Pristeri na bun nyunsu — Fu di yu e pristeri abonnement fri èn sondro frede
1 Sondro degedege a de so taki Na Waktitoren de na moro bun beybristudi tijdschrift na grontapu. Yu abi na overtoygi taki disi de so? Efu a de so, dan ibri sma no ben sa musu kisi na okasi dan fu abonneer na en tapu?
2 Fa a leysi fu Na Waktitoren yepi yu srefi? Kande ibriwan fu wi kan fruteri fa na tijdschrift ben de wan yepi gi wi. Sonwan sa taki taki spesrutu nanga yepi fu dati wi prakseri poti na tapu san a ten disi pe wi e libi na ini wani taki. Ofu a yepi wi fu kon sabi san „den marki fu den ten” di meki den sma bruya nownow wani taki trutru (Mat. 16:3). Trawan ben sa kan tyari kon na fesi taki den feni trowstu na ini na bun nyunsu taki Gado Kownukondre dyonsro sa pori ala sma di e kwinsi den konpe libisma. Na Waktitoren fu sensi na bigin, moro leki 110 yari psa, hori baka gi a prakseri dati. Wi alamala kan taki sondro degedege taki na aparti beybri tijdschrift disi yepi wi fu bow bribi na ini na frulusu payman seti, di e gi onvolmaakti sma na okasi fu kisi têgo libi. Trawan musu kon sabi den waarheid disi tu.
NA ABI FU WAN POSITIEF LUKU
3 Ini Na Waktitoren den e poti krakti na tapu na koni fu Gado èn no tapu taki-go-taki-kon fu libisma (Yes. 55:8, 9). So wan koni ibri sma abi tumusi tranga fanowdu now. A kan kenki na libi èn yepi fu kweki yoysti buweygi fu ati. Disi de fanowdu fu ’tan a libi’ (Odo 9:1-6). Fu di wi abi na overtoygi fu disi, meki wi sa pristeri na abonnement na wan positief fasi, nanga na frustan taki wi abi san trawan abi fanowdu. Poti prakseri finifini tapu ibri tijdschrift fu feni pisi di leki fa yu denki kan de bun gi ososma. So wan sreka sa yepi yu fu sori wan positief yeye te yu e pristeri den tijdschrift na ini a diniwroko.
4 Sonwan kande abi na firi fu de negatief fu na pristeri fu abonnement. Den e hari na ososma kon na ini wan takimakandra, e taki srefi fu na Tori fu takimakandra èn e pristeri baka dati tu tijdschrift fu wan bijdrage fu Sƒ 1.–, na presi fu na abonnement. Fu san-ede? Na bijdrage de wan problema? Efu a de so, dan dati no de wan frustan fasi fu taki-go-taki-kon. Ala di na bijdrage gi na abonnement de so pikinso leki a kan te yu e agersi en nanga grontapu buku, dan te yu luku en bun a de fu soso te yu ben sa agersi en nanga a waarde di a abi gi na leysiman. De so bun positief èn pristeri na abonnement tapu Na Waktitoren fu soso Sƒ 12,– ofu pristeri en nanga a sisa tijdschrift Ontwaakt! fu soso Sƒ 24,–.
5 Wan sisa ben abi na fasti bosroyti fu sroto abonnement, fu dati a ben poti gi en srefi wan marki fu 50 na ini tu mun ten. Na ini na fosi mun a ben sroto 31 abonnement èn ala nanga ala 50 na ini tu mun. A ben fruteri taki te son sma no ben abi moni, ma toku ben wani na abonnement, a ben go dri ofu fo leysi baka bifo na ososma ben abi na moni na makandra. (yb89, blz. 60-61; luku so srefi Yaribuku 1990, blz. 47-49.) Na ini Yapan, pe na bijdrage fu wan yari abonnement e akruderi nanga wan sani fu Sƒ 28.–, den brada ben sroto moro leki 71.600 abonnement na ini oktober, wan nyun heymarki èn te yu ben teki en gersi nanga na srefi mun fu na yari a fesi wan gro fu 57 procent.
GO DORO NANGA FRI ÈN SONDRO FREDE
6 Wi abi ala reyde fu de fri sondro frede na ini wi diniwroko bika wi abi na yepi fu Yehovah (Tori. 14:3). Wan fu den moro prenspari wrokosani di Yehovah e kobroyki na ini na ten disi fu prati de bun nyunsu na Na Waktitoren. Te wi e sroto abonnement èn e tyari gobaka baka dati fu gi sma deki-ati fu leysi den tijdschrift, dan den fayafaya muyti fu wi kan kibri sma libi. Meki fu dati-ede wi pristeri den abonnement fayafaya èn fri sondro frede na ala den sma di wi sabi èn den wan di wi e miti na ini a velddienst.