Kibri den pikin foe joe foe den no kisi broedoe

¹ „Loekoe! Manpikin na wan goedoe foe Jehovah” (Ps. 127:3). Efoe oenoe abi so wan warti goedoe foe Jehovah, dan oenoe leki papa nanga mama abi wan kolokoe ma serjoesoe frantiwortoe foe kweki oen pikin, foe sorgoe den en foe kibri den. Foe eksempel, oen ben sreka ala sani na fesi kaba foe kibri den jongoe pikin foe joe foe den no kisi broedoe? Fa den pikin foe joe ben o doe te sma ben o wani gi den broedoe? Oen ben taki leki osofamiri san oen ben kan doe foe handri na wan fasi di abi boen bakapisi te wan nowtoe situwâsi de, pe a kefar kan de taki den o gi broedoe?

² Foe sreka joe osofamiri tapoe den sortoe situwâsi disi, no de wan reide foe broko-ede noso foe e span pasa marki. Joe no man si ibri sani na fesi di o pasa ini joe libi, èn joe no man sreka joesrefi tapoe dati, ma foeroe sani de di oenoe, leki papa nanga mama, kan doe na fesi foe kibri joe pikin foe den no kisi broedoe. Efoe oenoe no poti prakseri tapoe den frantiwortoe disi, dan a bakapisi kan de taki den o gi joe pikin broedoe te a e kisi datra jepi. San joe kan doe?

³ A de prenspari foe abi wan fasti overtoigi: Joe moesoe denki serjoesoe o tranga joe eigi overtoigi de ini a tori foe Gado wet di abi foe doe nanga broedoe. Joe e leri den pikin foe joe foe den arki Jehovah ini na afersi disi, neleki fa joe e leri den en wet ini a tori foe de eerlijk, a fasi fa den moesoe tjari densrefi, foe den de neutraal èn tra sani foe a libi? Wi e firi troetroe leki fa a wet foe Gado ben komanderi na Deuteronomium 12:23: „Abi na fasti bosroiti foe no njan a broedoe”? Vers 25 den e taki moro fara: „Joe no mag foe njan en, so taki a kan go boen nanga joe èn den manpikin baka joe, bikasi joe sa doe san de reti ini Jehovah ai.” Wan datra kan taki dati broedoe sa meki taki ’sani sa go boen’ nanga a siki pikin foe joe, ma joe moesoe abi na fasti bosroiti bifosi wan nowtoe situwâsi opo ede kon foe weigri broedoe gi joesrefi nanga den pikin foe joe. Joe sa moesoe si joe matifasi nanga Jehovah leki wan sani di moro warti leki iniwan sortoe froeklari taki joe o man libi moro langa èn di ben o meki taki joe e pasa Gado wet. A feni di Gado e feni oen boen now èn têgo libi ini a ten di e kon, de ini a tori disi!

⁴ Ija, Jehovah Kotoigi poti den prakseri tapoe libi. Den no wani dede. Den wani libi, so taki den kan prèise Jehovah èn doe en wani. Dati na wán reide san ede den e go na ati-oso èn e tjari den pikin foe den drape foe feni jepi. Den e aksi den datra foe jepi den, èn te datra e taigi den dati broedoe na a fasi fa den gwenti foe jepi sma noso so leki fa datra e taki a fasi fa den moesoe jepi den, den e aksi foe den dresi den na wan tra fasi sondro broedoe. Foeroe tra fasi de foe dresi sma boiti broedoe. Datra nanga foeroe ondrofeni e gebroiki den. Den sortoe jepi disi no de lawlaw jepi, ma na datra jepi nanga fasi foe gi datra jepi, di joe kan froetrow èn foe san den e taki ini prenspari datra tijdschrift. Doesoen doesoen datra na heri grontapoe e wroko makandra nanga wi foe kan gi boen datra jepi sondro foe gebroiki broedoe, ala di a de wan problema ete sontron foe feni datra di wani jepi pikin foe kotoigi sondro foe gebroiki broedoe.

