Wi sa abi legre fanowdoe ala ten?
LEGRE njan wan bigi pisi foe a goedoe foe libisma kaba èn den pori someni kolokoe kaba foe libisma. Son sma aksi densrefi foe dati ede: ’A libisma famiri oiti sa abi a sortoe seikerfasi na grontapoe di kan meki taki legre no abi foe de moro?’ Now di fetisani di kan kiri ipi-ipi sma na ini wán leisi nomo, meki taki ala libi kan pori gowe krinkrin, na aksi kon de toemoesi prenspari. O serjoesoe a de foe howpoe na tapoe wan grontapoe sondro legre?
Wan lo eksempre e sori taki te boen matifasi na mindri kondre e meki taki den e froetrow makandra, dan dati kan sorgoe taki den e poeroe sonwan foe den fetisani. A matifasi na mindri Kanada nanga Amerkankondre, foe eksempre, ben abi leki bakapisi taki a marki foe 5000 kilometer di den poti foe prati den kondre foe den, tan moro leki wán nanga afoe jarihondro sondro foe wan legre loekoe en. Noorwegen nanga Sweden meki wan srefi sortoe kroederi, èn so a de toe nanga foeroe tra kondre. Wan kroederi na mindri ala kondre kan tjari wan grontapoe kon di no abi legre? Sensi den ogri foe a Fosi Grontapoefeti, moro nanga moro sma ben kon lobi a prakseri dati troetroe soleki dati noiti no pasa ete.
Di vrede ben kon na ini 1918, dan wan foe den sani di den ben abi na prakseri nanga a vrede kroederi foe Versailles ben de „foe loekoe efoe den ben man bigin poesoe ala kondre foe no abi someni fetisani”. Na ini den jari baka dati, moro nanga moro sma ben kon tron sma di de kontrari orlokoe. Son sma di de kontrari orlokoe ben taki dati orlokoe na a moro ogri sani di kan pasa nanga wan kondre èn foe dati ede a moro ogri leki foe lasi wan strei. Gensman foe den sma di de kontrari orlokoe no ben agri, èn den ben taki dati na ini ala den jarihondro, djoe na foeroe kontren no ben gebroiki foeroe fetisani foe kakafoetoe gi di sma ben kon feti nanga den, ma tokoe sma tan proeberi na wan ogri-atifasi foe kiri den poeroe krinkrin. Afrikansma no ben abi foeroe okasi foe kakafoetoe gi den sma di ben tjari den leki srafoe go na Noord-Amerika nanga Zuid-Amerika nanga den Kribisi kondre, èn tokoe sma ben doe boen foeroe ogri nanga den foeroe jarihondro langa.
Ma di a di foe Toe Grontapoefeti ben bigin, foeroe sma di de kontrari orlokoe ben kon na a bosroiti taki kondre ben abi wan sani fanowdoe foe kibri den. Dati meki di den opo den Verenigde Nâsi baka a di foe Toe Grontapoefeti, krakti no ben poti someni moro na tapoe a poeroe di fetisani moesoe poeroe na pasi, ma moro na tapoe a wroko di kondre moesoe makandra foe tapoe pasi gi feti. Den kondre di ben de wan memre ben howpoe taki a seikerfasi di ben o kon na so fasi, ben o gi kondre deki-ati foe poeroe fetisani.
Wan tra problema ben kon na krin moro nanga moro. Nofotron a de so, taki te wan kondre e doe moeiti foe tjari seikerfasi kon gi ensrefi, dan a birtikondre no e firi ensrefi so seiker. A situwâsi disi pe den e fadon foe a wan problema go ini a trawan ibritron baka, ben abi leki bakapisi taki kondre ben strei foe abi moro fetisani. Ma no so langa pasa ete, a matifasi na mindri den bigi kondre di ben kon moro boen, tranga a howpoe foe poeroe fetisani. Ma sensi a ten dati, a Golf Orlokoe nanga den problema na ini a kondre di ben de Joegoslafia fosi meki taki foeroe sma lasi howpoe taki fetisani sa poeroe na pasi. So wan feifi jari pasa kaba, a tijdschrift Time ben taki: „Ala di a kowroe orlokoe kaba, grontapoe kon tron wan moro ogri presi na presi foe wan moro betre presi.”
