Jepi trawan foe leri den markitiki foe Gado
„A froeplekti poti na mi tapoe. Troetroe, heloe foe mi efoe mi no ben sa meki a boen njoensoe bekènti!” — 1 KORENTESMA 9:16.
1, 2. (a) Na sortoe wroko di abi toe sei Jehovah wani taki wi moesoe teki prati? (b) San opregti sma moesoe leri so taki den kan tron borgoe foe Gado Kownoekondre?
JEHOVAH abi boen njoensoe gi a libisma famiri. A abi wan Kownoekondre èn a wani, taki sma na ala pe moesoe jere foe en! Te wi kon sabi a boen njoensoe disi kaba, dan Gado e aksi taki wi e prati en nanga tra sma. A wroko disi abi toe sei. Fosi, wi moesoe preiki a boen njoensoe foe Gado Kownoekondre. Foe „a bosroiti foe a seti foe sani” Jesus ben taki na ini en profeititori: „Èn a boen njoensoe disi foe a kownoekondre sa preiki na heri grontapoe pe sma e libi, leki wan kotoigi gi ala nâsi, èn dan a kaba sa kon.” — Mateus 24:3, 14.
2 A di foe toe sani di de toe na ini a wroko disi na a leri di e gi na den sma di e doe wan sani na tapoe a Kownoekondre bariwroko. Baka di Jesus opo baka, a ben taigi wan bigi groepoe foe den disipel foe en: „Go foe dati ede, èn meki disipel foe sma foe ala nâsi, èn dopoe den na ini a nen foe a Tata èn foe a Manpikin èn foe a santa jeje, èn leri den foe doe ala den sani di mi komanderi oenoe. Èn, loekoe! mi de nanga oenoe ala den dei te na a kaba foe a seti foe sani” (Mateus 28:19, 20). Den ’sani di Krestes ben komanderi’ no ben kon foe en; a ben leri tra sma foe hori den komando, noso markitiki foe Gado (Johanes 14:23, 24; 15:10). Foe gi tra sma leri foe ’doe den sani di Krestes komanderi’ wani taki so boen foe jepi den foe leri den markitiki foe Gado. Opregti sma moesoe hori densrefi na den markitiki foe Gado foe kan tron borgoe foe en Kownoekondre.
3. San na a Kownoekondre foe Gado, èn san disi sa doe di e meki a Kownoekondre boskopoe de so wan boen njoensoe?
3 San na a Kownoekondre foe Gado? Èn san a sa doe di e meki a Kownoekondre boskopoe de so wan boen njoensoe? Gado Kownoekondre na wan hemel tiri. Jehovah e si en leki wan toemoesi warti sani, bika a de a sani di a sa gebroiki foe santa en nen, èn krin en foe ala sjen. A Kownoekondre na a wrokosani di Jehovah sa gebroiki foe sorgoe taki en wani doe na grontapoe soleki fa a de na hemel. Dati meki Jesus ben leri wi foe begi gi Gado Kownoekondre meki a kon èn a ben gi wi tranga foe poti en na a fosi presi na ini wi libi (Mateus 6:9, 10, 33). Joe e si foe san ede a de so prenspari gi Jehovah taki wi e leri tra sma foe en Kownoekondre?
A de wan tjalensi, ma a no de wan hebi
4. Fa wi kan gi wan eksempre foe sori taki a froeplekti foe wi foe preiki a boen njoensoe no de wan hebi?
4 A de wan hebi foe preiki a boen njoensoe disi? Kwetikweti! Foe eksempre: Wan papa abi wan froeplekti foe sorgoe gi en osofamiri na materia sei. Efoe a no e doe disi dan dati na a srefi leki te a ben o trowe a kresten bribi. Na apostel Paulus ben skrifi: „Ija, efoe wan sma no e sorgoe gi den sma foe en, èn spesroetoe gi den wan di de memre foe en osofamiri, dan a drai en baka gi a bribi èn a moro takroe leki wan sma sondro bribi” (1 Timoteus 5:8). Ma a froeplekti dati na wan hebi gi a kresten man? No efoe a lobi en osofamiri, bika na ini a kefal dati a wani sorgoe gi den.
