A Sreka Di Wi E Sreka Wisrefi na Fesi E Tyari Prisiri Kon
1 A teki di wi e teki prati na velddienst e tyari bigi prisiri kon gi wi (Ps. 89:15, 16). A no de fu taki, dati a sreka di wi e sreka wisrefi de wan prenspari sani fu man kisi prisiri dorodoro. Te wi e sreka wisrefi moro bun, dan wi sa man du moro èn te wi man du moro, dan a prisiri fu wi sa de moro bigi.
2 Gebroiki den Wrokosani Di Wi Kisi: Bigin nanga a sreka di yu e sreka yusrefi, fu di yu e leisi èn e ondrosuku finifini san skrifi na ini Wi Kownukondre Dienst. Furutron a abi pristeri di den prakseri bun bifo den meki den èn di meki fu yepi yu fu pristeri a Kownukondre boskopu makriki èn nanga bun bakapisi. Yu sa feni eksempre di e sori fa fu kakafutu gi genstaki di sma gwenti fu gebroiki. Spesrutu rai e gi fa yu kan tyari wan gobaka nanga bun bakapisi, nanga a marki fu opo wan bijbelstudie. Yu de fri fu fiti den rai disi ini yu diniwroko so taki yu e firi bun te yu e gebroiki den. Boiti disi, yu abi Fa fu bigin èn go doro nanga bijbel takimakandra, di abi furu inleiding èn so srefi piki gi sma di wani tapu a takimakandra, èn disi e yepi yu fu abi moro bun bakapisi na ini furu fu den situwâsi di yu e miti.
3 Luku ini a heri publikâsi di yu wani pristeri, èn teki wan noso tu moi penti di yu kan sori na ososma fu wiki a belangstelling fu en. Wan nyunsu di yu yere noso leisi èn di e meki sma go denki, sa yepi yu feni wan olo fu bigin nanga wan takimakandra. Hori wan tu genstaki na prakseri di kande yu sa miti nanga den, èn hori wan tu sani na prakseri fa yu ben sa piki. Baka dati, gebroiki wan tu miniti fu oefen san yu sa taigi na ososma.
4 Fisiti Ibri Diniwroko Konmakandra: Arki bun na a ten di a Diniwroko Konmakandra e hori te den e taki fu den rai di gi na ini Wi Kownukondre Dienst, noso te den e luku den syatu baka, noso e demo den. Poti prakseri na den idea di yu denki taki yu kan fiti den na ini yu pristeri. Memre wan tu situwâsi di yu gwenti fu miti ala ten na ini a diniwroko, èn prakseri fu fasi fa yu kan gi kotoigi moro bun. Taki fu den sani disi nanga tra preikiman fosi a konmakandra bigin en te a kaba.
5 Yu kan de seiker taki te yu de „srekasreka gi ibri bun wroko”, dan yu sa kisi moro furu prisiri leki pai èn yu sa abi moro bun bakapisi te yu sa yepi tra sma fu feni a pasi fu libi.—2 Tim. 2:21.