⁵ Feni wan datra di e wroko makandra: Den datra abi foeroe sani na den ede te den e jepi den sikiman foe den, èn te joe e aksi den foe jepi joe pikin sondro broedoe, disi e meki a tjalensi kon moro bigi gi den. Son datra o agri foe jepi bigi sma ala di den e respeki den winsi foe den di abi foe doe nanga broedoe, so langa den vul wan papira in pe skrifi taki efoe wan sani pasa nanga den, datra fri foe fowtoe. Son wan foe den ben agri so srefi foe jepi mendri-jari pikin di sori taki den na ’lepi mindri-jari pikin’, foe di son kroetoebangi ben erken taki lepi mendri-jari pikin abi a reti foe densrefi teki a sortoe datra jepi di den wani. (Loekoe Na Waktitoren foe 1 juni 1991, blz. 29-32, di e taki foe san den e froestan ondro wan ’lepi mendri jari pikin’.) Ma, den datra ben sa kan weigri foe jepi jongoe pikin, spesroetoe den njofi pikin, boiti efoe den kisi primisi foe gi broedoe. Te joe loekoe en boen, dan wan toe datra nomo sa gi 100 persent seikferfasi taki den no o gebroiki broedoe ondro no wan situwâsi te den e jepi wan pikin. Bika foe den reide di datra abi èn so srefi den di foe wet, moro foeroe datra e feni taki, den no kan gi a djaranti dati. Tokoe, moro nanga moro foe den datra wani jepi den pikin foe Jehovah Kotoigi ala di den e go so fara leki den firi taki den man foe respeki den winsi foe wi di abi foe doe nanga broedoe.

⁶ Nanga disi ini prakseri, dan san efoe, te joe e soekoe wan boen datra gi joe pikin, joe e feni wan di abi nen taki a e wroko boen makandra nanga Jehovah Kotoigi èn di ben jepi tra kotoigi na a srefi fasi sondro broedoe ini den ten di pasa, ma di tokoe e denki taki a wet foe lanti no e gi en pasi foe gi joe a dorodoro djaranti taki a no ben sa gebroiki broedoe? Ma, tokoe a e gi joe a djaranti taki a e denki taki so srefi a leisi disi, problema no sa opo ede kon. Kande joe e kon si taki disi na a moro boen tjansi di joe abi. Ondro den sortoe situwâsi disi joe kan bosroiti taki joe ben kan gi primisi foe go doro nanga a datra jepi. Ma, meki a kon krin na fesi taki nanga a primisi di joe e gi foe a datra jepi di den o gi joe pikin, joe no e gi den primisi foe den gi a pikin foe joe broedoe. Foe handri na a fasi disi ben sa de wan frantiwortoe di joe ben sa moesoe tjari, sondro taki den e si joe bosroiti leki joe libi joe soifri retifasi.

⁷ A no de foe taki dati efoe joe ben kan feni wan tra boen datra jepi di ben sa meki a problema taki den o gebroiki broedoe moro pikin noso kande e poeroe en dorodoro, joe kande kan teki a jepi di no e gi someni problema. A de na froewakti taki joe e doe dorodoro moeiti foe feni wan datra noso chirurg di ben sa go moro fara leki wan trawan foe agri nanga joe taki a no o gi broedoe. A moro boen fasi foe tapoe slag gi joesrefi, na foe handri bifosi problema kon. Meki ala moeiti foe feni wan datra na fesi di wani wroko makandra nanga joe. Proberi pe dati man foe tan farawe foe datra nanga ati-oso di no wani wroko makandra nanga joe.

⁸ Ini son kondre wan tra sani di e bepaal efoe joe o kisi broedoe ofoe no, na fa joe sa pai na sorgoe di na ati-oso e gi. Pe papa nanga mama abi wan siki verzekering noso wan tra panti di e gi den na okasi taki den kan teki wan datra di den wani, a moro makriki foe den pikin no fadon ini anoe foe datra noso ati-oso di no wani wroko makandra nanga den. Efoe nofo moni de, foeroetron dati e bepaal sortoe jepi nanga wroko makandra wan osofamiri sa kisi foe den datra nanga den ati-oso. Efoe wan datra noso ati-oso sa agri foe meki wan pikin go na wan tra ati-oso noso datra, dati sa anga nofotron foe a man di papa nanga mama man pai gi a sorgoe. Èn mama di moesoe kisi pikin, a de prenspari foe loekoe joe gesontoe boen ala di joe abi bere! Disi sa jepi foe a pikin foe joe no gebore toemoesi froekoe èn no abi den problema di e kon nanga dati, foe di a jepi di den gwenti foe gi beibi di gebore toemoesi froekoe èn den problema di den abi, foeroetron abi foe doe nanga broedoe.

