Poti prakseri na tapoe belangstelling di joe feni
1 Te wi e pristeri den tijdschrift nanga den tra theokrasia poeblikâsi foe wi, wi e panja a boskopoe di Jesus Krestes ben meki bekènti, na ala sei. Foe dati ede wi moesoe doe spesroetoe moeiti foe go baka na ala sma di e sori belangstelling.
2 Efoe joe poti a prakseri na tapoe wan spesroetoe artikel ini Ontwaakt! di ben abi a belangstelling foe na ososma, tjari, te joe e go baka, penti foe na artikel kon na krin èn bow joe takimakandra lontoe wan spesroetoe tekst èn kande wán noso toe paragraaf. Efoe moro belangstelling de, sori dan na tapoe, taki Ontwaakt! abi wini gi a heri osofamiri. Ibri uitgave e taki foe difrenti tori, so leki a libikontren, tjari joesrefi tapoe wan moro betre fasi, fa joe kan kakafoetoe gi den problema foe a ten disi nanga aksi di abi a belangstelling foe den jongoewan. Efoe na ososma e sori troetroe belangstelling, meki a sabi dan taki a kan teki wan abonnement tapoe Ontwaakt! èn taki ini wan ten foe siksi moen a kan kisi twarfoe tijdschrift.
3 Èn efoe na ososma no abi belangstelling gi wan foe den artikel ini a njoen Ontwaakt!? Na presi foe joe tapoe a takimakandra, joe kan meki gebroiki foe na okasi foe leri na ososma moro foe a wroko foe Jehovah Kotoigi nanga jepi foe den bodoi na tapoe bladzijde 222 te nanga 223 foe a Taki-go-taki-kon-boekoe.
4 Efoe na fesi, joe ben libi wan foe „A Waktitoren” na baka, foe di joe ben gebroiki 2 Timoteus 3:1-5 èn joe ben poti a prakseri na tapoe den bodoi na tapoe bladzijde 2 foe a tijdschrift, te joe e go baka na a sma, joe ben sa kan taki wan sani leki:
◼ „Ini a fosi takimakandra di wi ben abi, wi ben taki foe san den sani di e pasa noja lontoe wi na grontapoe, wani taki. A gersi taki foeroe sma lasi a belangstelling gi Gado nanga den markitiki foe en gi a libi, so leki fa den tjari kon na krin ini bijbel. Disi ben abi foeroe krakti na tapoe a fasi fa sma de nanga makandra, so leki fa disi skrifi na ini a tekst foe 2 Timoteus 3:1-5. Joe denki taki wan boen reide de, foe froewakti wan moro betre situwâsi ini a ten di de na wi fesi?” Baka te joe gi okasi foe a sma gi komentaar, joe kan poti a prakseri na tapoe 2 Petrus 3:13. Opo, baka dati, bladzijde 244 te nanga 250 foe a Taki-go-taki-kon-boekoe èn poti krakti na tapoe san a Kownoekondre sa doe gi libisma.
5 Te joe e go baka, joe e si kande taki na ososma no wani taki someni foe en fasi foe anbegi, foe di a e feni taki disi na wan toemoesi persoonlijk afersi. Joe ben sa kan taki wan sani leki:
◼ „Nanga someni fasi foe anbegi ini a grontapoe di e kon dei foe dei moro pikin leki bakapisi foe a transport di e go moro esi (oto, opolani, boto) nanga den komunikâsi wrokosani di den e meki, a krakti foe ala sortoe bribi de krin foe si na ala sei foe grontapoe, efoe wi e prisiri nanga dati efoe no. Dati meki, a froestan di sma e froestan foe a fasi fa trawan e si wan sani, kan meki moro komunikâsi di wani taki wan sani, de na mindri sma foe difrenti bribi. A kan poeroe pikinso foe a si di sma no wani si trawan na ai, di abi en gron na tapoe den bribi foe den fasi foe anbegi. Fa joe e denki foe dati?” Baka te joe gi okasi foe a sma gi komentaar, poti a prakseri foe na ososma na tapoe a boekoe A soekoe di libisma e soekoe Gado.
6 Meki wi doe ala moeiti foe go baka na ala sma di e sori belangstelling gi a waarheid èn jepi den foe kon na a pasi di e tjari go na têgo libi.—Joh. 4:23, 24.