De nanga joe heri-ati ini a velddienst
Pisi 2: Kweki faja
1 A de moro makriki foe abi faja gi wan sani te wi e doe en nanga prisiri. Èn moro foeroetron a de so toe taki wan sma e feni en wan prisiri sani foe doe wan sani di a ben sreka ensrefi a tapoe. Dati seiker de troe ini a tori foe doe wi diniwroko dorodoro.—2 Tim. 4:5.
SREKA DE TOEMOESI PRENSPARI
2 A faja foe wi ini a velddienst abi wantewante foe doe nanga ofara wi sreka wisrefi èn omeni leisi wi e go ini a velddienst. Foe eksempel san wi ben sa kan taki te wi e miti wan sma, ini a oso-foe-oso-diniwroko,di e taki dati a de wan moslim? Wan preikiman di sreka boen ben sa kan piki wan sani leki: „Dati na wan span sani. Mi no taki foeroe nanga moslim. Ma na ini na anoeboekoe disi mi ben leisi foe wan toe foe den leri foe joe kerki [Opo naki a Taki-go-taki-kon-boekoe na bladzijde 24.] Djaso tanapoe taki oen e bribi taki Jesus ben de wan profeiti ma taki Mohammed ben de na lasti èn moro prenspari profeiti. Dati de so? [Gi okasi foe piki.] Joe e bribi toe taki Moses ben de wan troe profeiti? [Gi okasi foe piki, leki fa a sori a sa piki „ija”.] Mi kan sori joe na ini den Santa Boekoe san Gado ben leri Moses foe Gado eigi nen?” Moro fara joe ben sa kan leisi Exodus 6:3. Na a fasi disi joe kan bigin wan span takimakandra.
3 Gi foeroe foe wi a de moeilek foe hori den spesroetoe nomroe foe bladzijde na ede. Ma nanga wan pikinso sreka nanga oefen wi kan meki wan boen gebroiki foe a pisi na fesisei foe a Taki-go-taki-kon-boekoe foe „no wani wan takimakandra”. A pisi dati abi difrenti bladzijde nanga bodoi foe jepi wi foe bigin wan takimakandra nanga sma di e taki dati den abi wan bepaalde relisi.
4 Na Taki-go-taki-kon-boekoe abi so srefi wan toemoesi moi pisi nanga inleiding. Foe san-ede joe no e meki den inleiding foe joe akroederi den eksempel disi? A kan de taki wi moesoe fiti wi pristeri na a situwâsi. Na a kaba foe moro foeroe foe den tori na ini a Taki-go-taki-kon-boekoe a pisi tanapoe foe „Te wan sma e taki”, nanga piki tapoe spesroetoe aksi nanga edeprakseri ofoe genstaki di abi foe doe nanga a tori. Ma den toemoesi moi bodoi disi abi soso waarde ini akroederi a marki fa wi e gebroiki den na a sreka na fesi foe wi.
FA JOE KAN SREKA JOESREFI
5 Loekoe boen foe sortoe boekoe den sa taki tapoe a dienstkonmakandra èn sorgoe taki joe abi den na joe, so taki, te den e sori go na den ini den takimakandra nanga den demonstrâsi, joe kan loekoe na ini den. Na a fasi disi joe kan abi moro wini foe a sreka di trawan e sreka densrefi.
6 A de boen foe gebroiki pikinso ten foe sreka gi a velddienst. Joe moesoe de seiker taki joe abi den boekoe di joe sa abi fanowdoe. Teki wan toe miniti foe loekoe na Tori foe Takimakandra. Leisi den bijbeltekst di wi o gebroiki ete wan leisi èn loekoe sortoe spesroetoe penti foe takimakandra joe kan feni na ini den boekoe foe kan tjari dati kon na a prakseri foe a sma. A kan de toemoesi boen foe doe disi nanga makandra, leki osofamiri.
7 Teki a ten foe oefen. Joe kan oefen na difrenti ten — baka a gemeente boekoestudie, na prisiri demakandra, nanga wan pikin groepoe na ini oto ofoe te joe e waka foe a wan doro go na a trawan ini a velddienst. A kan de wan toemoesi prisiri sani foe doe pristeri èn foe taki foe den èn foe demonstreer fa joe loesoe genstaki, èn a e gi wi moi okasi foe meki wi bekwaamfasi kon moro boen.
8 Fajafaja sreka sa meki wi faja ini a dienst kon moro bigi, so dati wi kan tron bekwaam wrokoman èn kan kisi satisfaksi nanga foeroe prisiri. — Joh. 2:17.