Go! Meki discipel
1, 2. (a) Fa den wortoe „te na den moro farawe pisi foe grontapoe” baka wan pisi ten ben sa kisi wan njoen bigi? (b) Fa Jezus ben sori dati na kristen komando foe gi kotoigi, no ben sa kon na wan kaba nanga den fosi kristensma?
TE JOE loekoe na ten èn den kondre, dan Jezus adjosi-komando foe de kotoigi na a kaba foe na grontapoe, soleki tanapoe ini Tori foe den Apostel 1:8, no ben kon na wan kaba nanga den fosi kristen. Den ben doe wan toemsi moi wroko foe meki na „boen njoensoe” bekenti ini „a eri grontapoe” foe den ten, ofoe „ini na heri mekisani di de ondro hemel”, so fara leki den ben kan (Kol. 1:5, 6, 23). Ma o moro fara na ten ben sa pasa, dan den wortoe dati ben sa kisi wan njoen bigi, foedi den soema di e kon moro foeroe panja densrefi tapoe den siksi continent nanga foeroe tabiki, letterlijk „te na den moro farawe pisi foe grontapoe”.
2 Jezus ben sabi disi boen. Foe na boen foe ala en discipel, soboen no soso den fosi-eeuw kristen, ma ala kristensma ini ala den hondro-hondro jari, èn spesroetoe den kristensma dati, di ben sa de na a ten foe „a besroiti foe na seti foe sani”, na Kristus di ben opo foe dede ben taki:
„Ala makti ini hemel nanga tapoe grontapoe gi na mi. Go foe datede èn meki discipel foe sma foe ala naatsi, dopoe den ini na nen foe na Tata èn foe na Manpikin èn foe na santa jeje, èn leri den foe hori ala san mi ben komanderi joe. Èn loekoe! mi de nanga joe ala dé te na besroiti foe na seti foe sani.” — Matt. 28:18-20.
3. Sortoe wroko salfoe kristensma, ben moe doe, akroederi wan sabiman?
3 Djaso de gi den sma di abi disi fanowdoe wan bewijsi dati na komando di Kristus gi en discipel tapoe a dé di a opo go na hemel, no ben kontroe krinkrin ini na fosi eeuw. Na kontroe foe na komando ben sa tan go doro te na a „besroiti foe na seti foe sani”. Nanga soema? Na moi sani dati professor F.F. Bruce e skrifi foe Tori foe den Apostel 1:8: „Soleki Jezus srefi na En dopoe ben salfoe nanga santa jeje èn nanga krakti, na so den foetoeboi foe en now ben sa salfoe a srefi èn ben sa kan foe doe En wroko. A wroko disi ben sa de foe gi kotoigi — wan thema di ini heri Tori foe den Apostel e kon krin na fesi ini den préki foe den apostel (teki gersi kapitel 2:32; 3:15; 5:32; 10:39; 13:31; 22:15, enz.) Wan owroetestamenti proféti ben kari Israël foe de Gado kotoigi ini a grontapoe (Jes. 43:10; 44:8). Na wroko di Israël leki naatsi no ben doe, Jezus, leki volmaakti Knekti foe Masra, ben teki doe èn a ben gi dati na en discipel.”
4. Sensi oten na fikapisi ben doe na komando disi èn foe sainde wan bigi bribi de fanowdoe foe disi?
4 Ja, na komando foe de kotoigi te na a kaba foe grontapoe èn ini a „besroiti foe na seti foe sani” disi foe meki discipel foe ala naatsi, ben gi na a salfoe fikapisi foe jeje Israël, den sma di makandra de Jehovah „knekti” èn en „kotoigi” (Jes. 43:10-12). Spesroetoe sensi 1919 den doe getrow na komando disi. Ma fa den wantoe doesoen kristen disi di ben salfoe nanga jeje ben sa miti den miljard miljard soema di „panja te na a moro farawe pisi foe grontapoe”? Fa wan bigi bribi ben de fanowdoe foe loekoe srefi foe doe so wan wroko!
5. Nanga sortoe jepi, disiten kristensma ben gi kotoigi meki a wroko panja go „te na a kaba foe grontapoe”?
5 Te joe lési ete wan tron na disten historia foe Jehovah Kotoigi, dan joe sa si dati na prati foe tijdschrift, namkoe Na Wachttoren nanga na sisa tijdschrift Ontwaakt!, ben de den moro prenspari wrokosani, di gebroiki foe panja na kownoekondre-boskopoe na ala sé. Letterlek miljard miljard foe den tijdschrift disi di didon tapoe na bijbel ini moro hondro tongo ben panja te na den moro farawe oekoe foe na grontapoe.
