De bekwaam èn srekasreka foe gi trawan leri
1 Di Jehovah ben poti Moses leki a sma di ben e teki presi gi en, dan Moses no ben firi bekwaam foe meki Gado wortoe bekènti gi Farao (Ex. 4:10; 6:12). Jeremia ben sori taki a no ben abi nofo froetrow na ini ensrefi foe man dini leki wan profeiti foe Jehovah, di a ben taigi Gado taki a no ben sabi fa foe taki (Jer. 1:6). Ala di biginbigin den no ben abi nofo froetrow na ini densrefi, tokoe ala den toe profeiti dati ben sori foe de kotoigi foe Jehovah di no ben frede. Gado ben meki den de nofo bekwaam.
2 Na ini a ten disi, tangi foe Jehovah, wi abi san wi abi fanowdoe foe doe a diniwroko foe wi nanga froetrow (2 Kor. 3:4, 5; 2 Tim. 3:17). Leki wan bekwaam monteur nanga ala wrokosani di a abi fanowdoe, wi de srekasreka na a joisti fasi foe doe a diniwroko foe wi, di wi kisi foe doe na wan konifasi. Na ini januari wi e pristeri iniwan boekoe nanga 192 bladzijde di ben kon na doro bifo 1984 èn di a gemeente abi kande. Ala di den jeje wrokosani disi no njoen, den thema foe den di abi den gron tapoe bijbel njoen ete èn den boekoe disi sa leri sma waarheid. Wi kan kenki den pristeri di e kon now èn di gi leki rai èn fiti den na awinsi o sortoe boekoe di wi e pristeri.
3 A thema leri kan gebroiki foe wiki belangstelling gi Gado Wortoe. Joe ben sa kan bigin wan takimakandra foe di joe e taki:
◼ „Na ini a ten disi sma e poti foeroe krakti na tapoe a fanowdoe foe kisi boen leri. Sortoe leri joe denki wan sma moesoe soekoe foe de seiker foe kisi a moro boen kolokoe èn a moro boen bakapisi na ini libi? [Gi okasi foe piki.] Den sma di e teki sabi foe Gado kan kisi têgo winimarki. [Leisi Odo 9:10, 11.] A boekoe disi [kari a nen foe a boekoe di joe e pristeri] abi en gron tapoe bijbel. A e sori go na a wan-enkri fonten foe sabi di kan tjari têgo libi kon.” Sori wan spesroetoe eksempre na ini a boekoe. Efoe opregti belangstelling de, dan libi a boekoe na baka èn seti sani foe meki wan gobaka.
4 Te joe e go baka na wan ososma nanga soema joe ben taki foe a prensparifasi foe bijbel leri, joe ben sa kan taki:
◼ „Na a lasti fisiti foe mi, wi ben taki foe bijbel leki a fonten foe leri di kan meki taki wi kisi wan têgo tamara. A no de foe taki dati a e aksi taki wi doe moeiti foe leri san wi moesoe sabi foe den Boekoe foe bijbel. [Leisi Odo 2:1-5.] Foeroe sma e feni en moeilijk foe froestan son pisi foe bijbel. Mi ben sa wani foe sori sjatoe wan fasi di wi gebroiki doronomo foe jepi sma leri moro foe den fondamenti bijbel leri.” Gebroiki a boekoe di ben libi na baka, drai go na wan pisi na ini di e fiti èn demo wan bijbelstudie sjatoe. Efoe na ososma wani foe abi wan doronomo studie, taki dati joe sa kon baka nanga a studie jepisani foe wi Sabi di e tjari joe go na têgo libi.
5 Foeroe sma e broko-ede nanga a pina di miljoenmiljoen pikin foe grontapoe e pina. Kande joe kan jepi na ososma foe si fa Gado e si a takroe situwâsi disi, foe di joe e taki:
◼ „Sondro tweifri joe si njoensoe tori foe pikin na heri grontapoe di de nanga angri, siki èn di no abi sorgoe. Foe san ede organisâsi di e broko den ede nanga a tori disi, no man foe meki a situwâsi kon moro boen? [Gi okasi foe piki.] Gado wani nomo san boen gi libisma. Loekoe san a e pramisi pikin nanga bigisma soleki fa a skrifi na bijbel. [Leisi Openbaring 21:4.] A boekoe disi [kari a titel] e gi moro finifini bodoi foe wan grontapoe di Gado sa meki, pe pina sa tapoe.” Efoe a kan, opo wan prenki di e sori fa a Paradijs sa de èn taki foe dati. Pristeri a boekoe èn meki mofo gi wan tra fisiti. Taki omeni a boekoe e kostoe.
6 Efoe joe ben taki a fosi leisi foe a pina di pikin e pina, joe ben sa kan go doro nanga a takimandra na a tra fisiti, foe di joe e taki:
◼ „Di mi ben de djaso no so langa pasa, joe ben sori taki joe e broko-ede nanga a takroe situwâsi foe pikin di e pina foe osofamiri libi di broko, angriten, siki nanga ogri di e doe nanga tranga. A de wan trowstoe foe leisi na ini bijbel foe wan grontapoe pe no pikin noso bigisma no sa abi siki, pen noso dede. Wan profeititori na ini a boekoe foe Jesaja e taki foe wan moro boen libi di moesoe kon na grontapoe.” Leisi èn taki foe Jesaja 65:20-25. Seti wan fondamenti te foe kaba foe hori wan bijbelstudie na ini a Sabi-boekoe.
7 Foe di begi na wan gwenti gi kerkisma, joe ben sa kan bigin wan takimakandra foe a tori disi, foe di joe e taki:
◼ „Na tapoe wan toe momenti na ini wi libi, a moro bigi pisi foe wi ondrofeni problema di boeweigi wi foe aksi Gado jepi na ini begi. Èn tokoe foeroe sma e denki taki Gado no e piki den begi foe den. A e gersi srefi taki Gado no e arki relisi fesiman di e begi na poebliki gi vrede. Wi e taki dati foe di feti nanga ogridoe di e doe nanga tranga e tan gi libisma broko-ede. Gado e arki begi troetroe? Efoe a e arki begi, foe san ede a gersi leki a no e gi piki tapoe foeroe begi? [Gi okasi foe piki.] Psalm 145:18 e taki san de fanowdoe efoe wi wani Gado arki den begi foe wi. [Leisi a tekst.] Wan sani de seiker, den begi foe sma na Gado moesoe de opregti èn moesoe de akroederi a waarheid di de foe feni na ini en Wortoe, bijbel.” Sori a boekoe di joe e pristeri, èn sori san a e taki foe a waarde foe begi.
8 Te joe e go baka na wan sma nanga soema joe ben taki a fosi leisi foe begi, joe ben sa kan proeberi foe bigin na a fasi disi:
◼ „Mi ben lobi a takimakandra foe wi foe a tori foe begi. Sondro tweifri, joe sa feni den sani di Jesus ben kari foe san wi moesoe begi, wan jepi.” Leisi Mateus 6:9, 10 di e sori den foenamkoe sani di Jesus ben kari na ini a Modelbegi foe en. Sori kapitel 16 na ini a Sabi-boekoe, „Fa joe kan kon krosibei na Gado”, èn aksi efoe joe kan demo fa foe studeri a pisi dati.
9 Te a abi foe doe nanga a prati di wi moesoe prati a sabi foe Gado nanga trawan, wi kan aksi: „Soema de bekwaam nofo èn srekasreka gi den sani disi?” Den Boekoe foe bijbel e piki: „Na wi.”—2 Kor. 2:16, 17.