⁹ Son tron den datra e kroetoe taki Jehovah Kotoigi e taki te na a lasti momenti taki den no e teki broedoe. Disi noiti mag de so. Wan foe den fosi sani di papa nanga mama di de koitoigi moesoe doe te den e go na ati-oso noso o meki gebroiki foe a jepi foe wan datra, na foe taki fa den e denki foe a tori foe broedoe. Efoe a e go foe wan operatie, aksi foe miti nanga na anesthesist (a sma di, bifo den o koti joe, e gi joe spoiti foe joe sribi so taki joe no e firi noti), bifo den o koti a pikin. A chirurg kande kan jepi joe foe doe disi. Oen moesoe tjek den toestemmingsformulier (efoe oen o gebroiki den disi) finifini. Joe abi na reti foe hari wan strepi pasa iniwan sani nanga san joe no e agri. Skrifi tapoe a toestemmingsformulier, foe poeroe ibriwan tweifri, taki joe bika foe na bribi foe joe èn foe medisch reide, joe no wani noso no e gi pasi foe den gi broedoe ini sortoe situwâsi toe.

¹⁰ Jepi foe Jehovah organisâsi: Sortoe sani Jehovah organisâsi ben sreka foe jepi joe foe kibri den pikin foe joe foe den no kisi broedoe? Foeroe sani de. A Genootschap ben tjari foeroe sani kon a doro foe gi wi leri di abi foe doe nanga broedoe èn foe den tra fasi fa den e dresi sma sondro broedoe. Wi ben studeri a brochure Fa broedoe kan kibri joe libi? (How Can Blood Save Your Life?) èn tra poeblikasi foe a tori disi. Èn joe abi joe brada nanga sisa ini joe gemeente, di kan jepi joe foeroe èn gi joe horibaka. Te wan problema situwâsi de, owroeman kan feni en wan boen sani foe seti sani so, taki dei nanga neti wan sma e hori wakti na a pikin di didon na ati-oso, na fosi presi wan owroeman nanga wan foe den bigi sma foe a pikin noso wan tra krosibei memre foe a famiri. Foeroe tron den e gi broedoe te neti, te ala famiri memre nanga mati go na oso.

¹¹ Ini Sranan wi abi wan Ati-oso Kontakti Komte na Paramaribo. Ala gemeente sori go na a komte disi di abi brada di kisi spesroetoe skoro ini na afersi disi èn di de srekasreka foe gi jepi. Kari den nanga jepi foe den owroeman foe joe gemeente te joe abi den fanowdoe. Joe no moesoe kari den gi pikinpikin problema, ma no wakti toemoesi langa foe piki den efoe a e kon na krin taki wan serjoesoe problema kande e opo ede kon. Foeroe tron den kan gi joe den nen foe den datra di wani wroko makandra nanga joe èn den kan gi joe idea fa datra kan gi jepi na wan tra fasi. Te disi de fanowdoe èn efoe a kan, den brada disi e seti sani so, taki den kan kon na joe èn jepi joe nanga a problema.

¹² Sreka joesrefi dorodoro efoe kroetoebangi o kon ini a tori èn a fasi fa joe moesoe handri: San joe moesoe doe efoe wan datra noso ati-oso o go na kroetoebangi so taki a e kisi ordroe foe gi broedoe na joe pikin? Disi na a ten taki joe e lasi howpoe, bika joe denki taki joe no man doe noti moro? Kwetikweti! Kande a kan ete taki joe kan tapoe pasi foe den no gi broedoe. Wi moesoe sreka wisrefi langa ten na fesi kaba tapoe a mogelijkheid disi. San wi kan doe?

¹³ Efoe joe e froestan wan toe foe den gronprakseri di e tiri noso abi krakti tapoe ati-oso nanga kroetoebakra ini den tori disi, dan dati sa jepi joe boen foeroe foe kakafoetoe gi den. Wan foe den prenspari gronprakseri de taki wet no e gi papa nanga mama dorodoro makti foe teki noso weigri datra jepi gi den pikin. Ala di bigi sma abi a reti foe teki noso weigri datra jepi so leki fa den e winsi, papa nanga mama no fri foe weigri datra jepi di sma e si leki prenspari gi na boen foe a pikin, srefi efoe den e weigri tapoe gron foe den opregti relisi overtoigi di den abi.

¹⁴ A gronprakseri disi ben kon na fesi ini a bosroiti foe 1944 foe a Hei Kroetoebangi foe Amerkankondre, di ben taki: „Papa nanga mama fri foe densrefi tron martelaar. Ma disi no wani taki taki den fri, ini situwâsi di de a srefi foe meki den pikin foe den kon tron martelaar bifosi den doro a jari taki den abi dorodoro, èn foe wet ede fri foe handri, efoe den kan doe a keuze dati densrefi.” A srefi prenspari broko-ede disi foe a gesontoe èn boen foe na pikin, den teki ini wet foe kibri pikin. Den sortoe wet disi di de foe kibri den pikin foe den no meshandri den, meki so srefi foe kibri pikin efoe den e misi foe sorgoe boen foe den.