„LEGRE FOE ASI”
6, 7. (a) Fa na salfoe fikapisi ini Openbaring kapitel 9 de na agersi fasi, èn san den abi ini den makti? (b) San den disi e agersi? (c) Sortoe commentaar na boekoe „Dan na kibritori foe Gado kon na wan kaba” e taki foe a tori disi?
6 Ini Openbaring kapitel 9, na salfoe fika-pisi na agersifasi e de leki „fo èngel” ofoe boskopoeman di komoto foe katibo foe Babylon na Bigiwan, „na a bigi liba Eufraat” (den vers 14, 15). Den boskopoeman disi di kon fri abi „legre foe asi” ini den makti. A nomroe foe den asi de „toe myriade tron myriade”, ofoe 200 miljoen, èn den e gebroiki foe „kiri” na agersi fasi wan bigi pisi foe na libisma-famiri (den vers 16-19). Den „asi” ini a visioen disi e agersi den wrokosani di na salfoe fikapisi e gebroiki foe meki Jehovah kroetoe-boskopoe bekenti. Den boskopoe disi de moro spesroetoe gi na kristenheid, na moro prenspari pisi foe „Babylon na Bigiwan” (na grontapoe makti foe falsi religie).
7 Na moi visioen disi e tjari kon na krin ini na boekoe „Dan na kibritori foe Gado kon na wan kaba”, pe wi e lési: „Na ros foe den agersi ’asi’ disi kon moro tranga di sma ben bigin pristeri den tijdschrift foe na Wachttorengenootschap na strati, oso foe oso èn wenkri foe wenkri.” (Blz. 286). Aladi di den agersi „asi” disi de sosrefi toe boekoe, brochure nanga tract, tog den tijdschrift soboen ben abi wan bigi pisi na a panja foe na Kownoekondre-kotoigi „te na a moro farawe pisi foe grontapoe”, èn disi de te now ete so.
8. Fa a salfoe fikapisi ben gi jesi toe na Kristus komando foe meki discipel?
8 Na salfoe fika-pisi no wawan ben tjari den „agersi asi disi nanga dekati go tegen den fortresi foe falsi religie ma a ben poti prakseri toe tapoe Kristus komando foe „meki discipel foe ala naatsi èn dopoe den”. Sensi 1935 moro nanga moro sma ben lési den kroetoe-boskopoe di ben de tegen na grontapoe-makti foe falsi religie. Den ben gi jesi na a komando foe Gado „foe komoto foe na Bigi Babylon” (Openb. 18:1-4). Den ben gi densrefi abra na Jehovah èn den kisi dopoe ini na nen foe na Tata èn foe na Pikin èn foe na santa jeje”. Foedi densrefi ben kisi jepi nanga na Wachttoren èn Ontwaakt!, dan den ben moksi densrefi nanga na salfoe fika-pisi foe panja den toemsi moi tijdschrift disi alape, „te na a kaba foe grontapoe”. — Jes. 49:6.
JOE DE WAN FAJA PRÉKIMAN FOE NA „BOEN NJOENSOE”?
9. Sortoe prekti ibri kristen abi sondro foe joe poeroe wan na ini?
9 Na komando foe de kotoigi „te na a moro farawe pisi foe grontapoe” èn foe „meki discipel foe sma foe ala naatsi”, de gi ala sma di taki dati den de kristensma. Ala kotoigi foe Jehovah foe datede dipi na inisé, nanga den eri ati, moe teki na faste besroiti foe teki prati na a doe foe na blesi komando dati.
10. (a) San den memre foe na „bigi ipi” moe hori ini prakseri? (b) Ma sortoe fasi son sma ben teki?
10 Efoe joe de now wan pisi foe na „bigi ipi sma” di Openbaring 7:9-17 skrifi foe en, hori dan ini prakseri, dati joe „moe tan taki” foe „komoto foe na bigi benawtoe”: „Ferloesoe wi abi foe taki tangi na wi Gado, di sidon tapoe na troon, èn nanga foe na Lam”, aladi joe no moe tapoe „dé nanga neti foe doe santa diniwroko gi en ini en tempel”. Ini na laatste ten son sma ben abi na fasi dati a ben de nofo foe de wantron ini wan jari tapoe na Memrefesa foe memre na dede foe Kristus, foe tan bij nanga na bijbelsabi di e go na fesi te joe e lési den boekoe foe na Wachttorengenootschap, foe go wawan tron na konmakandra èn foe meki den leti skijn te den e libi wan boen libi èn foe wawan tron gi kotoigi efoe na okasi foe disi ben sa kon.
