Wi kan doe moro bigi wroko
1 Jesus Krestes en diniwroko ben abi toemoesi aparti wroko. Na wan wondroe fasi a ben gi doesoendoesoen sma njanjan, ben dresi foeroe sma èn ben opo son wan baka na dede (Mat. 8:1-17; 14:14-21; Joh. 11:38-44). A wroko di a ben doe ben hari a prakseri foe wan heri nâsi. Ma tokoe, a lasti neti bifo a dede foe en, a ben taigi den getrow bakaman foe en: „A sma di e sori bribi na ini mi, a sma dati sa doe so srefi den wroko di mi e doe; èn a sa doe wroko di bigi moro leki den disi” (Joh. 14:12). Fa wi kan doe ’moro bigi’ wroko?
2 Foe di wi e wroko moro kontren: A kontren di Jesus ben e wroko ben skotoe te na Palestina, ala di den fosi disipel foe en ben kisi foe jere taki den ben moesoe gi kotoigi „te na a moro farawe pisi foe grontapoe”, krinkrin moro fara leki pe Jesus srefi ben preiki (Tori. 1:8). A preikiwroko di en ben bigin, e doe now na heri grontapoe, na ini 232 kondre (Mat. 24:14). Joe abi wan prati dorodoro na ini a wroko foe a kontren di a gemeente foe joe kisi foe wroko?
3 Foe di wi e doro moro sma: Jesus ben libi wan toe disipel nomo na baka foe tan doe a preikiwroko doro. Ma tokoe, leki wan bakapisi foe a fajafaja kotoigiwroko foe den na a Pinksterfesa 33 G.T., dan den sma di ben teki a waarheid èn ben teki dopoe a dei dati ben doro so wan dri doesoen sili (Tori. 2:1-11, 37-41). A tjari kon makandra foe den wan „di ben abi a joisti jeje gi a têgo libi” go doro te na ini a ten foe wi, te wi e dopoe wan sani foe moro leki 1000 sma wan dei (Tori. 13:48). Joe e doe ala san joe kan foe doro sma di abi wan opregti ati awansi pe joe ben sa kan feni den èn joe e go baka so esi leki a kan foe fisiti den foe a belangstelling di den sori?
4 Foe di wi e preiki moro langa: A diniwroko foe Jesus na grontapoe ben de dri nanga afoe jari nomo. Foeroe foe wi, preiki moro langa kaba leki dati. Awansi o langa wi sa kisi na okasi foe go doro nanga a wroko disi, wi de nanga tangi taki wi kan jepi ibri njoen disipel foe bigin waka a pasi di e tjari sma go na libi (Mat. 7:14). Joe abi foeroe foe doe na ini a wroko foe Masra ibri moen? — 1 Kor. 15:58.
5 Wi kan tan abi a froetrow taki foe di Jesus e horibaka gi wi, wi sa doe moro bigi wroko ete leki troe disipel foe en. — Mat. 28:19, 20.