¹⁵ Kresten papa nanga mama feni en boen efoe lanti e kibri pikin di no e kisi boen sorgoe en di den e meshandri. Ma den wet foe kibri den pikin gi den sortoe sani dati èn a froeklari foe a Hei Kroetoebangi so leki fa a skrifi na tapoesei, foeroe tron den e fiti en na wan fowtoe fasi tapoe kefal pe pikin foe Jehovah Kotoigi de na ini. Foe san ede? Na a fosi presi a no de so taki Kotoigi papa nanga mama wani meki „martelaar” foe den pikin. Efoe dati ben de so, foe san ede den e tjari den pikin foe den go na ati-oso? Na a tra sei, Kotoigi papa nanga mama lobi foe soekoe datra jepi gi den pikin. Den lobi den pikin èn wani taki den abi wan boen gesontoe. Ma den e bribi taki den abi na plekti di Gado gi den foe teki na wan frantiwortoe fasi, a sortoe datra jepi di boen gi den pikin. Den wani taki den gesontoe problema foe den pikin e behandel sondro broedoe. So wan tra datra jepi sondro broedoe, no wawan de moro boen èn sondro kefar leki wan jepi nanga broedoe, ma, san de moro prenspari, a bigi Giman foe libi, Jehovah Gado e tan feni den pikin foe den boen.

¹⁶ Boiti den wini foe datra jepi sondro broedoe, foeroe datra nanga sma foe na Organisâsi foe lanti foe kibri pikin, e si a gi foe broedoe leki wan aladei fasi foe datra jepi, di prenspari èn ini son kefal e kibri libi. Dati ede srefi efoe kotoigi papa nanga mama, e weigri foe teki broedoe di datra rikomanderi, problema kan kon foe dati. A no de a gebroiki taki datra e jepi den pikin sondro primisi foe papa nanga mama. Foe wini a weigri di papa nanga mama e weigri foe gi primisi gi broedoe, datra noso sma di e wroko na ati-oso kan proeberi foe kisi primisi foe wan memre foe kroetoebangi. Den kan kisi a primisi foe kroetoebangi nanga jepi foe sma foe na Organisâsi foe lanti foe kibri pikin, noso nanga jepi foe datra noso sma di e wroko na ati-oso, di e handri foe kibri a pikin foe a no mankeri datra sorgoe.a

¹⁷ Foeroe tron datra esi-esi e kisi den ordroe foe gebroiki broedoe, ala di den no e piki papa nanga mama taki den e doe so wan sani. Datra, hei memre foe ati-oso noso sma foe na Organisâsi foe lanti foe kibri pikin, e proeberi foe regtfardiki so wan ordroe foe di den e boeweri taki wan nowtoe situwâsi de pe datra jepi de fanowdoe èn di no e gi ten foe froeteri papa nanga mama finifini san e pasa. Ma foeroe tron te joe e aksi moro fara, datra ben taki dati a no ben de wan troetroe nowtoe situwâsi èn taki den wani abi na ordroe foe kroetoebangi „gi na kefal” dati so leki fa den e denki a o de fanowdoe foe gi broedoe. Leki papa nanga mama foe joe pikin, oenoe abi ala ten na reti foe sabi san datra, hei memre foe ati-oso noso sma foe na Organisâsi foe lanti foe kibri pikin, o doe nanga joe pikin. So leki fa wet skrifi, efoe dati man, dan joe moesoe sabi efoe den e doe moeiti foe kisi wan ordroe foe kroetoebangi foe poeroe joe makti leki papa nanga mama èn joe moesoe kisi na okasi foe froeteri joe sei foe a problema na kroetoebangi.

