Kon sabi den nyun kongres uitgave bun
1 Tu nyun uitgave, wan buku nanga wan brochure, moksi kon poti na a bigi maksin fu wi fu yeye nyanyan. Den nyun publikâsi disi di tyari kon na doro na a „Soifri tongo”-distriktkongres, seiker sa abi wan tranga krakti tapu wi preikiwroko èn boiti fu dati, den sa yepi wi alamala fu taki a soifri tongo srefi moro krin. — Sef. 3:9.
2 Di a kongres takiman ben tyari a nyun brochure kon na doro, a ben taki: „Furutron den e aksi wi na ini a preikiwroko fu san-ede wi no e teki brudu? Fu yepi yu fu piki na aksi dati, meki a de wan prisiri fu tyari na nyun brochure disi ini tijdschriftformaat kon na doro, Fa brudu kan frulusu yu libi? (Bakratongo)” Yu meki den tumusi prenspari bodoi na ini a brochure disi tron wan pisi fu yu, fu di yu e leisi en finifini? A prenspari taki yu du disi, so taki yu kan tranga yu eigi bribi èn fu man yepi trawan fu frustan na kresten fasi fu si sani na ini a tori fu brudu. — Tori. 15:28, 29.
3 Boiti fu dati, den bodoi na ini a brochure di abi bun buweisi leki fondamenti sa sreka yu morofara fu meki wan datra kon frustan yu fasi fu denki nanga winsi krin. Ma a brochure disi no meki na a fosi presi gi datra ofu afkati. A meki èn skrifi spesrutu gi a publiki. Yu kan si fa den tu marki fu a brochure disi e meki a tron wan trutru warti wrokosani di wi kan kobroiki na ini a ten disi. A ben sa bun fu abi wan ofu tu eksenplâr na yu na ini a preikiwroko. Kobroiki den warti bodoi disi heri bun — fu yu srefi kan abi winimarki fu en èn fu yepi trawan fu sori na yoisti respeki gi brudu.
WAN NYUN BUKU
4 Prakseri pikinso o warti na nyun buku A suku di libisma e suku Gado (Bakratongo) de, fu yepi unu na ini wi diniwroko. Te wi e studeri en, wi e kisi wan moro frustan fu tra relisi nanga den historia bakagron fu den. A sa yepi wi fu de moro bun srekasreka fu preiki gi sma fu a krestenhèit èn so srefi gi sma di abi wan tra kerki. Fu a go di bigi grupu fu pipri e go fu a wan presi go na a trawan na ini a di fu twenti yarihondro disi, meki na wi oso fu oso preikiwroko wi e miti kande sma fu furu difrenti tongo nanga relisi. Disi e tron wan trutru tyalensi efu wi no sabi den bribi overtoigi nanga gwenti fu den sma disi bun. Nanga a nyun buku disi leki yepi, a no de fanowdu fu wi abi na firi taki wi no sabi san wi musu taki te wi e miti sma nanga ala sortu kerki bakagron na ini wi gebied.
5 Den bodoi na ini a nyun buku disi abi en fondamenti na tapu wan bun ondrosuku nanga controle fu sma di sabi den tori di taki dya finifini. Fu dati-ede wi kan taki nanga overtoigi, te wi e kobroiki fruklari fu na buku. Taki den sortu bodoi disi gi na ini a ten disi, seiker de ete wan buweisi fu a bigi lobi fu Yehovah gi en sma fu ala nâsi. Meki fu dati-ede wi alamala span wi srefi nanga wi krin frustan fu doro na marki fu sabi na nyun buku disi bun èn baka dati kobroiki en nanga bun bakapisi fu yepi reti-ati sma fu difrenti nationaal nanga kerki bakagron. Iya, fu di wi sa kobroiki na nyun buku disi nanga bun bakapisi, sa gi wi na satisfaksi fu e sabi taki wi e meki a bun nyunsu bekenti gi ala sortu fu sma di wi e miti na ini a gebied di wi kisi fu wroko. — Mat. 28:19, 20; Tit. 2:11.