Wi o pristeri wan nyun brochure!
1. San wi o pristeri na ini november, èn fu san ede a publikâsi disi meki?
1 Na a „Tan na ai!” Distrikt Kongres fu 2009, wi kisi a nyun brochure di nen San na a boskopu fu Bijbel? Na ini november, gemeente na heri grontapu o pristeri a brochure disi fu a fosi leisi. Fa sma na ini a kontren fu wi o kisi wini fu a brochure disi? Furu sma, spesrutu den sma di no de fu wan Kresten bribi, no sabi furu fu Bijbel. Fu dati ede, a brochure e taki na tapu bladzijde 3, dati a meki fu yepi sma kon sabi san „na den moro prenspari tori na ini Bijbel”.
2. Fa wi kan pristeri a brochure disi?
2 Fa wi o pristeri en: Wi kan taki: „Wi ben sa wani sabi fa yu e denki fu a sani di skrifi dyaso. [Leisi 2 Timoteyus 3:16.] Furu sma nanga suma wi e taki, e agri nanga den wortu dati, ma trawan feni taki Bijbel na wan bun buku nomo. San yu e denki fu Bijbel? [Gi a sma na okasi fu piki.] Awansi fu sortu bribi wi de, bun reide de fu san ede wisrefi musu ondrosuku Bijbel. [Leisi a fosi pisi na tapusei fu bladzijde 3.] Na wan moi fasi a brochure disi e taki syatu fu Bijbel. Te yu e leisi a brochure disi, dan yu o si a moi sani disi: Na ini heri Bijbel wan prenspari sani de di e tyari kon na krin èn a e taki fu wán boskopu.”
3. San na wan tra fasi fa wi kan pristeri a brochure, spesrutu na ini kontren pe furu sma no abi wan Kresten bribi?
3 Luku wan tra fasi fa wi kan pristeri a brochure disi, spesrutu te wi e preiki na wan kontren pe sma no abi wan Kresten bribi. Wi kan taki: „Wi ben sa wani sabi fa yu e denki fu a sani di skrifi dyaso na ini Gado Buku (noso na ini a santa buku disi). [Leisi Psalm 37:11.] Fa yu denki taki grontapu o de te a profeititori disi kon tru? [Gi a sma na okasi fu piki.] Disi na wan eksempre fu a howpu nanga a trowstu di sma fu ala kulturu nanga bribi kan kisi fu Bijbel.” Leisi a fosi pisi na tapusei fu bladzijde 3, èn pristeri a brochure.
4. Fa wi kan gebroiki a brochure fu bigin wan Bijbelstudie?
4 Bigin wan Bijbelstudie: Te wi go baka na a ososma, dan wi kan memre en na a takimakandra di wi ben abi. Wi kan luku wán noso tu paragraaf di e taki fu a tori di wi ben luku, èn wi kan gebroiki den aksi na a kaba fu a pisi di e taki fu a tori dati. Boiti dati, efu wi wani, wi kan sori a sma a Bijbel leri-buku wantewante. Wi kan leisi makandra nanga en a bakasei kafti fu a brochure, èn wi kan gi en a buku. Wi kan aksi en sortuwan fu den kapitel a feni moi. Baka dati, luku wán, noso tu paragraaf fu a kapitel dati makandra nanga en. Meki wi alamala abi wan prati na a pristeri di wi o pristeri a brochure disi na ini november!