Den blesi foe a pionierwroko
„A blesi foe Jehovah — dati na san e meki sma kon goedoe, èn a no e poti pen na tapoe.” — ODO 10:22.
1, 2. (a) Fa wán pionier ben taki san a e denki foe a foeroeten diniwroko? (b) Foe san ede pionier man prisiri moro foe a wroko foe meki disipel?
„WAN moro bigi prisiri kan de, leki foe si wan sma di joe ben studeri nanga en e tron wan aktief prèiseman foe Jehovah? A de wan bigi prisiri èn wan sani di e tranga a bribi te joe e si omeni krakti a Wortoe foe Gado abi foe meki sma tjari kenki kon na ini den libi, so taki den kan plisi Jehovah.” Na so wan pionier foe Kanada ben skrifi di de na ini a foeroeten diniwroko moro leki 32 jari kaba. A e taki foe a pionierwroko foe en: „Mi no kan si misrefi e doe wan tra sani. Èn mi no denki srefisrefi taki wan tra sani ben sa de di e gi a srefi prisiri.”
2 Joe e agri taki a e gi foeroe prisiri te joe abi wan prati na a wroko foe jepi wan sma foe kon na tapoe a pasi foe libi? A no de foe taki, dati den pionier a no den wan-enkri sma di abi a prisiri dati. Ala foetoeboi foe Jehovah kisi a komando foe „meki disipel foe sma” èn den e doe moeiti foe doe disi (Mateus 28:19). Ma foe di pionier man wroko foeroe joeroe na ini a velddienst, meki nofotron den e prisiri krinkrin foe a wroko di den e doe foe meki disipel. Ma a pionierwroko e gi joe satisfaksi na tra fasi toe. Taki nanga den pionier, èn den sa froeteri joe taki a pionierwroko na wan heri moi fasi foe ondrofeni ’a blesi foe Jehovah di e meki sma kon goedoe’. — Odo 10:22.
3. San ben kan gi wi deki-ati te wi e go doro foe dini Jehovah?
3 No so langa pasa ete, den ben aksi pionier na difrenti presi foe grontapoe foe taki foe den blesi di den ondrofeni na ini a foeroeten diniwroko. Kon meki wi go loekoe san den ben abi foe taki. Ma no lasi-ati efoe joe no man doe someni na ini a diniwroko foe di joe gosontoe swaki, joe e kon owroe, noso foe tra situwâsi ede. Hori na prakseri taki a prenspari sani de foe dini Jehovah nanga joe heri sili, awansi na sortoe fasi dati de toe. Ma tokoe, te joe e jere san pionier e taki, dan dati kan meki a belangstelling di joe abi foe bigin nanga a moi wroko disi efoe joe man, kon moro bigi.
Troetroe firi foe satisfaksi nanga prisiri
4, 5. (a) Foe san ede a de wan ondrofeni di e gi satisfaksi, te wi e prati a boen njoensoe nanga trawan? (b) San pionier e denki foe a teki di den e teki prati na ini a diniwroko foeroeten?
4 „Moro kolokoe de ini a gi foe sani, leki ini a kisi foe sani”, Jesus ben taki (Tori foe den Apostel 20:35). Ija, te wan sma e gi sondro foe prakseri ensrefi nomo, dan dati e gi satisfaksi (Odo 11:25). Dati de spesroetoe so te joe e prati a boen njoensoe nanga tra sma. Troetroe, sortoe moro bigi goedoe wi ben kan gi wan kompe libisma leki foe jepi en foe kisi a sabi foe Gado, san abi têgo libi leki bakapisi? — Johanes 17:3.
5 A no de foe froewondroe taki den sma di abi wan prati na a foeroeten diniwroko e taki nofotron foe a prisiri nanga a bigi satisfaksi di den e kisi foe a diniwroko foe den. „Mi sabi taki no wan tra wroko ben kan gi mi a satisfaksi di mi e kisi te mi e prati a waarheid nanga trawan”, na so wan pionier na Ingrisikondre di abi 64 jari e taki. Wan weduwe na Zaire ben taki san a pionierwroko ben wani taki gi en: „A pionierwroko ben de wan troetroe trowstoe gi mi baka di mi ben lasi mi lobi masra. O moro mi e go na ini a diniwroko foe jepi tra sma, o moro mendri mi e firi sari foe a lasi dati. Mi e poti mi bribi na ini den pramisi foe Jehovah èn moro foeroe mi e sidon prakseri fa mi kan jepi den sma di mi e studeri nanga den foe den tjari kenki kon na ini den libi. Na a kaba foe ibri dei, mi e sribi switi, èn mi ati foeroe nanga prisiri.”