5. Foe san ede wi moesoe prisiri foe teki prati na a wroko foe preiki èn foe meki disipel, ala di a de wan froeplekti?
5 Na so a de toe taki a wroko foe preiki èn foe meki disipel na wan froeplekti, wan markitiki, pe a libi foe wi e anga foe dati. Paulus ben poti en so: „A froeplekti poti na mi tapoe. Troetroe, heloe foe mi efoe mi no ben sa meki a boen njoensoe bekènti!” (1 Korentesma 9:16; teki gersi Esekièl 33:7-9.) Ma a sani di e boeweigi wi foe preiki, na lobi, èn a no de soso wan froeplekti nomo. A moro prenspari sani de taki wi lobi Gado, ma wi lobi den sma na wi sei toe, èn wi sabi o prenspari a de gi den foe jere a boen njoensoe (Mateus 22:37-39). A e gi den wan howpoe gi a tamara. Heri esi, Gado Kownoekondre sa poti onregtfardiki sani kon reti baka, poeroe ala kwinsi, èn poti vrede nanga wánfasi baka — ala den sani disi gi a têgo blesi foe den sma di e saka densrefi na ondro a regtfardiki tiri foe en. Wi no e prisiri, ija kon de fajafaja foe prati a boen njoensoe dati nanga tra sma? — Psalm 110:3.
6. Foe san ede a wroko foe preiki èn foe meki disipel de wan troetroe tjalensi?
6 Na a srefi ten, a wroko disi foe preiki èn foe meki disipel de wan troetroe tjalensi. Sma e difrenti. A no ala sma abi a srefi belangstelling noso bekwaamfasi. Son sma kisi boen skoroleri, ala di tra sma no kisi foeroe skoroleri. Leisi — san fosi ben de wan sani di sma ben prisiri foe doe — nofo tron na wan moeilek sani now gi sma. A lesi di sma lesi foe leisi, di den e taki foe dati leki „a leisi di sma man leisi, ma no abi belangstelling gi dati”, na wan problema di e kon bigi moro nanga moro srefi na kondre di e djaf taki a nomroe foe sma di kan leisi drape, hei. Dan fa wi kan jepi sma di abi someni difrenti background èn someni tra sani di abi a belangstelling foe den, foe leri den den sani di Gado e aksi foe wi? — Teki gersi 1 Korentesma 9:20-23.
Abi boen wrokosani foe jepi tra sma
7. Fa „a getrow èn koni srafoe” gi wi boen wrokosani foe kan jepi tra sma foe den leri sabi den markitiki foe Gado?
7 Wan wroko di de wan tjalensi de moro makriki foe doe te joe abi den joisti wrokosani. Wan wrokosani di boen gi wan spesroetoe wroko na ini a ten disi, den kan kenki en tamara noso den kan poti wan tra sani ini en presi srefi, foe di den sani di sma abi fanowdoe e kenki ibri leisi baka. Na so a de toe nanga a wroko di wi kisi foe meki a boskopoe foe Gado Kownoekondre bekènti. Na ini den jari di pasa, „a getrow èn koni srafoe” gi wi den joisti wrokosani, boekoe di meki spesroetoe foe gebroiki den foe hori oso-bijbelstudie (Mateus 24:45). So boen, wi kisi boen wrokosani foe kan jepi sma foe „ala nâsi lo nanga . . . tongo” foe leri den den markitiki foe Gado (Openbaring 7:9). Son leisi, tra sortoe wrokosani gi foe kan tan skinskin nanga den sani di a grontapoe veld abi fanowdoe, di e kenki ibri leisi baka. Meki wi go loekoe wan toe eksempre.
8. (a) Sortoe ròl a boekoe „God zij waarachtig” ben plèi foe meki a wroko foe gi bijbel leri, go na fesi? (b) Sortoe wrokosani foe gi bijbelstudie den ben gi na ini 1968, èn fa disi ben meki spesroetoe? (c) Fa a Waarheid-boekoe ben de wan jepi gi a wroko foe meki disipel?
