„Sani di ala den nâsi no wani si na ai”
1 Den jari di pasa wi alamala ben breiti foe jere foe den span njoensoe foe den toemoesi moi blesi di a pipel foe Jehovah ben ondrofeni na heri grontapoe. A èrken di den èrken a wroko ini Malawi, baka na ogri kwinsi foe 26 jari, ben meki wi ai lon watra foe prisiri. Wi ben geme foe trowstoe di wi ben de kotoigi foe a fadon di na ogri-ati communisme ini Oostoe-Europa ben fadon, di meki troetroe doesoendoesoen foe wi brada ben kisi froeloesoe foe a tjatjari dati di ben kwinsi den. Wi ben loekoe nanga troetroe broko-ede di den ben tjalensi a frifasi foe anbegi foe wi ini Grikikondre; wi ben breiti srefisrefi di wi ben wini krinkrin na a moro hei kroetoe-oso ini Europa. Wi ben abi bigi prisiri foe kisi foe jere taki na ala sei den e bow moro nanga moro bijkantoro foe a Genootschap, san e meki wi man meki boen foeroe lektuur gi denwan di e soekoe waarheid. Wi ben froewondroe toemoesi di wi ben jere dati tapoe a kongres ini Kiëv (Oekraïne) moro leki 7400 sma ben teki dopoe. Ija, a go na fesi disi a Kownoekondre-wroko di e naki wi ati, ben meki wi prisiri toemoesi!
2 Ala di wi abi foeroe reide foe prisiri, wi moesoe loekoe boen foe no prisiri pasa marki. A kisi di wi e kisi foeroe boen njoensoe kan meki wi denki taki a gens teige a boen njoensoe e kaba safrisafri èn dati den e èrken a pipel foe Jehovah moro nanga moro na heri grontapoe. So wan fasi foe denki kan kori wi. Ala di wi abi satisfaksi foe di wi wini wan toe strei èn wi ben abi boen bakapisi foe poeroe wan toe skotoe na pasi gi a boen njoensoe ini wan toe kondre, wi no moesoe frigiti taki a fasi fa wi de nanga grontapoe no kenki. Leki bakaman foe Jesus wi „no de wan pisi foe grontapoe”. Foe dati ede wi na „sani di ala den nâsi no wani si na ai” (Joh. 15:19; Mat. 24:9). So langa a seti foe sani disi de ete, noti e kenki na a gronlin dati „ala sma di wani libi ini wánfasi nanga Krestes Jesus ini a gi di den e gi densrefi na Jehovah, . . . [sa] kisi froefolgoe toe”. — 2 Tim. 3:12.
3 Den sani di pasa ini a historia e kotoigi foe a waarheid foe a warskow disi. Ala di Jesus, a Man di bigin krestendom, ben gi boen kotoigi na den makti tiriman nanga den borgoe foe den, a ben ondrofeni spotoe ala dei èn doronomo a ben de ini kefar foe den kiri en. Ala di den apostel foe en ben jepi foeroe sma foe tron disipel, ben abi wan prati ini a skrifi foe den Griki Boekoe foe bijbel èn ben sori den wondroe presenti foe a jeje, tokoe den sma no ben wani si den na ai èn ben handri ogri nanga den. Ala di den ben tjari densrefi na wan boen fasi èn den ben lobi den sma na den sei, tokoe moro foeroe sma ben si ala den kresten leki wan wisiwasi „sekte” di ’ben feni gens alasei’ (Tori. 28:22). Ala di Jehovah ben gebroiki a kresten gemeente na heri grontapoe tapoe wan wondroe fasi foe doe en wani, tokoe ibri pisi foe na ogri seti foe sani disi ben gens èn ben taki ogri-ati lei foe den doronomo. Wi no abi reide foe froewakti taki a gens dati sa kaba.