6. Sortoe spesroetoe prisiri son pionier ondrofeni?
6 Son sma di doe a pionierwroko someni tenti jari kaba ben prisiri spesroetoe foe di den ben dini na ini farawe kontren, èn ben opo gemeente, di ben kon tron kring baka ten. Foe eksempre, na Abashiri, Hokkaido (wan èilanti di de te na a noordsei foe Japan), wan sisa de di de wan pionier so wan 33 jari kaba. A sabi ete taki na tapoe a fosi kring konmakandra di ben hori na Hokkaido, soso 70 sma ben de. Èn now? Den abi 12 kring na tapoe na èilanti dati, nanga moro leki 12.000 preikiman. Joe kan prakseri fa en ati e foeroe nanga prisiri te a e go na den konmakandra nanga kongres nanga den ipi-ipi kompe Kownoekondre preikiman na tapoe na èilanti dati!
7, 8. Sortoe prisiri moro foeroe sma di e pionier wan heri pisi ten kaba, ondrofeni?
7 Tra sma di de pionier wan heri pisi ten kaba, prisiri foe si bijbel studenti e teki dopoe èn baka dati soekoe foe kisi moro bigi grani na ini a diniwroko. Na Japan, wan sisa di dini na ini neigi difrenti pionier toewijzing sensi 1957 sabi ete taki wan jongoe oema di ben e wroko na wan bangi, ben teki wan Ontwaakt! na en. A no ben kisi neigi moen srefi di a jongoe oema ben teki dopoe. Baka ten a ben trow, èn en nanga en masra ben tron spesroetoe pionier. Fa a ben de wan prisiri gi a pionier sisa di, na ini en di foe dri toewijzing, a njoen kringopziener nanga en wefi — a sma di fosi ben de wan bijbelstudenti foe en — ben kon fisiti a gemeente!
8 A no de foe froewondroe taki den sma di ben meki a pionier diniwroko de a libiwroko foe den, e si disi leki „wan warti grani di wi moesoe warderi”, soleki fa wan pionier ben taki di de 22 jari ini a wroko kaba!
A boeweisi taki Jehovah e sorgoe foe wi
9. San Jehovah, leki a Gran Sma di e sorgoe foe trawan, e pramisi den foetoeboi foe en, èn san disi wani taki gi wi?
9 Jehovah, a Gran Sma di e sorgoe foe trawan, e pramisi foe jepi den foetoeboi foe en, foe di a e sorgoe foe den na jejefasi èn na materia sei. Kownoe David foe owroeten ben taki en heri boen: „Wan ten ben de taki mi ben de wan jonkoeman, mi kon owroe toe, èn tokoe mi no si no wan regtfardikisma libi en wawan krinkrin, noso den pikin foe en e soekoe brede” (Psalm 37:25). Ma tokoe a no de so, taki a djaranti disi foe Gado e gi wi wan reide foe no doe a froeplekti di wi abi foe sorgoe foe wi osofamiri na materia sei, èn a no e gi wi pasi toe foe froetrow nomo tapoe a lobi di wi kresten brada lobi foe gi sani (1 Tesalonikasma 4:11, 12; 1 Timoteus 5:8). Ma tokoe, te wi de klariklari foe tjari ofrandi na ini wi libi so taki wi kan dini Jehovah moro boen, dan noiti a no sa gowe libi wi. — Mateus 6:33.
10, 11. San foeroe pionier sabi foe a man di Jehovah man sorgoe foe sma, foe di den ondrofeni disi?
10 Pionier na heri grontapoe sabi foe na ondrofeni di den abi, taki Jehovah e sorgoe foe den sma di e gi densrefi abra na a sorgoe foe en. Loekoe a tori foe wan pionier trowpaar di ben froisi go na wan pikin foto pe a nowtoe gi Kownoekondre preikiman ben de moro bigi. Baka wan toe moen, grontapoe wroko no ben de so makriki foe feni moro, èn a moni foe den ben kon kaba. Baka dati den ben kisi wan paiman foe 81 Amerkan dala di den ben moesoe pai gi a verzekering foe na oto. „Wi no ben abi no wan fasi foe pai a moni dati”, a brada e froeklari. „Wi ben begi boen tranga a neti dati.” A tra dei, den ben kisi wan karta foe wan osofamiri di ben abi foeroe problema toe na moni sei. Na osofamiri ben kisi moni baka foe belasting, na so den ben froeklari na tapoe a karta, èn foe di a moni ben de moro leki san den ben froewakti, meki den ben wani prati pikinso foe dati nanga a pionier trowpaar. Nanga a karta den ben seni den wan sjèk foe 81 Amerkan dala! „Noiti mi no sa frigiti a dei dati — mi heri skin ben gro!” a pionier brada e taki. „Wi ben warderi a lobi di na osofamiri disi ben lobi foe gi sani, troetroe.” Jehovah toe e warderi so wan boen-atifasi, di de wan krin marki foe a lobi di den foetoeboi foe en lobi foe gi sani, wan sani di Jehovah e gi den deki-ati foe abi. — Odo 19:17; Hebrewsma 13:16.