11. Na kristen komando kan doe te soso wan sma libi wan boen libi, ofoe fa disi moe de tra fasi?
11 Ma disi de nofo? Fa na kristen kotoigiwroko ben kan gi „te na a moro farawe pisi foe grontapoe” efoe den fosi kristensma èn den memre foe na disiten salfoe fikapisi ben tan pe den ben de èn libi soso wan boen libi? Foe „ben meki discipel foe sma foe ala naatsi”, den ben moe GO! fosi. Ja, den ben moe waka go èn gi kotoigi „oso foe oso” èn „ini den oso” (Tori foe den Apostel 5:42, Nieuwe Wereldvertaling; Willibrordvertaling). Na publiki kotoigiwroko disi de wan pisi di no kan misi foe wi „santa dienst”.
12. San son sma frigiti kande, èn foe sanede den disi e kisi trangaskin?
12 Fa a de nanga joe? Joe de wan Kownoekondre-prékiman di abi inisé prisiri foe meki bekenti na „boen njoensoe” èn sosrefi toe Jehovah kroetoe, èn meki gebroiki foe den agersi „asi” spesroetoe den tijdschrift foe na Genootschap? Efoe joe ben go doe en safrisafri ofoe srefi ofoe ben tapoe srefi srefi nanga na wroko, disi doe kon dan, foedi joe ben lasi na ai den jeje betekenis foe den sortoe activiteit disi, namkoe dati joe e jepi na salfoe fika-pisi nanga dati foe doe na komando foe „bari tranga na jari foe boen wani foe na sé foe Jehovah èn na dé foe refrensi foe na sé foe wi Gado”? (Jes. 61:1, 2, 5) Dan a de ten now dati joe go ondrofeni baka na prisiri dati, te joe e go de druk bezig nanga Jehovah dienst.
JOE ABI MOEITI FOE TAKI?
13, 14. (a) Foe sanede son sma ben hori densrefi a baka kande foe gi kotoigi oso foe oso? (b) Sortoe praktis rai e gi foe jepi wini na sjen-sjen foe den?
13 Kande joe e feni en moeilek foe go oso foe oso foedi joe no kan taki so grati. Ofoe kande joe de den foeroe miljoen sma di e feni en prisiri foe lési den tijdschrift foe na Genootschap èn foe konmakandra nanga Jehovah Kotoigi ini den Koninkrijkszaal foe den, ma di noiti ete teki prati na a oso-foe-oso-kotoigiwroko, foedi den frede taki, den no sa sabi san den moe taki. Joe sabi boen-boen dati a kotoigiwroko moe gi „te na a moro farawe pisi foe grontapoe” èn dati sma „foe ala naatsi” moe meki tron discipel, ma joe no e feni joesrefi bekwaam nofo foe taki nanga sma na den doromofo. Joe sabi dati joe ben sa moe doe disi èn joe e miti den marki foe na bijbel, ma joe e prakseri dati joe no kan. Joe ati foeroe nanga waarderi foe Gado Wortoe, ma joe foetoe e wégri gewoon foe tjari joe go na a fosi doro dati, foedi joe frede, dati joe mofo boeba no sa feni den wortoe di joe abi fanowdoe. San joe kan doe nanga disi?
14 Joe ben sa kan teki fosi joe bijbel ini joe anoe èn joe kan lési agen Romeini 10:8-15. Dati sa meki joe dansi foe di joe no abi pasensi foe go foe „meki na boen njoensoe bekenti”. Begi Jehovah moro fara foe krakti — ja, begi „na en di e gi krakti” (Fil. 4:13; teki gersi Tori foe den Apostel 1:8). Èn aksi na tra tron dati joe go baka na a koninkrijkszaal ofoe joe go na a gemeente boekoestudie foe joe ofoe wan foe den owroeman wani tjari joe kon ini contacti nanga wan Kotoigi di abi nofo ondrofeni kaba foe meki na „boen njoensoe” bekenti oso foe oso. Na Kownoekondre prékiman disi no sa froewakti dati wantronwantron foe sensi a bigin joe go taki nanga den ososma. Kande a sa taki dati oen toe sma teki ten pikinso foe loekoe den laatste nomroe foe Na Wachttoren nanga Ontwaakt! bifo oenoe go makandra oso foe oso foe pristeri den toemsi moi tijdschrift disi.
15. Foe sanede na tijdschriftwroko de wan moi fasi foe kisi ondrofeni ini na gi kotoigi oso foe oso èn a opo foe bijbelstudi?