Na angri foe abi wan „skowtoe” gi heri grontapoe
Foeroe sma di e loekoe fa sani e waka, e kon na a bosroiti taki a libisma famiri abi wán grontapoe tiri nomo fanowdoe nanga wan legre di tranga nofo foe gi ala sma kibri. Foe di na organisâsi foe den Verenigde Nâsi èn so srefi den moro tranga legre foe grontapoe no man doe disi, meki son sma e denki taki pikinso howpoe de nomo gi a tamara. Ma te joe e teki bijbel leki a Wortoe foe Gado, dan joe aksi joesrefi kande efoe na Almakti Gado sa poeroe wi na ini a bigi nowtoe disi.
A Sma di bijbel e kari „a Gado foe lobi nanga vrede” ben sa gebroiki legre foe tjari retidoe kon? Efoe dati de so, dan nanga sortoe legre? Foeroe foe den legre na ini a ten disi e taki dati Gado e horibaka gi den, ma den e doe a wani foe Gado troetroe? Noso Gado abi wan tra fasi foe boemoei ensrefi nanga a tori èn foe tjari vrede nanga seikerfasi kon? — 2 Korentesma 13:11.
Na Almakti Gado ben opo doe wan sani foe poeroe oproeroe di a ben jagi Adam nanga Eva gowe foe Eden èn ben poti toe keroebim leki waktiman foe Adam nanga Eva no ben man drai kon baka. A ben meki bekènti toe taki a ben abi na prakseri foe poeroe ala oproeroe kontrari a soevereiniteit foe en, na pasi (Genesis 3:15). Dati ben sa wani taki dati Gado o gebroiki wan legre?
Bijbel e froeteri foe okasi pe Gado ben gebroiki legre foe tjari a kroetoestrafoe foe en kon. Foe eksempre, den kownoekondre foe a kondre Kanan ben abi seks nanga meti, den ben òfer pikin-nengre, èn ben feti den orlokoe foe den na wan ogri-atifasi. Gado ben gi a komando foe pori den krinkrin èn a ben gebroiki a legre foe Josua foe tjari a strafoe foe En kon (Deuteronomium 7:1, 2). A legre foe kownoe David so srefi ben tjari a kroetoestrafoe foe Gado kon na tapoe den Filisteasma leki wan eksempre di e sori fa Gado sa poeroe ala godelowsoefasi na en lasti kroetoedei.
Den sani dati ben pasa foe leri wi wan sani. Jehovah ben sori taki a kan gebroiki wan legre foe kibri a pipel foe en. Ija, Jehovah abi wan aparti sortoe legre di sa opo doe wan sani foe poeroe sma na ini a heri universum di e meki oproeroe kontrari a tiri foe en.
„Jehovah foe den legre”
Bijbel e gebroiki den wortoe „Jehovah foe den legre” moro leki 250 tron. Den wortoe abi moro foeroe foe doe nanga a posisi foe Gado leki edeman foe bigi legre foe engel. Wán leisi a profeiti Mika ben taigi den kownoe Akab nanga Josafat: „Foe troe mi e si Jehovah e sidon na tapoe en kownoestoeroe èn a heri legre foe hemel e tanapoe na en, na en leti-anoesei èn na en kroektoe-anoesei” (1 Kownoe 22:19). Djaso a e taki foe legre foe engel. Jehovah ben gebroiki den legre disi foe kibri a pipel foe en. Di legre ben lontoe a foto Dotan, dan a foetoeboi foe Elisa ben lasi-ati. Ma foe gi en howpoe, dan Gado ben gebroiki wan wondroe foe meki a si En legre foe jeje kriatoeroe na ini wan fisjoen. „Jehovah ben opo den ai foe a foetoeboi, so taki a ben si; èn loekoe! a bergi kontren ben foeroe nanga asi èn nanga fetiwagi foe faja.” — 2 Kownoe 6:15-17.