4 Ini a fosi jarihondro den disipel foe Jesus ben kisi difrenti froefolgoe foe Satan. Ogri-ati gensman ben froeteri bigi lei, di ben meki sma prakseri takroe foe den disipel (Tori. 14:2). Den ben bedreigi den tapoe wan lagi fasi foe meki den handri tapoe wan sortoe fasi (Tori. 4:17, 18). Foeroe groepoe sma di ben atibron ben proeberi foe meki den tapoe nanga preiki (Tori. 19:29-34). Sondro wan boen reide den ben poti den na doengroe-oso (Tori. 12:4, 5). Foeroetron froefolgoeman ben doe den ogri nanga tranga na skin fasi (Tori. 14:19). Ini son kefal den ben kiri denwan di no froedini en, foe espresi (Tori. 7:54-60). Na apostel Paulus ensrefi ben ondrofeni ala den fasi disi foe a handri di sma e handri takroe nanga trawan (2 Kor. 11:23-27). Gensman ben graboe ibri okasi nanga ala toe anoe foe skotoe a preikiwroko èn foe meki den getrow wrokoman disi ondrofeni pina.
5 Ini a ten disi Satan e gebroiki den srefi sortoe taktik. Den froeteri bigi lei di meki taki na wan falsi fasi den e taki foe wi leki wi na wan groepoe di sma kori. Ini wan toe kondre den tirimakti taki dati den lektuur foe wi e poesoe sma foe doe sani kontrari wet èn den tapoe den na wet. Na poebliki den ben skempi èn kroetoe a respeki di wi abi gi a santafasi foe broedoe. Foe 1940 te go miti 1945, groepoe ogri-ati sma, di ben atibron foe a tori foe gi a fraga odi, ben ròs den brada foe wi, ben naki den, so taki den ben kisi mankeri na den skin èn ben pori den goedoe foe den. Doesoendoesoen den ben trowe ini doengroe-oso foe a tori foe neutraliteit ede. Ini den kondre pe a tirimakti abi ala makti, den ben kroetoe den brada foe wi taki den e gens den, di ben abi leki bakapisi taki na wan toemoesi takroe fasi den ben gi den skin-ati èn ben kiri den ini doengroe-oso nanga konsentrâsi kampoe. Doronomo wi de ondro kwinsi, san e sori krinkrin taki sondro boen reide wi na sani di den no wani si na ai. — Loekoe Preikiman, kapitel 29.
6 San a ten di de na wi fesi sa tjari? Ala di wanwan leisi a pipel foe Jehovah kande e pasa den problema, di e meki a kwinsi e loesoe pikinso na wan toe presi, tokoe ini algemeen a situwâsi na grontapoe e tan a srefi. Didibri e atibron ete foe a lagi di den lagi en ini 1914. A sabi taki en ten sjatoe. Na atibron foe en seiker sa kon moro hebi o moro a bigi banawtoe e kon moro krosibei. A e poti en prakseri dorodoro tapoe en orlokoe kontrari a Kownoe di den poti tapoe a kownoestoeroe, Krestes Jesus, èn a abi a fasti bosroiti foe tan feti te na a kaba. En nanga den ogri jeje foe en kan kowroe den atibron soso tapoe den foetoeboi foe Jehovah na grontapoe, di na wan getrowfasi „e doe den komando foe Gado èn abi a wroko foe gi kotoigi foe Jesus”. — Opb. 12:12, 17.
7 Te wi e loekoe a ten di de na wi fesi, dan den sani di wi e froewakti moesoe de sani di kan. Wi no abi reide foe denki taki Didibri sa doe en safrisafri noso sa tapoe. A si di a no wani si wi na ai, di a poti ini a grontapoe disi, kan bigin kon fajafaja iniwan ten èn na iniwan presi. Ini foeroe kondre a frifasi foe preiki ben kon kisi seikerhèit soso baka wan langa hebi strei. A fri dati na wan degedege wan èn kan tan nomo nanga jepi foe wan tiriman di no de kontrari wi noso nanga jepi foe wan wet di no pôpi. Wantewante so bigi kenki kan kon èn kan tjari broeja kon nanga a pasa di den e pasa den reti di libisma abi.
8 A gro di wi e gro èn a fri di wi abi ini wan toe kondre kan tapoe wantronso, di sa meki den brada foe wi njan pina baka foe a takroe fasi di sma e handri nanga den, neleki fosi. Wi no moesoe meki a kon so fara taki wi e bigin abi wan mi no e span fasi foe denki, èn prakseri taki den gensman foe wi lasi a strei. Kande a no e sori krinkrin ala leisi taki grontapoe disi no wani si wi na ai, ma a e tan hebi. A heri Wortoe foe Gado e sori taki a gens foe na grontapoe sa kon moro hebi na presi foe kon moro mendri omoro a ten foe a kaba e doro. So boen, wi moesoe tan na ai èn sori taki wi de, „forsektiki leki sneki ma tokoe no abi fowtoe leki doifi”. (Mat. 10:16). Wi moesoe froestan taki wi sa abi „wan hebi feti” te na a kaba èn taki horidoro na a sroto foe tan na libi.— Jud. 3; Mat. 24:13.
