Pe wi kan feni troetroe kolokoe?

FOEROE sma e denki taki den kan feni kolokoe te den e soekoe foe abi materia goedoe. Fa a de nanga joe? Ala di materia sani seiker kan jepi foe gi wi kolokoe, tokoe den no e gi wi a djaranti taki wi kan de kolokoe; èn so srefi wan tevrede libi na skinfasi, no e gi bribi noso no e satisferi a jeje nowtoe foe wi.

Na ini en Bergitaki, Jesus Krestes ben taki: „Kolokoe foe den sma di sabi den jeje nowtoe, bika hemel kownoekondre na foe den” (Mateus 5:3). Jesus ben taki toe: „Kibri oensrefi gi ibri sortoe bigi-ai, bika srefi te wan sma abi sani pasa marki, a libi foe en no e kon foe den sani di a abi.” — Lukas 12:15.

Foeroe sma e soekoe kolokoe na ini seks di no mag èn tra „wroko foe a skin” (Galasiasma 5:19-21). Ma te wi e gi wisrefi na den seks prisiri, dan dati no e tjari troetroe kolokoe kon di e tan langa ten. Foe taki en leti, den sma di e doe den sortoe sani disi, no sa kisi a Kownoekondre foe Gado. — 1 Korentesma 6:9, 10.

Tra sma e soekoe kolokoe na densrefi nomo, foe di den e proeberi foe meki a lespeki di den abi gi densrefi, kon moro bigi. Bibliotheek nanga boekoewenkri lai nanga boekoe di e gi sma jepi foe meki densrefi kon moro boen, ma den poeblikâsi disi no tjari kolokoe kon di e tan langa ten gi sma. So boen dan, pe wi kan feni troetroe kolokoe?

Foe de troetroe kolokoe, wi moesoe erken a jeje nowtoe foe wi di wi kisi di wi ben gebore. Jesus ben taki: „Kolokoe foe den sma di sabi den jeje nowtoe.” A no de foe taki, dati a no ben sa gi wi winimarki te wi e erken a nowtoe disi, ma wi no e doe wan sani na tapoe dati. Foe gi wan eksempre: San ben sa pasa nanga wan marathon-lonman di no ben sa dringi watra na baka te a ben lon, te en skin e angri gi watra? A no heri esi en skin ben sa lasi watra èn a ben sa abi tra takroe bakapisi? Na a srefi fasi, efoe wi no e doe wan sani na tapoe a nowtoe di wi abi foe gi wisrefi njanjan na jejefasi, dan te foe kaba, wi sa kon drei na jejefasi. Disi sa meki taki wi sa lasi prisiri nanga kolokoe.

Jesus ben erken a jeje nowtoe foe en srefisrefi, èn doronomo a ben studeri èn ben prakseri dipi foe Gado Wortoe. A ben man feni èn ben man leisi pisi foe den Santa Boekoe foe bijbel na wan makriki fasi, èn a ben leri tra sma foe doe a srefi sani. (Lukas 4:16-21; teki gersi Efeisesma 4:20, 21.) Jesus ben teki so srefi a doe di a moesoe doe a wani foe en hemel Tata, gersi nanga njanjan. A doe di a ben doe a wani foe Gado ben gi en foeroe kolokoe. — Johanes 4:34.

Ija, wi no kan kisi troetroe kolokoe te wi e soekoe foe kisi materia sani gi wisrefi; èn kolokoe no e kon so srefi te wi e gi wisrefi abra na a sondoe skin foe wi. Troetroe kolokoe na wan kondisi foe na ati, di abi en gron tapoe troetroe bribi èn tapoe wan boen matifasi nanga Jehovah Gado. A e fiti foe dati ede, taki a psalm singiman David ben singi: „Kolokoe foe a pipel di en Gado na Jehovah!” — Psalm 144:15b.

[Prenki na tapoe bladzijde 23]

Bribi èn wan boen matifasi nanga Gado sa gi joe troetroe kolokoe