A sreka di joe e sreka joesrefi — Wan sroto foe abi boen bakapisi
1 Te wi e sreka wisrefi na fesi gi a diniwroko, dan dati sa jepi wi foe wini iniwan tweifri di wi ben sa kan abi foe abi wan prati na ini a velddienst. Te joe e go na den ososma, dan joe sa sabi san joe wani taigi den ososma. Joe no abi foe broko joe ede nanga den tjalensi di joe ben sa kan miti. Te joe komoto na a velddienst, joe sa firi taki joe kisi deki-ati foe di joe sabi taki joe meki boen moeiti na ini a diniwroko. Ija, a sreka di wi e sreka wisrefi finifini, na a sroto foe srapoe den bekwaamfasi foe wi foe preiki èn foe gi leri.
2 Paulus ben poti krakti tapoe a sreka di wi moesoe sreka wisrefi foe di a gi tranga foe meki wi „foetoe weri soesoe foe a boen njoensoe foe vrede” (Ef. 6:15). Disi abi na ini toe foe sreka wi prakseri nanga wi ati èn so srefi foe abi wan positief fasi foe si sani èn wan fasi di e sori taki wi wani. Te wi sreka wisrefi foe prati waarheid nanga trawan, dan a paiman foe a wroko foe wi sa de Kownoekondre froktoe di sa meki wi kolokoe. — Tori. 20:35.
3 Fa foe sreka wisrefi gi a preikiwroko: Wi moesoe teki wan pristeri di wi sabi taki wi man gebroiki en boen, kande na mindri den wan di den gi leki rai na ini a „Redeneren”-boekoe noso den wan di de foe feni na tapoe a lasti bladzijde foe Wi Kownoekondre Dienst. Prakseri boen foe a tekst di joe denki foe gebroiki, foe bosroiti sortoe wortoe noso zin joe sa gebroiki di sa meki na edeprakseri foe joe kon na krin moro boen. A no de fanowdoe foe leri a pristeri na ede; na presi foe dati, a boen foe froestan a sani di joe wani taki, poti en na ini joe eigi wortoe èn taki foe en tapoe wan fasi di joe denki taki kan hari a prakseri foe na arkiman foe joe.
4 Ondrosoekoe a poeblikâsi di joe e denki foe pristeri èn teki wan toe edepenti di e hari sma belangstelling èn di den wani taki foe. Teki wan toe sani di joe denki taki sa hari a belangstelling foe sma na ini joe gebied. Prakseri fa joe ben sa kan fiti a pristeri foe joe na difrenti ososma — wan man, wan oema, wan moro grani sma noso wan jongoesma.
5 Joe ben proeberi foe oefen tapoe wan praktis fasi? Kon makandra nanga tra memre foe na osofamiri noso tra preikiman foe taki sortoe pristeri ben sa kan abi boen bakapisi, èn oefen den baka dati so taki ibriwan jere en boen èn ala sma kan abi en boen na prakseri. Proeberi foe gebroiki troetroe situwâsi èn sani di sma e taki foe tapoe wan takimakandra, leki fa joe ben kan miti na ini a gebied. So wan oefening sa meki joe fasi foe taki grati go na fesi, sa meki joe abi moro boen bakapisi na ini a preikiwroko, èn sa bow a froetrow foe joe.
6 Boiti a sreka di joe e sreka joesrefi èn na oefen di joe e oefen joe pristeri, joe moesoe aksi joesrefi, ’A krosi di mi denki foe weri, fiti gi a diniwroko? Mi abi san mi abi fanowdoe na ini mi tas, so srefi den poeblikâsi di mi denki foe gebroiki? A de na ini wan boen kondisi? Mi abi mi „Redeneren”-boekoe, traktaat, oso-foe-oso rapport nanga wan potlood?’ A sreka di joe e sreka joesrefi na fesi sa jepi joe foe abi wan dei nanga moro boen bakapisi na ini a diniwroko.
7 Te wi doe ala moeiti di wi kan foe sreka wisrefi, dan wi moesoe begi taki a jeje foe Jehovah jepi wi foe abi boen bakapisi (1 Joh. 5:14, 15). A poti di wi e poti boen prakseri na a sreka di wi moesoe sreka wisrefi, sa abi leki bakapisi taki wi sa feni moro prisiri na ini wi wroko, ala di wi e ’doe wi diniwroko dorodoro’. — 2 Tim. 4:5.