Yu Na wan Sma Di E Syensyen?
1 A no e fruwondru wi te wi e si taki wan yongu pikin e tanapu na baka en papa noso en mama, e piep luku wi. Na so a de nanga pikin-nengre moro furu. Den e syensyen. Srefi furu bigisma e syensyen pikinso. San yu kan du, efu yu no man preiki so bun fu di yu e syensyen?
2 Kakafutu Gi a Syen Di Yu E Syen: A prenspari fu poti prakseri na „a fasi fa wan sma de trutru na ini en ati” (1 Petr. 3:4). Meki a lobi di yu abi gi Yehovah nanga a sma na yu sei, kon moro bigi. Abi na overtoigi dorodoro taki te yu e du a preikiwroko, dan dati na wan fu den moro bun fasi fu sori taki yu lobi fu gi yusrefi. Meki muiti fu abi a bun gwenti fu studeri nanga yusrefi èn fu go na den konmakandra. Begi doronomo èn aksi spesrutu taki Yehovah kan yepi yu ini a tori disi. Te wi abi wan tranga bribi nanga frutrow na ini en, dan wi o kisi „moro deki-ati fu taki a wortu fu Gado sondro frede”.—Fil. 1:14.
3 Feti fu puru a firi taki yu no abi nofo koni fu du sani. A sori taki Timoteus ben abi fu du disi. Paulus ben gi Timoteus deki-ati fu „no meki no wan sma wisiwasi den yongu yari fu en” fu di a ben memre en taki „Gado no ben gi wi wan yeye fu wan fredeman, ma wan yeye fu krakti” (1 Tim. 4:12; 2 Tim. 1:7). Yehovah ben gebroiki Timoteus dorodoro. Efu yu e go na fesi ala di yu e frutrow tapu En dorodoro, dan a sa du dati nanga yu tu.—Ps. 56:11.
4 Di wan sisa ben prakseri wan bijbeltekst soleki Mateus 10:37, dan dati ben yepi en fu wini a frede di a ben abi gi en masra di ben e gens en. Di a ben horidoro, dan a diniwroko ben kon tron moro makriki gi en, èn te fu kaba en masra, en mama nanga den brada fu en, den alamala ben teki waarheid.
5 A Prenspari fu Sreka Yusrefi: Yu sa abi moro frutrow te yu e sreka yusrefi heri bun gi a diniwroko. Teki wan makriki pristeri fu a Redeneren-buku noso fu Wi Kownukondre Dienst di ben tyari kon na doro kaba, sreka dati èn oefen en heri bun. Na presi fu denki sani di kan meki taki yu e fredefrede fu soso, dan prakseri o bun sani kan waka. Teki deki-ati fu di yu e wroko krosibei makandra nanga trawan. Hori na prakseri taki furu fu den sma di yu e miti te yu e wroko oso fu oso, e syensyen neleki yu. Ibri sma abi a Kownukondre boskopu fanowdu.
6 Efu yu e syensyen, dan no lasi-ati. Te yu e meki muiti, dan Yehovah sa yepi yu fu de wan bun preikiman fu a bun nyunsu. Dan yu sa abi prisiri na ini yu diniwroko.—Odo 10:22.