Joe e taki-go-taki-kon nanga jepi foe den Boekoe foe bijbel?
1 Wan sroedati nanga ondrofeni di e go feti, sa abi ala fetisani èn den sani di a abi fanowdoe foe kibri ensrefi. Wan bekwaam anoe-wrokoman di e sreka ensrefi foe wroko na wan bigi bow-projekt sa teki den wrokosani di a abi fanowdoe foe tjari a wroko kon na wan kaba. Wan foetoeboi foe Jehovah di teki prati na a velddienst sa abi en „feti-owroe” ini en anoe èn a sa gebroiki en na wan bekwaamfasi, so esi leki a abi na okasi (Ef. 6:17). Disi de so nanga joe? Te joe e teki prati na a diniwroko, joe e meki Gado Wortoe e taki, so taki santa jeje kan meri den ati foe den sma di e arki joe?—Odo 8:1, 6.
2 A no de ala ten makriki foe preiki. Ini son gebied pikinmoro noiti sma de na oso èn den sma di e opo den doro foe den nofotron abi foeroe sani foe doe èn dati no e gi foeroe okasi foe taki langa foe wan bijbeltori foe takimakandra. Foe di bijbel na wi moro prenspari leriboekoe, fa wi kan gebroiki en moro ini a diniwroko èn gi pasi taki en boskopoe di skrifi nanga jepi foe santa jeje, kan abi krakti na tapoe den sma di e arki wi?
3 Na ibri okasi: Na ibri doro, wi ben sa wani foe gebroiki bijbel foe boeweigi na ati foe na ososma. Wi moesoe de srekasreka foe doe disi awansi sortoe poeblikâsi wi e pristeri. Efoe a sma abi foeroe foe doe èn nofo ten no de foe opo bijbel èn leisi wán noso toe vers, dan joe kan teki wan tekst taki noso taki foe wan pikin pisi foe en, bifo joe e pristeri wan sani foe leisi? Dati wawan kan meki taki a sma e stòp èn e arki.—Hebr. 4:12.
4 Foe eksempre, efoe joe e pristeri Ontwaakt! foe 8 december 1993, nanga na artikel „Wan grontapoe sondro siki”, baka di joe sori go na a prenki na tapoe a kafti, dan joe ben sa kan poti na aksi: „Joe e bribi taki wan ten sa de taki siki sa kon na wan kaba, wan ten pe ala sma sa njanboen foe wan boen gosontoe?” Awansi san a sma e piki, joe sa man foe leisi kande langalanga na ini joe bijbel noso taki foe wan pisi foe wan tekst, so leki Jesaja 33:24 noso Openbaring 21:4. Na a fasi disi joe e meki a Wortoe foe Gado e taki.
5 Te wi e go baka na sma: Wi moesoe sreka wisrefi bifo wi e go baka na sma. Ma nofotron a de so taki tori di wi no sreka na fesi sa opo ede kon. Disi na a ten pe a boekoe Taki-go-taki-kon nanga jepi foe den Boekoe foe bijbel, kan sori foe de wan warti jepisani. A teki di wi e teki den vers taki noso e leisi den vers di e jepi wi foe a Taki-go-taki-kon-boekoe, sa jepi sma foe si taki wi na bedinari foe Gado èn no sma di e seri a Wortoe.—2 Kor. 2:17.
6 Te wi e go baka na wan sma pe wi no ben taki foe wan spesroetoe tori, dan joe kan opo a Taki-go-taki-kon-boekoe nomo na wan tori di e fiti, so leki „Jesus Krestes”, „Lasti dei”, noso „Opobaka”, èn gebroiki wán foe den ondro-edewortoe foe bigin nanga a takimakandra. Joe kan aksi na ososma foe leisi wan toe foe den tekst foe en eigi bijbel. Na a fasi dati bijbel sa wani taki wan sani gi den sma, èn a santa jeje foe Jehovah sa wroko na den tapoe efoe den na sma di abi firi gi regtfardikifasi.
7 A frantiwortoe foe wi foe preiki a boen njoensoe èn warskow den ogrisma, na wan serjoesoe sani. A de a boskopoe foe Jehovah, a no foe wi. Meki en Wortoe, a feti-owroe foe a jeje, jepi joe.