9 Ini a pisi foe a grontapoe pe wi e libi, a preikiwroko e go na fesi kande sondro taki wi e si taki gensman e gens wi. Disi kan meki taki wi no e bribi taki reide de foe broko wi ede serjoesoe. Tokoe a de fanowdoe foe de na ai. Situwâsi kan kenki esi-esi. Sondro taki den warskow wi na fesi, gensman kan meki gebroiki foe wan bepaalde tori èn gebroiki dati kontrari wi. Gensman di fadon komoto foe waarheid e soekoe doronomo wan sani foe kragi wi. Tiriman foe krestenhèit di e ati-bron èn di e denki taki wi doe wan sani kontrari den, kan kragi wi na poebliki. Den plan di wi abi foe bow wan Kownoekondrezaal ini wi gemeenschap kande e meki wan trobi kon di e meki a heri birti broeja. Kande den e prati lektuur di e gi sma deki-ati foe doe ogri èn di e meki sma e prakseri takroe foe wi. Sma di abi bigi nen ini a gebied kande e taki na wan fowtoe fasi foe wi, di sa meki den sma ini wi birti o handri tapoe wan feanti fasi nanga wi te wi e fisiti den. Srefi lobiwan ini wi eigi osofamiri kande no sa wani si wi na ai èn sa froefolgoe wi. So boen, a de prenspari foe tan na ai èn hori na prakseri taki a feanti fasi foe grontapoe hebi èn taki a kan opo kon ibri momenti.
10 Sortoe krakti disi moesoe abi tapoe wi? A no de foe taki dati ala den sani disi abi krakti tapoe a fasi fa wi e denki èn a fasi fa wi e si a dei foe tamara. Na sortoe fasi? A san disi moesoe meki wi frede, frede gi den sani di o pasa nanga wi? Wi moesoe doe a preikiwroko moro safrisafri foe di a e hendri sonwan ini wi birti? Wi abi reide foe broko wi ede te wan sma e wisiwasi wi na wan onregtfardiki fasi? A sa de so nomonomo taki na ogri-ati fasi fa sma e handri nanga wi o poeroe a prisiri di wi abi ini a dini di wi e dini Jehovah? A de so taki wi no de seiker fa a kaba sa de? Nôno, kwetikweti! Foe san ede?
11 Wi noiti moesoe frigiti taki a boskopoe di wi e preiki no komoto foe wi, ma foe Jehovah (Jer. 1:9). Wi de froeplekti foe teki a deki-ati: „Kari en nen. Meki den doe foe en bekènti na mindri den nâsi . . . na heri grontapoe” (Jes. 12:4, 5). A gi pasi foe sma e handri takroe nanga en pipel, nanga wan spesroetoe reide, namkoe ’foe meki en nen kon bekènti na heri grontapoe’ (Ex. 9:16). Wi e doe wan wroko di Jehovah gi wi foe doe, èn en na a wan di e gi wi deki-ati foe taki na wan frifasi (Tori. 4:29-31). A wroko disi na a moro prenspari wroko, a moro boen wroko, èn a wroko di de moro tranga fanowdoe foe doe ini den lasti dei disi foe na owroe seti foe sani.
12 A sabi disi e gi wi deki-ati foe teki wan tranga bosroiti èn kakafoetoe krinkrin teige Satan nanga a grontapoe disi (1 Petr. 5:8, 9). Foe di wi sabi taki Jehovah de nanga wi, meki wi abi „deki-ati èn de tranga” èn no wan reide no de foe frede den froefolgoe man foe wi (Deut. 31:6; Heb. 13:6). Ala di wi sa proeberi foe abi koni foe sabi san foe taki, èn foe de reidelek, èn foe abi maniri te den gensman e bedreigi wi, wi sa sori krinkrin taki wi abi a fasti bosroiti foe „arki Gado moro leki libisma” te den e tjalensi wi anbegi (Tori. 5:29). Te wan boen okasi de foe taki foe kibri wisrefi, wi sa doe dati (1 Petr. 3:15). Ma, wi no sa lasi wi ten foe hari-taki nanga tranga-ede gensman èn di abi soso belangstelling foe gi wi wan takroe nen. Na presi foe ati-bron èn foe doe den wan sani te den e wisiwasi wi noso foe di den e kroetoe wi na wan falsi fasi, wi e „meki den tan nomo foe den”. — Mat. 15:14.