15 Gi kotoigi nanga jepi foe tijdschrift de wan moi fasi foe bigin ofoe de actief agen nanga na préki èn meki discipel. Sondro degedege a de wan foe den moro koemakriki èn moro boen fasi fa joe kan go na mindri den sma foe kisi ondrofeni ini na gi kotoigi ini na oso foe oso wroko. Ibri njoen nomroe e gi njoen tori foe takimakandra. Te boiti dati joe go baka na ibri soema di teki wan tijdschrift, dan ini wan sjatoe pisi ten joe sa abi wan lijst foe soema di joe kan fisiti nanga laatste nomroe. Safri safri joe sa leri sabi den sma disi. Wan rubriek soleki „Joe ben aksi joesrefi oiti . . . ? (ini Ontwaakt!) sa jepi joe foe bigin wan takimakandra èn srefi foe opo wan bijbelstudi. Lési na fosi paragraaf gi na ososma èn aksi na fosi aksi di druk (ondrotitel) — aladi joe e gi na sma na okasi foe gi piki — bifo joe lési na tra paragraaf èn kande lési tekst di poti drape. Aksi dan na tra aksi (ondrotitel) èn go so langa doro leki na ososma abi ten. Joe sa froewondroe foe na prisiri nanga na tevréden fasi di joe sa kisi te joe doe alaten so wan „santa dienst” gi Jehovah. — Openb. 7:15.
JONGOE KRISTENSMA, MEKI DEN „ASI” KON INI BEWÉGI
16. Sortoe tekst e sori dati jongoe kristen de ini na tori?
16 Na frantwortoe foe de „kotoigi te na a moro farawe pisi foe grontapoe” de tapoe ala kristensma, tapoe jongoe- nanga owroewan. Na profétis Psalm 110 e taki foe Kristus:
„Na tiki foe joe tranga Jehovah sa seni komoto foe Sion, taki: ’Go na mindri joe feanti foe poti den na joe ondro.’ Joe pipel sa presenteri densrefi nanga den eri ati tapoe na dé foe joe sroedatimakti. Ini na moifasi foe na santa fasi, foe na bigin foe débroko, joe abi leki joe kompe jongoe man ne leki dowdropoe” (Ps. 110:2, 3).
Wan tra psalm foe na Messias e taki foe „wenke” di sa de „mati” foe na bruid foe Kristus (Ps. 45:13, 14). Den toe pisi disi de kon troe tapoe na salfoe fikapisi èn tapoe na „bigi ipi”, di oenoe, „jongoe man” nanga „wenke” de wan pisi foe en letterlek. Oenoe sosrefi toe soboen moe „presenteri oensrefi nanga oen eri ati” èn de loyaal „mati” foe den wan di tan abra foe na salfoe bruid-klasse di de ete na grontapoe èn di den „fo engel” di e tjari den „legre foe asi” tegen Satan grontapoe makti, e agersi. — Openb. 9:15-19; 21:2, 9.
17. Fa foeroe jongoe man nanga oema e doe „santa dienst” leki wan eksempre?
17 Foeroe foe den jongoe man nanga oema e doe „santa dienst” tapoe na ede-kantoro foe Jehovah Kotoigi ini Brooklyn (Amerkankondre) èn tapoe den 97 bijkantoro di de tapoe na heri grontapoe. Drape den e doe nanga den heri ati difrenti wroko di abi foe doe wantronwantron nanga na meki klari èn seni gwe foe den agersi „asi” — boekoe di abi kroetoe-boskopoe na ini tapoe na tori foe na „dé foe refrensi foe na sé foe wi Gado” èn sosrefi toe foe tjari kon na krin waarheid di e gi trowstoe foe „na jari foe boen wani foe na sé foe Jehovah” (Jes. 61:1, 2). Ala den sma disi di de klari foe doe wroko, no wawan abi wan prati foe meki den „asi” klari foe gebroiki ini na veld, ma den e teki prati toe na a troetroe velddienst, pe den e meki gebroiki boen foeroe foe den sortoe „asi” disi, spesroetoe foe den tijdschrift.
18. (a) Fa tra jongoe kristen e sori dati den de faja kompe foe a fikapisi? (b) Fa na Kownoe nanga en „brada” e si na faja foe den?
18 Tra jongoe kristen „e presenteri densrefi nanga den heri ati” èn den e sori dati den de faja kompe foe na salfoe fikapisi foe doe wroko leki „pionier”, san wani taki dati moro pikinso den e gi doesoen joeroe ini wan jari na a publiki kotoigiwroko. Na Kownoe Jezus Kristus nanga en salfoe „brada”, di de ete na grontapoe, abi boen foeroe waarderi foe na faja foe ala den jongoe kristen disi. — Teki gersi Matteus 25:34-40.