8 Foe 1946 te go miti 1968, a boekoe „God zij waarachtig” ben gebroiki leki wan krakti wrokosani foe gi bijbel leri, èn den ben tjari 19.246.710 eksemplaar kon na doro na ini 54 tongo. Na ini 1968, den ben tjari a boekoe De waarheid die tot eeuwig leven leidt kon na doro, èn foeroe jari den ben abi boen bakapisi te den ben gebroiki en foe studeri bijbel nanga sma di ben abi belangstelling. Fosi, a ben de wan gewoon sani taki Jehovah Kotoigi ben studeri nanga son sma jari baka jari sondro foe den teki dopoe. Ma a wrokosani disi ben meki spesroetoe foe meki a studenti teki prati toe, èn foe gi en deki-ati foe gebroiki san a ben leri. San ben de a bakapisi? A boekoe Jehovah’s Getuigen — Verkondigers van Gods Koninkrijk e taki: „Na ini den dri dienstjari, bigin nanga 1 september 1968 te go miti 31 augustus 1971, ala nanga ala 434.906 sma ben teki dopoe — moro leki toe tron a nomroe foe sma di ben teki dopoe na ini den dri dienstjari na fesi!” Sensi di a Waarheid-boekoe kon na doro, den prati en gi boen foeroe sma — moro leki 107.000.000 na ini 117 tongo.
9. Sortoe spesroetoe sani a Libi foe têgo-boekoe abi, èn sortoe krakti a ben abi na tapoe den sma di ben tron Kownoekondre preikiman toe?
9 Na ini 1982, a boekoe Joe kan libi foe têgo na ini wan paradijs na grontapoe ben tron a moro prenspari boekoe di ben gebroiki foe hori bijbelstudie. A wrokosani disi abi moro leki 150 prenki, di ibriwan foe den abi wan spesroetoe ondro-edeprakseri di e tjari soifri kon fesi san na a sani di a prenki e leri wi. Our Kingdom Ministry (Wi Kownoekondre Dienst) foe oktober 1982 ben taki: „Na ini so wan 20 jari di ’God zij waarachtig’ ben de wi moro prenspari studie boekoe (foe 1946 te go miti a mindri foe den jari foe 1960) moro leki 1.000.000 njoen Kownoekondre preikiman ben kon na ini wi organisâsi. Dan ete 1.000.000 preikiman ben kon, di De waarheid die tot eeuwig leven leidt ben tron wi moro prenspari studie boekoe baka di den tjari en kon na doro na ini 1968. Te wi e gebroiki wi njoen studie boekoe, Joe kan libi foe têgo na ini wan paradijs na grontapoe, dan wi sa si wan srefi sortoe gro na ini a nomroe foe Kownoekondre preikiman? Seiker, efoe disi na Jehovah wani!” A de krin taki a ben de Jehovah wani, foe di foe sensi 1982 te nanga 1995, moro leki 2.700.000 ben tron Kownoekondre preikiman toe!
10. Sortoe njoen wrokosani ben gi na ini 1995, èn foe san ede a moesoe meki bijbel studenti go na fesi na jejefasi moro esi?
10 „A kotiwroko bigi, ma den wrokoman no de foeroe”, Jesus ben taki (Mateus 9:37). Foe troe a kotiwroko bigi. Foeroe de foe doe ete. Na son kondre, sma moesoe go tapoe wan lijst foe wakti te den kan kisi wan bijbelstudie. So boen, foe di „a getrow èn koni srafoe” abi na prakseri foe prati a sabi foe Gado moro esi, meki na ini 1995 a gi wan njoen wrokosani, a boekoe di abi 192 bladzijde èn di nen Sabi di e tjari joe go na têgo libi. A warti wrokosani disi no e poti prakseri na tapoe falsi leri. A e pristeri den bijbelwaarheid na wan positief fasi. Wi howpoe taki a sa meki bijbelstudenti go na fesi moro esi. A Sabi-boekoe abi en krakti kaba na tapoe a grontapoe veld foe di 30.500.000 eksemplaar druk na ini 119 tongo èn den o vertaal en na ini ete 27 tongo.