¹⁸ Den penti disi foe na sei foe wet e sori taki a prenspari foe feni wan datra di wani wroko makandra. Wroko makandra nanga en, èn nanga jepi foe den memre foe na Ati-oso Kontakti Komte, jepi en foe a doe moeiti foe jepi joe pikin sondro broedoe noso foe joe pikin go na wan tra datra noso ati-oso di kan jepi en sondro broedoe. Ma efoe a e sori taki datra, hei memre foe ati-oso noso wan sma foe na Organisâsi foe lanti foe kibri pikin e soekoe foe kisi wan ordroe foe kroetoebangi, joe moesoe de esi-esi foe aksi den efoe den prakseri foe doe dati. Son tron den e doe disi na wan kibrifasi nanga jepi foe konkroetitei. Efoe den abi plan foe go na kroetoebangi, poti krakti na tapoe dati joe wani sabi dati, so taki joe kan go froeteri joe sei foe a problema so srefi, na a kroetoebakra (Odo 18:17). Efoe ten de, a boen foe soekoe wan afkati. Ini son kefal kroetoebangi e gi joe wan afkati. Efoe joe abi joe eigi afkati noso a wan di kroetoebangi gi joe, dan na Ati-oso informâsi dienst foe a Genootschap kan prati bodoi nanga en di sa jepi en foe gi na moro boen taki di man ondro den situwâsi disi.

¹⁹ Efoe kroetoebangi e go loekoe na weigri di joe e weigri foe joe pikin kisi broedoe, a kan de so taki efoe datra taki dati broedoe de fanowdoe foe kibri a libi foe a pikin, dati kan wroko tapoe a kroetoebakra. A kroetoebakra, di no sabi noti foe dresi sma, sa bow tapoe san datra e taki. Disi de spesroetoe a kefal te papa nanga mama e kisi pikin tjans nomo noso no e kisi no wan okasi foe froeteri den sei foe a problema ala di datra wawan e kisi na okasi foe taki dati a „prenspari” foe gi broedoe. A jere foe na tori foe wan sei nomo no e jepi foe tjari a troe sei foe a tori kon na fesi. A troe tori de taki oten èn foe san ede broedoe de fanowdoe na wan sani di no de seiker. Foeroe tron a de so taki te wan datra e taki dati broedoe de fanowdoe srefisrefi foe kibri a libi foe a pikin, wan tra datra di abi ondrofeni foe behandel a srefi problema sondroe broedoe, sa taki dati broedoe no de prenspari foe jepi a siki pikin.

²⁰ San joe sa doe efoe wan afkati noso wan kroetoebakra e aksi joe foe san ede joe e weigri broedoe di kan „kibri a libi” foe joe pikin? Ala di na fosi firi foe joe kan de, foe froeklari taki joe e bribi ini na opobaka èn taki foe na tranga bribi di joe abi taki Gado sa tjari joe pikin kon baka na libi efoe a e dede, dan so wan piki no sa doe foeroe leki overtoigi a kroetoebakra, di e broko ede nanga a gesontoe foe a pikin, taki joe e denki soso joe relisi èn taki a moesoe teki stap foe kibri joe pikin.

²¹ San a kroetoebangi moesoe sabi na dati, ala di joe e weigri broedoe foe relisi gronprakseri di e go moro dipi, joe no e weigri datra jepi gi joe pikin. A kroetoebakra moesoe si taki oenoe no de papa nanga mama di no e sorgoe boen foe den pikin foe den èn di e meshandri den, ma dati oenoe de papa nanga mama di lobi den èn di wani taki den pikin foe den kisi datra jepi. Joe no e agri taki den wini foe broedoe, so leki fa den e boeweri, de moro leki den kefar nanga problema di de èn di kan kiri joe pikin, spesroetoe te tra fasi de foe dresi joe pikin sondro taki den kefar disi de.

²² Efoe a situwâsi e gi pasi foe dati, joe ben sa kan froeteri a kroetoebakra taki na soso wán datra denki taki broedoe de fanowdoe, ma dati ibriwan datra abi en eigi fasi foe wroko, èn dati joe wani kisi na okasi foe feni wan datra di wani jepi joe pikin sondro broedoe. Kande joe ben feni so wan datra kaba, nanga jepi foe na Ati-oso Kontakti Komte, di sa jepi joe pikin sondro broedoe èn di kan kotoigi ini kroetoebangi kande nanga jepi foe konkroetitei. So leki fa a sori a Kontakti Komte kan sori a kroetoebakra — èn srefi a datra di wani abi wan ordroe foe a kroetoebangi — den artikel gi datra di e sori fa den kan jepi na problema foe joe pikin nanga boen bakapisi sondro foe gebroiki broedoe.