Den sani dati di pasa, wani taki dati Gado e horibaka gi legre na ini a ten disi? Son legre foe krestenhèit e taki kande dati den na Gado legre. Foeroe foe den aksi den kerki tiriman foe blesi den. Ma nofotron den legre foe krestenhèit e feti nanga makandra, nanga kompe bribiman. Den toe grontapoefeti foe a jarihondro disi ben bigin na mindri legre di ben taki dati den ben de kresten legre. Disi no kan de a wroko foe Gado (1 Johanes 4:20). Ala di den legre dati kan taki dati den e feti gi vrede, a de troetroe so taki Jesus ben leri den bakaman foe en foe orga den sortoe legre dati di ben moesoe proeberi tapoe pasi gi sma di wani pori a vrede foe grontapoe?
Vrede ben pori troetroe di wan bigi groepoe sma nanga ogri prakseri ben kon nanga fetisani foe graboe Jesus hori na ini wan djari pe a ben e begi nanga den disipel foe en. Wan foe den disipel ben kisi wan man na ini a bigi groepoe sma di ben abi ogri prakseri, nanga wan feti-owroe. Jesus ben gebroiki na okasi foe tjari wan prenspari gronprakseri kon na krin. A ben taki: „Poti a feti-owroe foe joe na en presi baka, bika ala den wan di e teki a feti-owroe, sa lasi den libi nanga a feti-owroe. Noso joe denki taki mi no kan aksi mi Tata foe gi mi na a momenti disi moro leki twarfoe legioen engel?” Jesus ben de a fesiman foe wan bigi legre, ma Petrus no ben de wan sroedati foe a legre dati, èn no wan tra libisma toe. Na presi foe dati, den ben kari Petrus nanga den tra bakaman foe Jesus foe de „fisiman foe libisma” (Mateus 4:19; 26:47-53). Wan toe joeroe baka dati, Jesus ben tjari a situwâsi kon na krin gi Pilatus. A ben taki: „Mi kownoekondre no de wan pisi foe a grontapoe disi. Efoe mi kownoekondre ben de wan pisi foe a grontapoe disi, dan den dinari foe mi ben sa feti, so taki sma no ben sa gi mi abra na den djoe. Ma, soleki fa a de, mi kownoekondre no de foe a fonten disi” (Johanes 18:36). Tra fasi leki fa a ben de nanga a kownoekondre foe David di ben de na grontapoe, a Kownoekondre di Gado gi Jesus, de na hemel èn a sa tjari vrede kon na grontapoe.
Den legre foe Gado e go feti
A no sa teki langa moro fosi den legre foe Gado sa opo doe wan sani. Te Openbaring e taki foe a feti di moesoe kon, dan a e kari Jesus „a Wortoe foe Gado”. Wi e leisi: „Den legre di ben de na hemel, ben kon na en baka na tapoe weti asi, èn den ben weri weti krosi, krin linnen di ben fini. Èn wan langa srapoe feti-owroe e komopo na en mofo, foe naki den nâsi nanga en.” Bijbel e taki dati a feti disi, sa abi a kaba foe „den kownoe foe grontapoe nanga den legre foe den” leki bakapisi. Moro fara, a profeititori e taki foe trawan di no sori foe de loyaal na Gado: „Den trawan ben dede foe di a langa feti-owroe di ben komopo na a mofo foe a sma di e sidon na tapoe na asi, ben kiri den.” Srefi Satan Didibri no sa man doe noti moro. Disi sa meki troetroe taki wi sa abi wan grontapoe foe vrede sondro legre. — Openbaring 19:11-21; 20:1-3.
