Yu pikin man teki wan seryusu bosroiti?
1. Sortu bosroiti di abi fu du nanga brudu, yongu Kotoigi teki? Gi wan eksempre.
1 Wan seryusu bosroiti fu sortu sani? Fu brudu transfusie, noso a gebroiki di sma e gebroiki brudu leki dresi. Na artikel „Waka so leki fa Jehovah leri joe foe waka” na ini A Waktitoren fu 1 yuni 1991, e fruteri fa pikin fu Yehovah Kotoigi ben abi fu teki wan seryusu bosroiti di sori taki a de tumusi prenspari gi den fu gi yesi na Gado wet di e taki fu brudu, neleki fa dati de prenspari gi a papa nanga mama fu den. A kan taki yu pikin sa abi fu teki so wan bosroiti tu?
2. Sortu bosroiti wan krutubangi teki di wan yonguwan weigri fu teki brudu, èn san Kresten papa, mama nanga den pikin fu den e leri fu a tori disi?
2 San lantiwet e taki? Na ini Amerkankondre, a moro hei krutubangi di ben abi fu teki a bosroiti efu wan yonguwan di bigi kaba, abi a reti fu weigri fu teki brudu, ben de a Moro Hei Krutubangi fu Illinois. Ini a krutu afersi fu wan yongu sisa fu 17 yari, a krutubangi teki a bosroiti disi: „Efu a de krin èn seiker taki a yonguwan bigi nofo fu frustan san na den bakapisi fu den sani di a e du [èn] efu a man krutu sani leki wan bigisma, dan a wet e sori taki a yonguwan dati abi a reti fu bosroiti efu a o teki noso weigri datrayepi.” Fu dati ede, fu man sabi efu wan pikin bigi nofo fu teki en eigi bosroiti, dan a kan taki datra noso lantiman o taki nanga a siki pikin fu yere efu ensrefi e weigri fu teki brudu. A yonguwan musu frustan krin o seryusu a siki fu en de, sortu datrayepi a kan kisi, èn san na den bakapisi fu a bosroiti di a o teki. A musu teki wan fasti bosroiti èn a musu taki krin san a e bribi èn fa a e denki fu a wet fu Gado di abi fu du nanga brudu.
3. Na sortu aksi papa nanga mama musu poti seryusu prakseri, èn fu san ede?
3 San yu pikin ben o taki? Yu pikin man taki krin fa den e denki fu a Gado wet di abi fu du nanga brudu? Den e bribi trutru taki na Gado gi a komando fu ’tan fara fu brudu’? (Tori. 15:29; 21:25) Den kan sori na ini Bijbel san den e bribi? Efu datra feni taki yu pikin o lasi en libi èn unu leki papa noso mama no de drape, dan yu denki taki yu pikin ben o abi a deki-ati fu tan hori ensrefi na a bosroiti di a teki fu brudu? „Ten nanga sani di e pasa sondro fu sma fruwakti dati, e miti [wi] alamala”, sobun fa yu kan sreka yu pikin gi tesi di den kan kisi tapu a bribi fu den, na wan ten di den no fruwakti?—Preik. 9:11; Ef. 6:4.
4, 5. (a) Sortu frantwortu papa nanga mama abi, èn fa den kan tyari a frantwortu disi? (b) Sortu yepisani papa nanga mama kan gebroiki?
4 Papa nanga mama, san unu kan du? Unu abi a frantwortu fu leri un pikin fa Gado e denki fu brudu (2 Tim. 3:14, 15). A Redeneren-buku e fruteri a tori disi krinkrin na tapu bladzijde 78-82. Taki a tori disi finifini nanga un osofamiri. Luku san skrifi na tapu bladzijde 82-84 na ondro a pisi „Als iemand zegt—”, èn gebroiki dati fu oefen nanga yu pikin fa den kan fruteri sma san den e bribi èn fu san ede den e bribi dati (1 Petr. 3:15). Tra sani de di unu kan gebroiki fu leri den pikin sani di abi fu du nanga Gado wet di e taki fu brudu. Den sani dati de fu feni na ini a brochure Hoe kan bloed uw leven redden? èn na ini A Waktitoren fu 15 yuni 2004, bladzijde 14- 24. Boiti dati, yu abi den video Transfusion-Alternative Health Care—Meeting Patient Needs and Rights nanga Geen bloed—De geneeskunde kan de uitdaging aan, èn alatu de fu kisi na tapu a DVD di nen Transfusion Alternatives—Documentary Series. Den sani disi e sori krin taki dresi sondro brudu èn oparâsi sondro brudu bun, èn den abi bun bakapisi. Yu osofamiri luku den sani disi kaba èn unu taki fu den no so langa pasa?
5 Yepi yu pikin fu „kon sabi san na Gado en wani di bun, di e plisi en, èn di de volmaakti” te a abi fu du nanga brudu-afersi. Efu den sabi disi, dan den sa man teki wan seryusu bosroiti di e plisi Yehovah.—Rom. 12:2.