Gi Gado Glori Nanga a Bun Fasi Fa Yu E Tan Tyari Yusrefi
1 Awansi pe wi de, a fasi fa wi e tyari wisrefi nanga a fasi fa wi e weri krosi èn e sorgu wisrefi e fruteri sma wan sani fu wi èn fu a Gado di wi e anbegi. Disi e kon moro krin fu si na den bigi konmakandra fu a pipel fu Gado, pe furu sma e luku wi. Te wi de wan bun eksempre, dan a nen fu Yehovah e kisi glori (1 Petr. 2:12). Ma te wan tu sma nomo no e tyari densrefi na wan bun fasi noso te den e du sani sondro fu denki, dan dati kan tyari syen kon tapu a nen fu Gado èn tapu en pipel (Preik. 9:18b). Grontapu sma e krutu na organisâsi fu wi èn a Gado di wi e anbegi, akruderi a fasi fa wi e tyari wisrefi. Te wi e hori disi na prakseri, dan dati sa meki taki wi e „du ala sani fu gi Gado glori” na wan opregti fasi.—1 Kor. 10:31.
2 Weri Krosi Di Fiti èn Tyari Yusrefi Bun na a Kongres: Awansi sortu presi wi e gebroiki fu hori a kongres, sma musu si a presi dati leki wan bigi Kownukondre zaal te a kongres e hori. Den krosi di wi e weri èn a fasi fa wi e sorgu gi wisrefi musu fiti na a okasi, neleki fa dati de krin fu si te wi e go na den konmakandra fu a gemeente na ini wi birti. Te a kongres programa e hori èn so srefi baka dati, dan brada nanga sisa no musu weri krosi di no fiti noso krosi di pôpi fu wan pisi ten nomo. Fu di den sortu krosi disi e sori fa grontapu e denki, meki a sa de muilek gi sma fu si taki wi e difrenti fu tra sma trutru. Den sisa musu luku bun taki a fasi fa den koto nanga yapon fu den de, e fiti èn taki den no syatu tumusi (1 Tim. 2:9, 10). Awansi pe wi de, na a kongres noso te wi e nyan na ini wan restaurant noso te wi e bai sani na ini wan wenkri, toku ala ten wi musu sori taki wi na dinari fu Gado èn wi no musu meki trawan naki futu.—2 Kor. 6:3.
3 Satra mamanten sma sa teki dopu na a kongres. A Waktitoren fu 1 april 1995, bladzijde 30 e taki fa wi musu tyari wisrefi na a okasi dati. A e taki dati wi „moesoe si a dopoe leki wan serjoesoe sani. A no de a ten foe bari tranga, foe hori dansi, noso foe meki toemoesi foeroe prisiri. Ma, a no de wan ten foe sari toe.” A no ben sa fiti taki den wan di e teki dopu, man noso uma, e weri krosi di span tumusi na den skin noso krosi di e meki den skin kon na doro. Na a presi fu dati, ala sma musu sori taki den si taki a Kresten dopu na wan seryusu sani èn so srefi taki a de wan sani fu prisiri.
4 Petrus e memre wi ’sortu sma wi musu de na ini a tori fu santa fasi nanga du di de ini a gi di wi gi unsrefi na ini a dini fu Gado’ (2 Petr. 3:11). Meki a de so taki den sani di wi e taki èn e du na a „Duman fu a Wortu fu Gado” Distrikt Kongres, sa yepi opregti sma di e luku fa wi e tyari wisrefi fu kon sabi èn anbegi wi bigi Gado, di warti fu kisi ala grani nanga glori.—1 Kor. 14:24, 25.