11. Sortoe boen wrokosani ben gi foe jepi foe gi leri na den sma di no kan leisi noso di no kan leisi boen, èn fa a abi foeroe krakti na tapoe foe a leriprograma di wi e gi na heri grontapoe?
11 Wanwan leisi ’a getrow srafoe’ sorgoe gi wrokosani di meki gi wan spesroetoe groepoe noso gi wan pikin groepoe nomo. Foe eksempre, san de foe taki foe sma di ben sa kan abi spesroetoe jepi fanowdoe foe den koeltoeroe noso relisi ede? Fa wi kan jepi den foe leri den markitiki foe Gado? Na ini 1982 wi ben kisi soifri san wi ben abi fanowdoe — a brochure Njan Boen Foe Tégo Foe A Libi Na Grontapoe!, wan brochure di abi 32 bladzijde. A poeblikâsi disi di lai nanga prenki, ben de wan heri boen wrokosani foe leri den sma di no man leisi noso di no e leisi so boen. A e pristeri den fondamenti bijbel leri na wan fasi di de toemoesi eenvoudig èn makriki foe froestan. Sensi di den tjari en kon na doro, dan a Njan Boen-brochure jepi wi boen foeroe na ini a leriprograma foe wi na heri grontapoe. Moro leki 105.100.000 eksemplaar druk na ini 239 tongo, èn so a ben tron a poeblikâsi di den vertaal moro ala trawan di a Waktitoren Genootschap e meki te now ete!
12, 13. (a) Gi sortoe njoen fasi foe doro moro foeroe sma, ’a getrow èn koni srafoe’ sorgoe? (b) Fa wi kan gebroiki den video foe a Genootschap na ini wi diniwroko? (c) Sortoe njoen wrokosani den ben gi no so langa pasa ete foe jepi wi na ini a wroko foe wi foe meki disipel?
12 Boiti den poeblikâsi di druk, dan foe bigin nanga 1990 ’a getrow srafoe’ gi wi wan jepi foe gi leri na wan njoen fasi so taki wi kan doro wan bigi groepoe sma — video cassettelolo. Na ini oktober foe a jari dati, a video foe 55 miniti, di nen Jehovah’s Getuigen — De organisatie achter de naam ben kon na doro — a fosi video di a Waktitoren Genootschap meki. A moi pristeri di e leri wi foeroe sani, de foe kisi na ini pikinmoro 35 tongo, èn a e sori a heri grontapoe organisâsi foe Jehovah en pipel di gi densrefi abra na en, èn di e doe a komando foe Jesus foe meki a boen njoensoe bekènti na heri grontapoe. A video meki spesroetoe foe jepi wi ini a wroko foe wi foe meki disipel. Kownoekondre preikiman no ben draidrai foe gebroiki a njoen wrokosani disi na ini a velddienst. Son wan ben poti en na ini a boekoetas foe den, èn ben de klariklari ala ten foe sori en noso foe leni en na sma di abi belangstelling. Sjatoe baka di a video disi kon na doro, wan opziener di e rèis ben skrifi: „Video kon de wan jepi foe a di foe 21 jarihondro, foe doro a denki èn a froestan foe miljoenmiljoen sma, dati meki wi howpoe taki a video disi sa de soso a fosiwan foe den foeroe video di a Genootschap sa gebroiki foe meki a Kownoekondre wroko na heri grontapoe go na fesi.” Ija, moro video gi, so srefi den dri pisi wan foe De bijbel — Een boek met feiten en profetiën nanga Jehovah’s Witnesses Stand Firm Against Nazi Assault. Efoe den video foe a Genootschap de foe kisi na ini joe tongo, joe gebroiki den kaba na ini joe velddienst?a
13 No so langa pasa ete, wan njoen wrokosani, a brochure San Gado e aksi foe wi?, ben gi foe jepi wi na ini a wroko foe wi foe meki disipel. Foe san ede a ben kon na doro? Fa wi kan gebroiki en?
