Prati yeye gudu nanga trawan
1 Neleki na kotrow Moses, na so den disiten kotoygi fu Yehovah sabi taki na waarde fu den gudu na skinfasi fu na grontapu disi no man doro den bakafutu fu yeye gudu (Hebr. 11:26). Nanga moni yu kan bay oso, oto nanga tra gudu, ma libi, vrede fu yeye ofu taki Yehovah e feni yu bun èn a blesi fu en no de fu bay.
2 Sabi nanga frustan fu Gado Wortu èn prakseri de trutru yeye gudu (Kol. 2:3). Den spesrutu gudu disi kan gi wi trutru koloku, makandra nanga wan trutru howpu gi na tamara. Fa wi abi na grani taki wi kisi den sortu yeye gudu disi!
Fa wi kan gudu trawan
3 Wi kan yepi fu meki furu trawan kon gudu na yeyefasi fu di wi e meki den kon sabi Na Waktitoren, bika na tijdschrift dati kan tyari den go na „gudu di kibri” fu na koni fu Gado (Odo 2:4). Ini yuni wi sa pristeri wan abonnement tapu Na Waktitoren, na ibri okasi di fiti. Efu wi hori na prakseri fa Na Waktitoren meki wi libi kon gudu, dan wi no sa kikbak ma wi sa suku pasi fu pristeri furu tijdschrift na so furu sma leki wi man (Odo 3:27). Skrifi den nomru fu den oso pe yu prati tijdschrift ofu brochure, nanga na prakseri fu go drape baka èn tyari doronomo tijdschrift go, so taki yu e bow wan route gi yu srefi.
4 Fa wi kan de na yeyefasi leki na man fu Psalm 112 di ben frede Gado, di ben prati den warti sani fu en na ala sey? (Ps. 112:1, 3, 9) Wi musu suku den sma di gersi skapu èn yepi den fu lekti den yeye nowtu fu den (Mat. 5:3). Disi e aksi fu wi kobroyki ibri tyans fu preyki na tapu den ten di poti ofu na okasi.
5 Ini son kontren a preyki na bakadina ben tyari furu froktu kon, fu di na okasi bigi taki moro sma de na oso. Yu pruberi fu wroko oso-fu-oso na tapu wan bakadina na mindri wiki? Fu san-ede yu no ben sa meki fasti plan gi disi? A ben sa kan de wan sani di warti na muyti srefisrefi.
6 Yu kan gi kotoygi na yu wrokope, na tapu ten di fiti? Wan sisa ben poti difrenti tijdschrift tapu en skrifitafra so taki konpewrokoman di ben waka psa ben kan si den. Bifo na mmanten ben psa, a ben prati ala den tijdschrift. Furu fu den konpe wrokoman ben sori opregti belangstelling, èn a ben kan sroto 18 abonnement.
7 Solfru, gowtu èn ala tra gudu na skinfasi no man doro den bakafutu srefisrefi fu den yeye gudu fu sabi èn frustan fu sani, di wi kisi nanga yepi fu Yehovah organisâsi èn wi studi fu na beybri. Tru koloku, prisiri pasi, vrede, „langa libi” — srefi têgo libi — ala den sani disi opo gi den di e suku yeye gudu (Odo 3:13-18). Fu di wi e prati yeye gudu nanga trawan, meki wi e sori wi warderi gi san wi kisi, èn wi e kisi Yehovah blesi doronomo. — Odo 19:17.