11 Foeroe pionier kan froeteri den srefi sortoe ondrofenitori toe. Aksi den, èn den sa froeteri joe taki noiti den ben „libi [den] wawan krinkrin”. Wan pionier di abi 72 jari, e prakseri baka foe den 55 jari di a de na ini a foeroeten diniwroko, èn a e taki: „Noiti Jehovah no libi mi.” — Hebrewsma 13:5, 6.
„Wan toemoesi boen fasi foe kon moro krosibei na Jehovah”
12. Foe san ede a wroko foe meki a boen njoensoe bekènti de so wan moi grani?
12 Taki Jehovah e aksi wi srefi foe meki a boen njoensoe foe en Kownoekondre bekènti na wan grani di wi kisi. A e si wi — ala di wi na onvolmaakti libisma — leki en „kompe wrokoman” na ini a wroko disi di e kibri libi (1 Korentesma 3:9; 1 Timoteus 4:16). Te wi e preiki Gado Kownoekondre gi tra sma, te wi e meki bekènti taki wan kaba sa kon na godelowsoefasi, te wi e tjari en bigi lobi foe gi wi wan loesoe-paiman kon na krin gi sma, te wi e opo en Wortoe di e libi èn e leri opregti sma den warti sani di skrifi na ini, dan foe ensrefi dati e tjari wi kon moro krosibei na wi Kriaman, Jehovah. — Psalm 145:11; Johanes 3:16; Hebrewsma 4:12.
13. San wan toe sma e taki foe a krakti di a pionierwroko foe den abi na tapoe a matifasi di den abi nanga Jehovah?
13 Ibri moen, sma di de pionier man teki foeroe ten foe leri sani foe Jehovah èn foe gi sma a leri foe en. Fa den denki taki disi abi krakti na tapoe a matifasi di den abi nanga Gado? „A pionierwroko na wan toemoesi boen fasi foe kon moro krosibei na Jehovah”, na so wan owroeman na Fransikondre e piki di de wan pionier moro leki tin jari kaba. Wan tra pionier na ini a kondre dati, di de 18 jari na ini a foeroeten diniwroko kaba, e taki: „A pionierwroko e gi wi na okasi foe ’tesi èn si taki Jehovah boen’, ala di ibri dei baka wi e meki wan moro tranga matifasi gro na mindri wi nanga wi Kriaman” (Psalm 34:8). Wan sisa na Ingrisikondre di de wan pionier 30 jari kaba, e denki a srefi sani. „Foe di mi moesoe froetrow tapoe a jeje foe Jehovah foe a tiri a diniwroko foe mi, meki dati e tjari mi moro krosibei na en”, a e taki. „Foe troe mi firi taki na foeroe okasi a jeje foe Jehovah ben tjari mi go na wan spesroetoe oso na a joisti ten.” — Teki gersi Tori foe den Apostel 16:6-10.
14. Sortoe wini pionier e kisi foe di den gebroiki bijbel èn den poeblikâsi di abi den gron tapoe bijbel, ibri dei baka foe gi trawan leri?
14 Foeroe pionier e si taki te den e gebroiki bijbel èn den poeblikâsi di abi den gron tapoe bijbel ibri dei baka foe froeklari den waarheid foe bijbel èn foe leri dati na sma, dan dati e jepi den foe kisi moro sabi foe Gado Wortoe. Wan brada na Spanjorokondre di owroe 85 jari, èn di de wan pionier 31 jari kaba, e tjari kon na krin: „A pionierwroko jepi mi foe kon sabi bijbel boen, wan sabi di mi gebroiki foe jepi foeroe sma foe kon sabi Jehovah nanga den sani di a abi na prakseri.” Wan sisa na Ingrisikondre di doe a pionierwroko 23 jari langa, e taki: „A foeroeten diniwroko jepi mi foe kisi wan boen lostoe gi jeje njanjan.” Te joe e tjari kon na krin gi tra sma san na a „reide foe a howpoe di de na ini [joe]”, dan dati kan tranga joe eigi overtoigi ini a tori foe den sani di joe e bribi na ini èn di joe e si leki warti sani (1 Petrus 3:15). Wan pionier foe Australia e taki: „A pionierwroko e meki mi bribi gro te mi e taki nanga tra sma foe san mi e firi.”