Ondrosoekoe wan njoen wrokosani
14, 15. Gi soema na Aksi-brochure meki, èn san a abi na ini?
14 A njoen poeblikâsi San Gado e aksi foe wi? meki gi sma di e bribi na ini Gado kaba èn di abi lespeki gi bijbel. Opziener di e rèis èn zendeling di teki leri na Gilead èn di foeroe jari kaba abi ondrofeni na ini den pôti kondre, ben jepi foe sreka a brochure disi. A abi wan studie kursus na ini, di abi ala sani na ini di abi foe doe nanga fondamenti bijbel leri. Den wortoe skrifi na wan switi fasi, den de makriki foe froestan èn den e taki krin foe sani. Na a srefi ten, san de na ini no de toemoesi eenvoudig. A no e gi „merki” nomo ma „tranga njanjan” toe foe Gado Wortoe na wan fasi di moro foeroe sma moesoe man froestan. — Hebrewsma 5:12-14.
15 Na ini den jari di no pasa so langa ete, Kownoekondre preikiman na difrenti kondre aksi foe joisti so wan poeblikâsi. Foe eksempre, a bijkantoro foe a Waktitoren Genootschap na Papoewa Njoen-Ginea ben skrifi: „Den relisi leri di de kontrari makandra, e broeja sma. Den sma abi wortoe foe soifri waarheid fanowdoe, pe wan toe bijbeltekst e horibaka gi dati èn di den kan soekoe na ini den eigi bijbel. Den abi wan krin èn spesroetoe pristeri fanowdoe foe san Gado e aksi foe troe kresten èn sortoe gwenti nanga doe a no feni boen.” Na Aksi-brochure na soifri san wi abi fanowdoe foe jepi den sortoe sma dati foe leri den markitiki foe Gado.
16. (a) Soema spesroetoe kan kisi wini foe na eenvoudig fasi fa sani tjari kon na krin na ini a njoen brochure? (b) Fa den sma na ini joe kontren ben sa kan kisi wini foe na Aksi-brochure?
16 Fa joe kan gebroiki a njoen wrokosani disi? Na a fosi presi, joe kan gebroiki en foe studeri nanga sma di abi moeiti foe leisi noso di no e firi someni foe leisi.b Den sortoe sma dati kan kisi wini foe na eenvoudig fasi fa sani tjari kon na krin na ini a brochure. Baka di den bijkantoro foe a Waktitoren Genootschap loekoe wan eksemplaar foe a poeblikâsi disi di den ben druk na fesi, dan den ben skrifi san e kon now: „A brochure sa de wan heri boen jepi na foeroe presi na ini a kondre pe sma no e firi someni foe leisi foeroe” (Brasjon). „Foeroe doroseikondre-sma de di no kan leisi a tongo foe den èn di te now ete abi pikinso moeiti foe leisi Fransitongo. A brochure disi kan gebroiki leki wan jepi foe studeri nanga den sortoe sma dati” (Fransikondre). Joe kan denki foe sma na ini a presi pe joe de di na Aksi-brochure ben sa kan de wan jepi gi den?