19. Sortoe dekati e gi na ala tra jongoe kristen?
19 Ma moro „jongoe man” nanga „wenke” de ini den gemeente foe Jehovah pipel, foeroe doesoen-doesoen foe den. „Oen e presenteri oensrefi nanga oen heri ati tapoe na dé foe Kristus sroedati makti”? Ofoe oen e gi pasi dati den agersi „asi” e kon moro foeroe ini oen kamra ofoe e tan sondro foe gebroiki ini oen kotoigiwroko-tas? Meki den „asi” dati kon ini bewégi! Go baka oen skoroten, tapoe oen fri bakadina na a mindri foe na wiki (pe na regeling disi de), tapoe weekend èn ini den difrenti vakantie-ten di oen abi ini na heri jari, ini na velddienst. Na jepipionierdienst e gi oen wan moi okasi „foe presenteri oensrefi nanga oen heri ati” gi „santa dienst”. Èn na tijdschriftwroko de wan kristen fasi foe kotoigiwroko di fiti spesroetoe gi oenoe jongoewan. A de ini oen makti èn a kan tjari toemsi moi winimarki.
FAJA KOTOIGI TE NA A KABA
20, 21. (a) Sortoe komando Kristus ben gi na den fosi-eeuw kristen nanga den sma di e libi ini den „laatste dé”? (b) San e kon na krin ini san wan hé-leriman foe historia ben taki? (c) Fa Jehovah Kotoigi ben gebroiki den tijdschrift foe miti na marki disi?
20 Jezus ben taki gi den fosi kristen: „Oen sa de kotoigi foe mi . . . te na a moro farawe pisi foe grontapoe” (Tori foe den Apostel 1:8). Gi den kristen di e libi ini „den laatste dé” ofoe na „ten foe na kaba”, a ben taki na profétifasi: „Na boen njoensoe disi foe na kownoekondre sa préki tapoe na heri grontapoe leki wan kotoigi gi ala naatsi èn dan na kaba sa kon.” — Matt. 24:14; Dan. 12:4; 2 Tim. 3:1.
21 Na djoe hé-priester, wan gran-feanti foe den fosi kristensma, nanga sari ben erken: „Loekoe! . . . oen ben foeroe Jeruzalem nanga oen leri” (Tori foe den Apostel 5:28). Ini en boekoe These Also Believe (Den disi toe e bribi) Charles Braden skrifi leki hé-leriman ini historia-tori: „Jehovah Kotoigi ben wasi letterlek heri grontapoe nanga na kotoigiwroko foe den. . . . Ini waarheid, wi kan taki, dati no wan kerki groepoe foe grontapoe ini den moeiti foe den foe panja na boen njoensoe foe na kownoekondre ben sori moro faja nanga horidoro leki Jehovah Kotoigi.” Aladi na salfoe fika-pisi ini 1919 ben de soso wantoe doesoen sma, a ben teki na tjalansi. Nanga na krakti foe santa jeje èn nanga na jepi foe na „bigi ipi” foe mati foe den di e kon moro bigi, dan troetroe na „heri grontapoe den ben wasi letterlek nanga na kotoigiwroko foe den”. Foe 1919 te 1980 den kristensma disi ben panja moro leki 4.750.000.000 pisi foe Na Wachttoren nanga na Ontwaakt! (Fosi a ben nen Trowstoe).
22. San den troe tori e sori èn foe doe san wi alamala e kisi tranga foe datede?
22 Den toe toemsi moi tijdschrift disi ben de ini na ten di pasa èn de te now ete prenspari wrokosani foe gi kotoigi te na a kaba foe na grontapoe èn foe „meki discipel foe sma foe ala naatsi” (Matt. 28:19, 20). Den troe tori e sori alaten ete dati foeroe kotoigiwroko moe gi ete. Soboen, go tapoe oen „asi”, ala oen getrow kotoigi! Sorgoe dati den kan kon ini bewégi èn tan gebroiki den ini a „veld”, èn meki Jehovah blesi na moro faja gebroiki foe na Wachttoren nanga Ontwaakt! ini den dé di didon na wi fesi.
[Schema/Faki na tapoe bladzijde 125 di e tjari sani kon na krin]
Na prati foe boekoe foe na grontapoe activiteit
Jari Traktaat, Broch. Tijdschrift Boekoe Totaal
1879-
1917 419.078.170 (Tijds. de na ini) 9.894.056 428.972.226
1918 102.775 13.140 256.609 372.524
1919-
1980 2.322.888.592 4.767.784.340 450.642.739 7.541.315.671
Totaal 2.742.069.537 4.767.797.480 460.793.404 7.970.660.421