Aladei jeje njanjan — Prenspari srefisrefi gi wan kresten osofamiri
1 „Libisma no moesoe libi foe brede wawan, ma foe ibri wortoe di komoto foe Jehovah mofo” (Mat. 4:4). Fa den wortoe disi de troe! Neleki a wi abi letterlijk njanjan fanowdoe ibri dei, na so wi moesoe teki aladei jeje njanjan na ini wi. Foe jepi wi foe wi teki doronomo jeje njanjan foe Gado Wortoe, meki a Genootschap ben tjari kon a doro a boekoe Ondrosoekoe den Boekoe Aladei. Oen leki osofamiri e poti aladei ten na wan sei foe loekoe a deitekst?
2 Papa nanga mama moesoe gi na eksempel: Te wi abi wan druk schema, dan wi kan skoifi a takimakandra foe a deitekst makriki go na wan sei nanga a prakseri taki a kan doe na wan tra momenti. Ma efoe papa nanga mama sabi a jeje nowtoe foe na osofamiri foe den, dan den sa feni ten ala dei, ija, den sa meki ten foe doe disi nanga a heri osofamiri (Mat. 5:3). Den sa teki fesi foe no leisi a deitekst wawan nanga den pikin, ma so srefi foe tjari prenspari penti foe a Waktitoren kommentaar kon krin a fesi èn foe taki na sortoe fasi den kan meki wan praktis gebroiki foe den bodoi nanga den rai disi. A troe taki a e aksi tranga moeiti èn foe oefen foe meki en leki wan gwenti, ma den wini warti dati. (Teki gersi Tori. 17:11, 12.) Papa nanga mama, wroko so boen tranga na en foe gi wan toemoesi boen eksempel!
3 Feni wan boen ten: San na a moro boen ten foe kon na wan nanga a heri osofamiri foe takimakandra foe a deitekst, so dati a no e pasa wan leisi èn dan baka wan tra leisi a no e pasa? A abi wini foe bigin a dei nanga a loekoe foe wan bijbeltekst. Na Bethel èn na zendeling-oso alape foe grontapoe a dei e bigin nanga a mamanten anbegi, nanga na ini toe wan sjatoe takimakandra foe a deitekst. Disi de wan jepi gi den brada nanga sisa foe bigin a dei foe den boen èn foe denki aladei foe den froemane foe Jehovah. — Ps. 1:1, 2; Fil. 4:8.
4 So srefi kresten osofamiri kan njanboen foe bijbel takimakandra na a mamanten. Pikin kan kisi jepi foe man kakafoetoe gi den aanval tapoe a jejefasi foe den di den e miti foeroe na skoro. Efoe na wan spesroetoe pisiten a no man taki joe e sidon makandra nanga a heri osofamiri foe abi wan takimakandra foe a deitekst, dan papa nanga mama kan go prakseri foe tra sortoe fasi fa den kan seti sani so taki den no e misi a prenspari jeje njanjan disi. Foe eksempel, te wán papa moesoe go na en wroko bifo den pikin opo mamanten, dan kande a mama kan gebroiki pikinso ten foe taki foe a deitekst makandra nanga den pikin. Ma joe abi osofamiri toe di e seti sani foe taki foe a tekst te neti, bika dan den de na makandra. Ibri osofamiri kan meki wan schema di fiti moro boen na a situwâsi foe den.
5 Jeje njanjan aladei, prenspari srefisrefi gi wan kresten osofamiri. Poti a loekoe foe a deitekst na a fosi presi (Fil. 1:10). Taki makandra foe wan bijbel tekst aladei, sa jepi wi foe hori fasti na den regtfardiki markitiki nanga wet foe Jehovah. Te ibri memre foe na osofamiri e wroko na disi, dan a seti disi sa abi foeroe wini gi den ala.