13 A horidoro di wi e horidoro na ondro tesi na wan sani di e meki Jehovah e firi boen (1 Petr. 2:19). San wi moesoe doe foe meki Jehovah feni wi boen? Wi sa tan abi foe dini Jehovah sondro prisiri foe di den sma no wani si wi na ai èn e gens wi? A no de so kwetikweti! Jehovah e pramisi taki, foe di wi e gi jesi na en, a sa pai wi nanga „prisiri èn vrede” (Rom. 15:13). Ala di Jesus ben njan pina srefisrefi, a ben tan kolokoe foe „a prisiri di ben poti na en fesi” (Heb. 12:2). Na so a de nanga wi toe. Foe di a pai di wi o kisi foe di wi e horidoro, de so bigi, dan disi e boeweigi wi foe „prisiri èn djompo foe prisiri” ala di wi e njan pina foe hebi tesi (Mat. 5:11, 12). Srefi ini ten pe sani no e go leki fa wi wani, a prisiri disi srefi e meki wi preise Jehovah èn gi en grani foe horibaka gi a Kownoekondre boskopoe.
14 Reide de di meki taki wi no de seiker fa a kaba sa de, èn foe frede noso foe no sabi san foe doe? Nôno, langa na fesi den ben taki kaba fa a kaba foe a feti na mindri na organisâsi foe Jehovah nanga a grontapoe foe Satan sa de (1 Joh. 2:15-17). Awinsi o hebi noso o bigi a gens sa de, Jehovah sa meki wi wini (Jes. 54:17; Rom. 8:31, 37). Srefi te den e tesi wi dorodoro, wi sa kisi a pai seiker. Wi no abi nowan reide foe „broko wi ede foe wan sani”, bika Jehovah gi wi vrede leki wan piki tapoe den begi foe wi. — Fil. 4:6, 7.
15 Dati meki ala ten baka wi e taki Jehovah tangi te wi e kisi njoensoe foe jere taki den brada foe wi froeloesoe foe froefolgoe noso kon fri foe preiki ini gebied pe fosi den ben tapoe den. Wi e prisiri te den situwâsi e kenki èn den e opo pasi gi doesoendoesoen opregti sma foe kon sabi a Kownoekondre boskopoe. Wi de grantangi troetroe te Jehovah e froekisi foe meki wi de winiman ini afersi di abi foe doe nanga ogri-ati gensman. Wi sabi taki A sa blesi èn meki a wroko foe wi go na fesi na ala fasi di de fanowdoe foe hei en oso foe troe anbegi èn foe gi „den sani di sma wani sotè” foe ala den nâsi na okasi foe kon na inisei. — Hag. 2:7; Jes. 2:2-4.
16 Na a srefi ten wi sabi heri boen toe taki a feanti foe wi, Satan, abi foeroe makti èn taki a sa gens wi hebi, te go doro a kaba. A ròs di en e ròs wi kan de krin foe si, grofoe, noso na wan triki nanga wan bedrigi fasi. Na presi pe fosi wi ben sabi taki vrede ben de, wantewante so froefolgoe kan bigin. Ogri gensman kan proeberi na wan wan doronomo fasi èn wan ogri-atifasi, foe kwinsi wi na wan onregtfardiki fasi. Tapoe a joisti ten a sa kon krin gi den sma disi taki den „e feti troetroe teigi Gado” èn taki a sa pori den (Tori. 5:38, 39; 2 Tes. 1:6-9). A srefi joeroe ten, awinsi san e miti wi, wi abi a fasti bosroiti foe tanapoe kánkan èn tan loyaal ini a dini foe Jehovah èn ini a preiki foe a Kownoekondre boskopoe. Wi na a moro kolokoe pipel na grontapoe, bika wi sabi taki ’baka te Gado feni wi boen, wi sa kisi a kownoe-ati foe libi’. — Jak. 1:12.