15. San foeroe sma ben de klariklari foe doe, so taki den ben kan bigin nanga a pionierwroko èn tan na ini en, èn foe san ede?
15 A de krin, taki den pionier bedinari disi abi na overtoigi taki den froekisi wan diniwroko di e gi den someni blesi foe Jehovah. A no de foe froewondroe dan, taki foeroe sma de klariklari foe tjari kenki kon na ini den libi, èn den ben libi wan grontapoe wroko nanga materia goedoe srefi, foe go na ini a pionierwroko èn tan na ini dati! — Odo 28:20.
Joe e angri foe doe moro?
16, 17. (a) San joe ben sa kan doe, te joe e aksi joesrefi efoe joe ben sa man doe a pionierwroko? (b) Fa wan toe sma e firi te den no man pionier?
16 Baka di wi ben loekoe san pionier e taki foe den blesi foe a pionierwroko, dan kande joe e aksi joesrefi efoe a pionierwroko na wan praktis sani gi joe. Efoe dati de so, dan foe san ede joe no e taki nanga wan pionier di abi boen bakapisi na ini a foeroeten diniwroko? A kan de wan jepi toe te joe e taki nanga wan foe den owroeman na ini a gemeente, wan sma di sabi joe — fa a de nanga joe gosontoe, den sani di joe man doe noso no man doe, nanga joe osofamiri frantiwortoe (Odo 15:22). Den sani di trawan e taki fa sani de troetroe, kan jepi joe foe loekoe finifini efoe a pionierwroko na wan sani di joe man doe. (Teki gersi Lukas 14:28.) Efoe joe man pionier, dan den blesi di joe sa kisi sa bigi troetroe. — Maleaki 3:10.
17 Ma fa a de nanga den foeroe getrow Kownoekondre preikiman di no man pionier, ala di den den e angri kande foe doe moro na ini a diniwroko? Loekoe, foe eksempre, san wan kresten sisa e firi di e doe foeroe moeiti foe kweki den fo pikin foe en ensrefi. „Mi e sari”, na so a e taki, „foe di mi ben de wan gewoon pionier fosi, ma now, foe a situwâsi foe mi ede, meki mi no kan go na ini a velddienst someni leki fa mi ben gwenti.” A sisa disi lobi den pikin foe en troetroe èn a wani sorgoe foe den. Ma a e angri toe foe doe moro na ini a preikiwroko. „Mi lobi a diniwroko”, a e froeklari. Tra loyaal kresten di a lobi gi Gado e meki den wani dini Jehovah ’nanga den heri ati’, abi den firi dati toe. — Psalm 86:12.
18. (a) San Jehovah e froewakti foe wi? (b) Foe san ede wi no moesoe lasi-ati efoe situwâsi no e gi wi na okasi foe doe ala san wi wani doe?
18 Hori na prakseri taki san Jehovah e froewakti foe wi na wan diniwroko di wi e doe nanga wi heri sili. San dati wani taki, kan difrenti foeroe gi ibriwan sma. Son sma man seti den afersi foe den so, taki den kan dini leki gewoon pionier. Foeroe trawan e go na ini a jepi pionierwroko wanwan leisi noso doronomo, foe di den e wroko 60 joeroe na ini a diniwroko ibri moen. Ma a moro bigi pisi foe Jehovah en pipel e gi densrefi fajafaja na ini a wroko foe preiki èn foe gi sma leri nanga den heri sili, leki gemeente preikiman. Dati meki efoe a de troetroe so taki joe no man doe someni foe di joe abi wan swaki gosontoe, joe e kon owroe, joe abi osofamiri frantiwortoe, noso foe tra situwâsi ede, no lasi-ati. So langa joe e gi a moro boen sani di joe abi, a diniwroko foe joe warti na ini Gado ai, neleki a di foe den sma di de na ini a foeroeten diniwroko!
Ala sma kan sori taki den abi a pionierjeje
19. San na a pionierjeje?
19 Ala di joe no man de wan pionier kande, tokoe joe kan sori taki joe abi a pionierjeje. San na a pionierjeje? Wi Kownoekondre Dienst foe augustus 1988 ben taki: „Wi ben kan taki dati a de wan positief yeyefasi gi na gebod fu preiki èn meki disipel, fu gi yusrefi krinkrin fu sori lobi èn brok’ede gi sma, fu offer yusrefi, fu feni prisiri ini a waka soifri na baka na meester, èn fu kisi satisfaksi fu yeye sani èn no fu skin sani.” Fa joe kan sori a pionierjeje?
