Wan Grani Di den Moro Yonguwan Kan Kisi
1 Furu sma di de papa nanga mama now, e prakseri nanga prisiri baka fu wan grani di den ben abi leki pikin di den ben e gro kon na ini a waarheid — a grani fu wroko tapu Tijdschrift Dei. A wroko disi ben bigin ini ala gemeente na ini a yari 1949. Wán dei na ini wan wiki ala sma ben abi fu poti prakseri na a prati fu A Waktitoren nanga Ontwaakt! tapu strati, oso fu oso, wenkri fu wenkri, èn na tra fasi. Den moro yongu preikiman ben e angri spesrutu fu teki prati na a wroko disi, bika na so fasi den ben kisi na okasi fu du a srefi wroko di den bigi sma ini a gemeente ben e du. A ben de so tu nanga yu di yu ben de wan pikin?
2 Meki Yu Pikin Abi wan Prati: Pikin di yongu srefisrefi ete èn di no de klariklari fu bigin wan syatu takimakandra di abi en gron tapu Bijbel, kan pristeri tijdschrift na sma. Fu kan du dati, dan den musu leri fu taki wan tu syatu sani nomo. Wan tu wortu nomo, kande fu a prenki di de na tapu a kafti, sa sari. Furu ososma de klariklari fu teki den tijdschrift fu den yonguwan fu wi èn nofotron den e taki bun fu na opregtifasi fu den èn fu a bun fasi fa den yonguwan disi e tyari densrefi. Nanga pikinso yepi, a wroko disi na wan sani di pikin kan du bun srefisrefi, èn na so fasi den e yepi na wan warti fasi fu prati a Kownukondre boskopu. A no de fu taki, dati te pikin-nengre e gro kon moro bigi, dan den papa nanga mama sa wani fu yepi den, so taki den sa tan gro na ini a koni fu den fu man gi kotoigi.
3 Manuel ben bigin preiki oso fu oso di a ben abi dri yari. En papa nanga mama ben leri en fu hori wan syatu pristeri na prakseri. Manuel e preiki fayafaya makandra nanga den, èn a e prati furu tijdschrift, brochure, nanga traktaat. Manuel e gi okasi kotoigi tu. Wan leisi di en papa nanga en mama ben tyari en go na wan presi pe sma e koiri fu abi wan prisiri ten, dan a ben bigin prati wan tu traktaat gi tra sma di ben de drape. Ala di Manuel yongu srefisrefi ete, a faya di a abi gi a preikiwroko e gi trutru deki-ati na en papa nanga mama èn so srefi na a heri gemeente.—Odo 22:6.
4 Tapu a Kalender van Jehovah’s Getuigen 2000 ala satra poti fu de „Tijdschrift Dei”. Papa nanga mama, wi e gi unu a deki-ati fu wiki a belangstelling baka gi a wroko disi fu di unu e yepi den pikin fu unu fu teki prati doronomo so furu leki den kan na a preikiwroko disi di de wan grani.