²³ Te den e aksi kroetoebakra esi-esi wan ordroe foe gi broedoe, dan foeroetron den no denki foe, noso den no memre den na den foeroe kefar di broedoe abi, so leki AIDS, hepatitis, nanga wan lo tra kefar. Joe kan tjari den kefar disi ondro a prakseri foe a kroetoebakra, èn joe kan froeteri en toe taki joe leki kresten papa nanga mama, sa si a gebroiki a broedoe foe wan tra sma, ini wan poging foe kibri libi, leki wan hebi fowtoe foe a pasa di den e pasa a wet foe Gado èn efoe den e gi broedoe na a pikin foe joe nanga tranga, joe sa si dati neleki wan man di e go didon nanga tranga na wan oema. Joe nanga joe pikin (efoe a owroe nofo foe abi en eigi overtoigi) kan taki dati oenoe e tegoe a pori di den e pori a skin na so wan fasi, èn oen kan aksi a kroetoebakra foe a no gi wan ordroe foe den gi broedoe, ma foe den gi joe na okasi foe soekoe wan tra fasi foe den dresi joe pikin.

²⁴ Te joe e feti na wan joisti fasi, den kroetoebakra man si moro krin a tra sei foe a tori — joe sei — leki papa nanga mama. Dan den no de so gaw foe gi wan ordroe foe gi broedoe, na joe pikin. Ini son kefal kroetoebakra ben tapoe a fri di datra abi foe gebroiki broedoe, srefi e aksi foe den loekoe tra fasi foe datra jepi fosi, noso ben gi papa nanga mama na okasi foe feni wan datra di wani jepi a pikin sondro broedoe.

²⁵ Te joe abi foe doe nanga sma di wani gi broedoe nanga tranga, a prenspari taki noiti joe e sori taki joe e degedege ini joe bribi. Kroetoebakra (nanga datra) sontron e aksi efoe papa nanga mama abi bisi foe „gi” den na frantiwortoe foe teki na bosroiti foe gi a pikin broedoe, bika den e denki taki dati sa dodoi na konsensi foe papa nanga mama. Ma joe moesoe tjari kon na krin na ala sma di abi foe doe nanga a tori tak,i joe leki papa nanga mama e firi taki oen abi na plekti foe tan doe ala san oen man foe den no gi broedoe na a pikin foe joe. Disi na wan frantiwortoe di Gado gi joe. Joe no man gi en na tra sma.

²⁶ Ma, te joe e taki nanga datra nanga kroetoebakra, joe moesoe sreka joesrefi foe tjari a fasi fa joe e denki foe a tori disi kon krin na fesi, èn na wan fasi di e overtoigi den. Efoe kroetoebangi e gi wan ordroe ala di joe doe ala moeiti, tan aksi a datra foe a no gi broedoe èn gi en deki-ati foe a gi wan tra datra jepi. Tan proberi foe loekoe efoe a wani loekoe tra medisch artikel èn na rai foe iniwan datra di wani foe gi rai foe a problema, so taki den no abi foe gebroiki broedoe. Foeroe tron a de so taki wan datra di ben sori leki a no ben o kenki prakseri, e komoto na ini na operatie kamra nanga a toemoesi moi boskopoe taki a no ben gebroiki broedoe. San e pasa toe, no lasi ati, srefi efoe kroetoebangi ben gi wan ordroe foe poeroe na makti di joe abi leki papa nanga mama! — Loekoe Na Waktitoren foe 15 juni 1991 [Bakratongo], „Aksi foe leisiman”.

²⁷ Memre taki Jesus ben taki: „De na ai gi den sma, bika den sa gi joe abra na kroetoebangi . . . Foe mi ede den sa srepi joe na fesi tiriman nanga kownoe, leki wan kotoigi gi den èn den nâsi.” Foe trowstoe wi ondro den sortoe situwâsi disi, Jesus ben taki moro fara taki a santa jeje sa jepi wi foe memre den sani di e fiti èn de boen foe taki na den sortoe okasi disi. — Mat. 10:16-20.

²⁸ „En di e sori taki a abi koni ini wan tori, sa feni boen, èn kolokoe en de di e froetrow tapoe Jehovah” (Odo 16:20). Papa nanga mama sreka sani na fesi foe kibri joe pikin foe den no kisi broedoe èn foe den no kon doti na jejefasi (Odo 22:3). Oenoe pikin, piki boen tapoe a skoro di joe papa nanga mama e gi joe te den e sreka densrefi èn kibri den na ini joe ati. Abi na ’fasti bosroiti foe no njan a broedoe, so taki a kan go boen nanga joe’, èn foe oenoe kan abi Jehovah blesi nanga lafoe di e sori taki a e feni oenoe boen. — Deut. 12:23-25.

[Foetoewortoe]