Prakseri foe wan grontapoe sondro orlokoe
Joe man si na ini joe prakseri wan grontapoe pe someni seikerfasi de taki legre no de fanowdoe? Wan bijbelpsalm e taki: „Kon, oen pipel, loekoe den wroko foe Jehovah, fa a poti froewondroe sani di pasa, na grontapoe. A e meki feti kon na wan kaba te na a moro farawe presi foe grontapoe.” — Psalm 46:8, 9.
Dati sa de so wan froelekti! Prakseri foe den sani di a libisma libimakandra sa man doe di kon fri te foe kaba foe a hebi lai foe pai gi den legre nanga den fetisani foe den! Sma sa man gebroiki den krakti foe sorgoe taki ala sma e libi moro betre, foe krin grontapoe èn prani na tapoe. Njoen okasi sa de foe meki njoen sani di wi sa man gebroiki troetroe gi a libisma famiri.
Na heri grontapoe, a pramisi disi sa kon troe: „Ogri di doe nanga tranga no sa de foe jere moro na in joe kondre, èn a foefoeroe di sma e foefoeroe nanga tranga noso a broko di sani e broko poeroe na a pisi kontren foe joe kondre” (Jesaja 60:18). Noiti moro miljoenmiljoen loweman di no sabi moro san foe doe, sa lowe foe presi pe sma e feti, foe di den ben moesoe gowe libi den oso nanga den goedoe foe den foe go libi na ini loweman kampoe pe soso pina de. Noiti moro sma sa sari èn krei foe lobiwan ede di sma kiri noso di kon malengri na ini feti di kondre ben sa feti nanga makandra. Jehovah en hemel Kownoe sa tjari vrede kon na grontapoe foe ala ten. „Na ini den dei foe en a regtfardikiwan sa sproiti, èn vrede pasa marki, te leki a moen no de moro. Foe kwinsi èn foe ogri di e doe nanga tranga a sa froeloesoe a sili foe den.” — Psalm 72:7, 14.
San sa de wan moro prisiri sani na foe libi na mindri sma di leri foe no abi bitafasi, ma di leri foe abi a srefi lobi di Gado abi. A wortoe foe Gado e froeteri na fesi: „Sma no sa doe no wan sortoe ogri èn no sa pori no wan sani na tapoe heri mi santa bergi; bika grontapoe seiker sa kon foeroe nanga a sabi foe Jehovah, soleki fa watra e tapoe se.” Fa a sa de foe libi na mindri sma di sabi Jehovah èn lobi en? A srefi boekoe e taki na ini wan profeititori: „A wroko foe troetroe regtfardikifasi moesoe tron vrede, èn a diniwroko foe troetroe regtfardikifasi, tirifasi nanga seikerfasi te ten di no skotoe. Èn mi pipel moesoe tan na ini wan presi pe vrede de èn na tanpresi pe sma abi dorodoro froetrow na ini èn na rostoepresi pe sma no e kisi no wan broko-ede.” — Jesaja 11:9; 32:17, 18.
Sma di bow a bribi foe den tapoe a sabi foe bijbel e si krin taki den legre foe Gado de klariklari foe poeroe ala feanti foe vrede, meki grontapoe kon krin. A sabi di den sabi disi e gi den deki-ati foe handri na tapoe a sani di bijbel e taki „moesoe pasa na ini den kaba pisi foe den dei”. Dati wani taki: „Den sa moesoe naki den feti-owroe foe den kon tron proegoe èn den lansri foe den kon tron grasi-nefi. Nâsi no sa opo feti-owroe teige nâsi, so srefi den no sa leri orlokoe moro.” — Jesaja 2:2-4.
Sma foe foeroe kondre di tron Jehovah Kotoigi troetroe ’leri kaba foe no feti’. Den froetrow na tapoe a kibri di Gado en hemel legre e gi. Te joe e studeri bijbel nanga den, dan joe so srefi kan kisi a srefi froetrow dati.
[Sma di abi a reti fu a prenki na tapoe bladzijde 28]
U.S. National Archives photo