Den ben doe a wani foe Jehovah

Jesus e seni 70 disipel go

A BEN de lente na ini 32 G.T. Soso siksi moen ben de ete bifo a dede foe Jesus. Foe dati ede, foe meki a preikiwroko go moro esi èn foe gi sonwan foe den bakaman foe en moro leri, meki a ben poti 70 disipel na wroko èn „ben seni den toe na toe go na en fesi na ibri foto nanga presi pe ensrefi ben o go”. — Lukas 10:1.a

Jesus ben seni den disipel foe en „go na en fesi” so taki te Jesus srefi ben doro drape baka ten, sma ben man bosroiti moro esi efoe den ben horibaka gi a Mesias noso efoe den ben de kontrari en. Ma foe san ede a ben seni den go „toe na toe”? Soleki fa a sori, dan disi ben de foe di den ben kan gi makandra deki-ati te den ben kisi foe doe nanga gens.

Jesus, di ben wani sori krin o serjoesoe a preikiwroko foe den de, ben taigi den bakaman foe en: „A kotiwroko bigi troetroe, ma a no foeroe wrokoman de. Begi a Masra foe a kotiwroko foe dati ede, foe a seni wrokoman go doe a kotiwroko foe en” (Lukas 10:2). A ben fiti taki a ben agersi disi nanga wan kotiwroko, bika te sma ben o draidrai nanga a kotiwroko dan dati ben kan abi leki bakapisi taki boenboen groentoe nanga froktoe di ben warti ben o pori. So srefi, te den disipel no ben o poti prakseri na tapoe a preikiwroko foe den, dan warti libi ben kan lasi gowe! — Esekièl 33:6.

Dinari di no e meki sani poeroe den prakseri

Jesus ben leri den disipel foe en moro fara: „No tjari wan portmoni, noso wan njanjan-saka, noso sandaal, èn no brasa no wan sma na sei pasi foe gi en odi” (Lukas 10:4). Wan sma di ben teki waka ben abi a gwenti foe no tjari soso wan saka nanga njanjan nanga en, ma a ben tjari toe tra sandaal nanga en so srefi, bika na ondrosei foe den sandaal ben kan njan gowe èn fetre ben kan koti. Ma den disipel foe Jesus no ben moesoe broko den ede nanga den sani dati. Na presi foe dati, den ben moesoe froetrow taki Jehovah ben o meki kompe Israèlsma di ben lobi foe ontfanga sma boen, sorgoe foe den.

Ma foe san ede Jesus ben taigi den disipel foe en taki den no ben moesoe brasa no wan sma foe gi en odi? Den ben moesoe de sondro firi, èn ben moesoe de onborsoe srefi? Kwetikweti! A Griki wortoe a·spaʹzo·mai, di wani taki foe brasa wan sma foe gi en odi, kan wani taki moro leki wan switi „fa joe tan” noso „fa a e go”. A kan abi foe doe so srefi nanga a gwenti di sma gwenti gi bosi, brasa, èn hori langa takimakandra di ben feni presi te toe mati ben miti. Wan man di e froeklari sani e taki: „A fasi fa sma foe Owstoesei kondre ben gi odi no ben de soleki fa wi e doe dati nanga a boigi di wi e boigi wi ede pikinso, noso a gi di wan sma e gi wi wan anoe, ma sma ben gi makandra foeroe brasa èn ben e boigi foeroe, èn den ben e trowe densrefi go na gron srefi. Ala den sani disi ben e teki foeroe ten.” (Teki gersi 2 Kownoe 4:29.) Na so fasi Jesus ben jepi den bakaman foe en foe no meki sani di no ben de fanowdoe, ma di den ben de wan gwenti, poeroe den prakseri.

Te foe kaba, Jesus ben taigi den disipel foe en taki te den ben go na ini wan oso èn sma ben gi den wan switi kon na ini, dan den ben moesoe „tan na ini na oso dati, njan èn dringi den sani di sma [ben o] gi”. Ma te den ben go na ini wan foto èn sma no ben ontfanga den boen, dan den ben moesoe „go na tapoe den bigi pasi èn taki: ’Srefi a doti foe a foto foe oenoe, di ben tan fasi na wi foetoe wi e wai poeroe kontrari oenoe’ ” (Lukas 10:7, 10, 11). Te den disipel ben o wai noso ben o seki a doti poeroe foe den foetoe, dan dati ben o wani taki dati nanga vrede den ben libi na oso noso a foto pe sma no ben ontfanga den, gi den takroe bakapisi di ben o kon te foe kaba foe Gado. Ma den sma di ben ontfanga den disipel foe Jesus na wan switi fasi, ben sorgoe taki den de sma di ben kan kisi blesi. Na wan tra okasi, Jesus ben taigi den apostel foe en: „A sma di e ontfanga oenoe, e ontfanga mi toe, èn a sma di e ontfanga mi, e ontfanga en toe di mi seni kon. Èn iniwan sma di e gi wan foe den pikinwan disi wan kan kowroe watra foe dringi nomo bika a de wan disipel, mi e taigi oenoe foe troe, a no sa lasi en paiman kwetikweti.” — Mateus 10:40, 42.

Wi kan leri wan sani

Moro leki 5.000.000 Kotoigi foe Jehovah na heri grontapoe e doe a wroko now foe preiki a boen njoensoe foe Gado Kownoekondre èn foe meki disipel (Mateus 24:14; 28:19, 20). Den e froestan taki a boskopoe foe den na wan serjoesoe sani. Foe dati ede, den e gebroiki a ten foe den so boen leki den man, èn den e wai pasi gi sani di e poeroe a prakseri èn di ben sa meki taki den no man poti ala den prakseri na tapoe a prenspari wroko foe den.

Jehovah Kotoigi e doe moeiti foe de nanga switifasi nanga ala sma di den e miti. Ma tokoe den no e taki swititori nomo èn den no e moksi densrefi toe na ini takimakandra di abi foe doe nanga sociaal problema noso a man di a grontapoe disi no man poeroe onregtfardikifasi (Johanes 17:16). Na presi foe dati, den sani di den e taki abi moro foeroe foe doe nanga a wán têgo loesoe gi libisma problema — Gado Kownoekondre.

Sma gwenti si Jehovah Kotoigi e wroko toe na toe. Moro no ben kan doe te ibriwan foe den ben sa wroko den wawan? Kande. Tokoe den kresten na ini a ten disi e si a wini di e kon foe a wroko di den wroko sei na sei nanga wan kompe bribiman. Disi de wan kibri gi den te den e gi kotoigi na ini kontren pe kefar de. A wroko di njoen sma e wroko nanga wan patna, e gi den na okasi foe leri foe a bekwaamfasi foe den preikiman foe a boen njoensoe di abi moro ondrofeni. Troetroe, den ala toe kan gi makandra deki-ati. — Odo 27:17.

Tweifri no de taki a preikiwroko na a moro serjoesoe wroko di sma e doe na ini den „lasti dei” disi (2 Timoteus 3:1). Jehovah Kotoigi breiti taki na heri grontapoe den abi wan bradafasi di e horibaka gi den èn pe den e wroko „sei na sei gi a bribi foe a boen njoensoe”. — Filipisma 1:27.

[Foetoewortoe]