20. Fa papa nanga mama kan sori taki den abi a pionierjeje?
20 Efoe joe na wan papa noso wan mama di abi jongoe pikin, dan nanga joe heri ati joe kan gi den a rai foe teki wan libiwroko leki pionier. A positief fasi foe joe ini a tori foe a diniwroko, kan sori den krin taki a de fanowdoe foe meki a diniwroko foe Jehovah kon tron a moro prenspari sani na ini den libi. Kande joe ben sa kan kari pionier nanga opziener di rèis èn den wefi foe den foe kon na joe oso, so taki den pikin foe joe kan njan boen foe den eksempre foe den wan di ben prisiri foe a foeroeten diniwroko. (Teki gersi Hebrewsma 13:7.) Srefi na ini oso di prati na relisi sei, a papa noso mama di de ini a bribi, kan jepi den pikin foe den nanga wortoe èn nanga eksempre, foe poti a foeroeten diniwroko leki wan marki na ini a libi. — 2 Timoteus 1:5; 3:15.
21. (a) Fa wi alamala kan horibaka gi den wan di de ini a pionierwroko? (b) San owroeman kan doe foe gi den pionier deki-ati?
21 Na ini a gemeente, wi alamala kan gi jepi nanga wi heri ati na den wan di man pionier. Foe eksempre, joe kan doe spesroetoe moeiti foe wroko nanga wan pionier na ini a diniwroko, spesroetoe na ten te a pionier ben sa wroko en wawan? Joe kan kon si taki oenoe sa man „gi makandra deki-ati” (Romesma 1:11, 12). Efoe joe na wan owroeman, dan joe kan doe moro srefi foe gi den pionier deki-ati. Te a skin foe owroeman e kon makandra, dan den moesoe loekoe doronomo san den pionier abi fanowdoe. Te wan pionier lasi-ati noso a abi foe doe nanga wan toe problema, dan no de toemoesi esi foe gi en rai taki a moesoe tapoe nanga a pionierwroko. Ala di a kan de fanowdoe son leisi foe gi a rai dati, tokoe wi no moesoe frigiti taki a pionierwroko na wan diri grani di a foeroeten bedinari kan si leki wan toemoesi warti sani. Pikinso deki-ati èn wan toe praktis rai noso jepi kan de ala san de fanowdoe. A bijkantoro foe a Genootschap na Spanjorokondre e skrifi: „Te owroeman e gi sma deki-ati foe go pionier, den e horibaka gi den pionier na ini a velddienst, èn den e tjari herder fisiti go na den doronomo, dan den pionier e prisiri moro, den e firi taki sma abi den fanowdoe, èn den wani go doro awansi sortoe problema kan kon.”
22. Sortoe fasti bosroiti wi moesoe abi, na ini a moeilek ten disi foe a libisma historia?
22 Wi e libi na ini wan moeilek ten na ini a libisma historia. Jehovah gi wi wan wroko di e kibri libi (Romesma 10:13, 14). Efoe wi kan teki prati na a wroko disi foeroeten leki pionier efoe no, meki wi sori taki wi abi a pionierjeje. Meki wi hori na prakseri o serjoesoe a ten de èn abi wan jeje foe òfer wisrefi. Meki wi abi a fasti bosroiti foe gi Jehovah san a e aksi foe wi — wan diniwroko di wi e doe nanga wi heri sili. Èn meki wi hori na prakseri taki te wi e gi ala san wi kan gi, awansi a gersi a pikin moni foe a weduwe noso a diri oli foe Maria, wi e doe wi diniwroko nanga wi heri sili, èn Jehovah e warderi a diniwroko di wi e doe nanga wi heri sili!
Joe e memre disi ete?
◻ Foe san ede a foeroeten diniwroko e gi sma a firi foe satisfaksi nanga prisiri?
◻ San foeroe pionier sabi foe a man di Jehovah man sorgoe foe den foetoeboi foe en, foe di den ondrofeni disi?
◻ Sortoe krakti den pionier feni taki a diniwroko foe den abi na tapoe a matifasi di den abi nanga Jehovah?
◻ Fa joe kan sori taki joe abi a pionierjeje?
[Prenki na tapoe bladzijde 23]
Pionier e kisi foeroe prisiri foe a wroko foe meki disipel
[Prenki na tapoe bladzijde 23]
Den pikin foe joe kan kisi foeroe wini te den abi demakandra nanga foeroeten Kownoekondre preikiman
[Prenki na tapoe bladzijde 23]
Owroeman kan gi pionier deki-ati na ini a velddienst