17. Na sortoe fasi a njoen brochure kan de wan boen jepi na ini foeroe kondre, èn foe san ede?
17 Na a di foe toe presi, na foeroe kondre a brochure kan de wan boen jepi foe bigin bijbelstudie nanga sma di e frede Gado, a no abi bisi omeni skoroleri den kisi. A no de foe taki, dati moeiti moesoe meki foe bigin wan studie na ini a boekoe Sabi di e tjari joe go na têgo libi. Ma son leisi a de moro makriki foe bigin wan studie na ini wan brochure. Dan na wan joisti ten, a studie moesoe go abra tapoe a Sabi-boekoe, a moro prenspari jepisani di wi abi foe studeri nanga sma, èn di wi feni moro boen. Den bijkantoro foe a Waktitoren Genootschap ben skrifi foe a gebroiki di wi moesoe gebroiki na Aksi-brochure disi: „A de wan moeilek sani foe bigin nanga bijbelstudie, èn den okasi foe bigin nanga wan studie sori moro betre te preikiman e bigin nanga wan brochure” (Doisrikondre). „Wan brochure leki a wan disi sa wroko boen srefisrefi te joe wani bigin nanga njoen bijbelstudie, èn baka dati joe ben kan go doro nanga a Sabi-boekoe” (Italia). „Ala di den sma foe Japan kisi boen skoroleri, tokoe moro foeroe foe den no sabi foeroe foe bijbel èn den fondamenti leri foe en. A brochure sa de wan boen jepisani foe bigin jepi sma èn baka dati go abra tapoe a Sabi-boekoe” — Japan.
18. San wi moesoe memre foe a doro di wi moesoe doro den markitiki foe Gado?
18 Den bijkantoro foe a Genootschap na heri grontapoe ben aksi foe a brochure disi, èn den kisi primisi foe vertaal en na ini 221 tongo. Meki a njoen poeblikâsi disi sori foe de wan warti sani foe jepi wi foe kan leri tra sma san Jehovah Gado e aksi foe den. Foe wi sei, meki wi memre taki foe doro den markitiki foe Gado, so srefi a komando foe preiki èn foe meki disipel, e gi wi wan moi okasi foe sori Jehovah omeni wi lobi en. Ija, san Gado e aksi foe wi no de wan hebi. A de a moro boen fasi foe libi! — Psalm 19:7-11.
[Foetoewortoe]
a A boekoe Jehovah’s Getuigen — Verkondigers van Gods Koninkrijk e taki: „Video cassettelolo kwetikweti no e teki a presi foe san skrifi tapoe bladzijde noso foe a kotoigiwroko di ibriwan foe wi e doe. Den poeblikâsi foe a Genootschap tan plèi wan prenspari ròl foe panja a boen njoensoe. Na oso-foe-oso wroko foe Jehovah Kotoigi tan de wan fasi foe a diniwroko foe den di abi wan boen fondamenti na tapoe bijbel. Ma video cassettelolo e horibaka now gi den leki warti wrokosani di e meki sma kon bribi den moi pramisi foe Jehovah èn e meki den kisi warderi gi san a e meki sma doe na grontapoe na ini a ten foe wi.”
b Efoe joe wani taki sani tjari kon na krin gi joe fa joe kan hori wan studie na ini na Aksi-brochure, dan loekoe na artikel „Wan njoen wrokosani foe jepi sma foe kon leri sabi den markitiki foe Gado”, tapoe bladzijde 16 nanga 17.
Joe kan tjari disi kon na krin?
◻ Sortoe wroko di abi toe sei Jehovah e aksi den foetoeboi foe en foe teki prati na dati?
◻ Foe san ede a froeplekti foe wi foe preiki èn foe meki disipel, no de wan hebi gi wi?
◻ „A getrow èn koni srafoe” sorgoe gi sortoe wrokosani foe gebroiki den na ini a wroko foe wi foe preiki èn foe meki disipel?
◻ Gi soema na Aksi-brochure meki, èn fa wi kan gebroiki en na ini wi diniwroko?
[Prenki na tapoe bladzijde 24]
A wroko di wi e doe foe preiki èn foe meki disipel no de wan hebi
[Prenki na tapoe bladzijde 26]
„God zij waarachtig” (1946, den kenki en na ini 1952): 19.250.000 na ini 54 tongo (Eksempre na ini Ingrisitongo)
„De waarheid die tot eeuwig leven leidt” (1968): 107.000.000 na ini 117 tongo (Eksempre na ini Fransitongo)
„Joe kan libi foe têgo na ini wan paradijs na grontapoe” (1982): 80.900.000 na 130 tongo (Eksempre na ini Rosiatongo)
„Sabi di e tjari joe go na têgo libi” (1995): 30.500.000 na ini 119 tongo (Eksempre na ini Doisritongo)