A Gran Kriaman foe wi e broko en ede nanga wi!
1 Di Jehovah ben proeberi foe rideneri nanga Israèl, a ben aksi den: „Joe no kon sabi noso joe no jere? Jehovah, a Kriaman foe den moro farawe presi foe grontapoe, na wan Gado te ten di no skotoe” (Jes. 40:28). Wi sabi a Gran Kriaman foe wi, èn wi e si fa a e sorgoe gi wi na wan lobi-ati fasi. Ma miljoenmiljoen sma e tweifri taki a de troetroe noso den e prakseri foe en heri tra fasi leki san bijbel e sori. Fa wi kan jepi den?
2 A njoen boekoe Is er een Schepper die om u geeft? (Wan Kriaman de di e broko en ede nanga joe?), meki foe jepi den sortoe sma disi. A e gi sma di e denki foe sani, wan kari foe poti prakseri na tapoe den troe tori. Den tori di e meki sma go prakseri boen foe sani èn den boeweisi na ini a boekoe disi di e overtoigi sma, moesoe kori den wan di e leisi en.
3 Kon sabi a Schepper-boekoe: Sabi den tori foe a boekoe. Kapitel 2 te go miti 5 e sori fa na universum, a libi, nanga libisma kon de èn fa a doe kon. Kapitel 6 te go miti 9 e ondrosoekoe bijbel nanga a Skrifiman foe en, èn spesroetoe a e ondrosoekoe efoe wi kan froetrow a tori foe Genesis. Kapitel 10 e gi wan piki di e gi satisfaksi na tapoe wán foe den moro dangra aksi di libisma e aksi densrefi: „Efoe a Kriaman e broko en ede nanga wi, dan foe san ede so foeroe pina de?”
4 Proeberi foe rideneri nanga den wan di e tweifri: Bladzijde 78 nanga 79 na ini a Schepper-boekoe e sori fa joe kan rideneri foe jepi sma foe kon na a joisti bosroiti ini a tori foe Gado. Aksi den: „Na universum ben abi wan bigin?” Moro foeroe sma sa agri taki a ben abi wan bigin. Efoe den e agri, dan aksi: „A kon foe ensrefi noso na wan sma ben meki en?” Moro foeroe sma e erken taki wan sma ben meki na universum. Disi e meki wi doro a lasti aksi: „Na wan sani noso wan Sma di e tan foe têgo ben meki na universum?” Nanga a fasi disi fa joe e poti aksi, joe kan jepi foeroe sma foe si taki wan Kriaman moesoe de.
5 A Schepper-boekoe na a joisti sani di foeroe sma abi fanowdoe. Prati en na joe famiriman, wrokokompe, skoromati, èn na tra sma di joe sabi boen. Abi en na joe na ini a diniwroko so taki joe kan prati en na sma di joe e miti èn di e tweifri efoe Gado de troetroe. O moro wi kon sabi a boekoe disi, o moro a lobi di wi abi gi wi Kriaman sa kon tranga, èn dati sa gi wi deki-ati foe tan waka akroederi den hei markitiki foe en.—Ef. 5:1; Openb. 4:11.