovah, fruteri mi wan tu tori fu Bijbel. Mi ben lobi den Bijbel tori fu sma soleki Noa nanga Yob, di ben e dini Gado aladi den ben de na ini muilek situwâsi. Heri esi mi bigin studeri Bijbel nanga den Kotoigi èn mi bigin go tu na den konmakandra fu den.

Di mi ben e studeri Bijbel, dan mi kon leri furu moi tru tori. A naki mi ati di mi kon sabi taki Gado abi wan nen (Psalm 83:18). Mi no ben man bribi o soifri Bijbel ben taki fu den sani di ben o pasa na ini „den lasti dei” (2 Timoteyus 3:1-5). Èn mi ben breiti srefisrefi di mi kon sabi fu na opobaka howpu. Denki a tori, mi ben o si mi brada baka!​—Yohanes 5:28, 29.

Ma a no ala sma ben breiti leki mi. Mi mama nanga mi kwekipapa no ben lobi Yehovah Kotoigi kwetikweti. Den pruberi fu dwengi mi fu tapu nanga a Bijbelstudie. Ma mi ben lobi den sani di mi ben e leri èn mi ben abi a fasti bosroiti fu no tapu nanga a studie.

A no ben makriki gi mi di mi osofamiri ben e gens mi. Wan tra sari sani di miti mi, na taki mi pikin brada di ben gwenti go nanga mi na den konmakandra fu Yehovah Kotoigi, dede na watra tu. Ma ala ten den Kotoigi ben de drape fu yepi mi. Na den sma disi mi feni a lobi nanga a switifasi di mi ben angri fu ondrofeni mi heri libi langa. Mi ben sabi taki disi ben musu fu de a tru anbegi. Na ini 1996, mi teki dopu èn mi tron wan Kotoigi fu Yehovah.

DEN WINI DI MI KISI: Siksi yari kaba, mi trow nanga wan bun man di nen Dimitri. Mi nanga en e dini na a bijkantoro fu Yehovah Kotoigi na ini St. Petersburg. Te fu kaba, mi papa nanga mama no ben e denki so takru moro fu a bribi fu mi.

Mi breiti so te taki mi sabi Yehovah! Mi de koloku trutru fu di mi e dini en.

„Furu aksi ben e dangra mi.”​—RAUDEL RODRÍGUEZ RODRÍGUEZ

A GEBORE NA INI 1959

KONDRE: CUBA

A BEN DE WAN SMA DI BEN E OPO ENSREFI TEIGE A POLITIEK SISTEMA

A LIBI FU MI FOSI: Mi gebore na ini Havana, Cuba, èn mi gro kon bigi na ini wan pôti birti pe sma ben gwenti feti na strati. Di mi ben e gro kon bigi, dan mi kon lobi judo nanga tra sortu feti-sport.

Mi ben man leri bun na skoro, èn mi papa nanga mama gi mi deki-ati fu go na wan heiskoro. Di mi ben de na a heiskoro, dan mi bigin feni taki a politiek sistema fu a kondre fu mi ben musu kenki. Mi bosroiti fu opo misrefi teige a politiek sistema. Mi nanga wan skoromati fu mi feti nanga wan skowtu fu di wi ben wani teki a gon fu en. Na ini a feti dati a skowtu kisi bigi mankeri na en ede. Mi nanga a mati fu mi ben musu koti strafu gi a sani dati èn krutubangi bosroiti taki wi ben musu kisi dedestrafu. Den ben o sutu wi kiri. Na 20 yari nomo mi ben abi, dan mi ben musu dede kaba!

Mi ben de mi wawan na ini a strafu-oso kamra fu mi, èn mi ben e oefen fa mi ben o du te den ben o poti mi tanapu fu sutu mi kiri. Mi no ben wani sori taki mi frede. Ma na a srefi ten, furu aksi ben e dangra mi. Mi ben e aksi misrefi: ’Fu san ede so furu kruktudu de na grontapu? A libi disi na ala san de?’

A FASI FA BIJBEL KENKI MI LIBI: Te fu kaba, den kenki a dedestrafu fu wi kon tron wan strafu fu 30 yari. Na a ten dati mi miti wan tu Kotoigi fu Yehovah di ben de na strafu-oso fu a bribi fu den ede. A ben naki mi ati fu si fa den Kotoigi ben abi deki-ati èn fa den ben lobi meki freide. Aladi den ben musu koti strafu sondro taki den ben du wan ogri, toku den no ben de nanga atibron èn den no ben abi bita-ati.

Den Kotoigi leri mi taki Gado abi wan sani na prakseri gi libisma. Den sori mi na ini Bijbel taki a o kenki a grontapu fu wi kon tron wan paradijs pe ogridu nanga kruktudu no o de moro. Den leri mi taki grontapu o lai nanga bun sma di o abi na okasi fu libi fu têgo sondro taki den e kisi fu du nanga problema.​—Psalm 37:29.

Mi ben lobi den sani di mi ben e leri fu den Kotoigi, ma mi ben de heri tra fasi leki den. Mi ben denki taki mi no ben o man libi sondro fu teki sei na ini politiek afersi, èn taki mi no ben o man hori misrefi fu no du ogri nanga den wan di ben e du ogri nanga mi. Sobun, mi bosroiti fu leisi Bijbel sondro taki sma yepi mi. Di mi kaba leisi a Bijbel, mi kon frustan taki Yehovah Kotoigi na den wan-enkri sma di e tyari densrefi leki tru Kresten.

Fu di mi ben e studeri Bijbel, meki mi kon frustan taki mi ben musu tyari wan tu bigi kenki kon na ini mi libi. Fu eksempre, mi no ben musu taki dotitaki moro, fu di a sani dati ben tron wan gwenti gi mi. Mi ben musu tapu tu nanga smoko. Boiti dati mi no ben musu teki sei moro na ini politiek afersi. A no ben makriki gi mi fu tyari den kenki dati kon, ma fu di Yehovah yepi mi, meki safrisafri mi ben man du dati.

Ma wan fu den moro hebi sani gi mi, ben de taki mi ben musu leri fu no atibron so esi. Te nanga now mi e begi Gado fu yepi mi nanga a sani dati. Wan fu den Bijbeltekst di de wan bigi yepi gi mi, na Odo 16:32, di e taki: „A sma di ati no e bron esi betre moro wan tranga man èn a sma di man hori ensrefi, betre moro a wan di e teki wan foto abra.”

Na ini 1991, mi dopu èn mi tron wan Kotoigi fu Yehovah. Den dopu mi na strafu-oso, na ini wan bari nanga watra. A yari baka dati, den lusu mi nanga wan tu tra strafuman èn den seni wi go na Spanyorokondre fu di wi ben abi famiriman drape. Di wi doro na ini Spanyorokondre, dan wantewante mi go na den konmakandra fu Yehovah Kotoigi. Den Kotoigi drape gi mi wan switikon neleki den ben sabi mi bun langa kaba, èn den yepi mi tu fu bigin wan nyun libi.

DEN WINI DI MI KISI: Mi na wan koloku man, èn mi e dini Gado makandra nanga mi wefi nanga den umapikin fu wi. Mi abi a grani fu gebroiki furu fu mi ten fu yepi trawan fu kon sabi Bijbel. Son leisi mi e prakseri a yonguman baka di ben de fu dede, èn mi de nanga tangi taki mi kisi so furu blesi sensi a ten dati. Boiti taki mi de na libi, mi abi wan howpu tu. Mi e fruwakti a Paradijs di Gado pramisi wi, iya, a ten te retidu o de fu ala ten èn te „dede no o de moro”.​—Openbaring 21:3, 4.

[Prenspari pisi na tapu bladzijde 19]

„A naki mi ati di mi kon sabi taki Gado abi wan nen”

[Prenki na tapu bladzijde 20]

Mi nanga mi masra e prisiri fu prati buku nanga tra sani di dofusma kan gebroiki