Gi Yehovah Grani Nanga den Bun Sani Di Wi E Du
1 A de wan trowstu trutru efu yu man feni kibripresi te wan takru winti miti yu! Efu a kibripresi waran, efu kefar no de inisei èn efu den sma di e tan drape lobi fu ontfanga sma, dan yu sa breiti fu tan drape. A Kownukondre preikiwroko e tyari sma kon na so wan kibripresi so taki den kan kibri gi a sistema fu Satan. Wi kan yepi trawan fu si o bun a kibripresi disi de, nanga a fasi fa wi e tyari wisrefi ala dei? Iya, bika Yesus ben taki dati sma ben o ’si den bun wroko fu unu èn ben o gi glori na un Tata, di de na hemel’.—Mat. 5:16.
2 Fa wi kan tyari wisrefi na so wan fasi so taki den sani di wi e du o hari trawan kon na Yehovah èn na en organisâsi? Fu di wi o meki den wortu fu Yesus di skrifi na ini Lukas 6:31 nanga 10:27 abi krakti tapu wi libi ibri dei. Disi o gi wi deki-ati fu sori taki wi e broko wi ede nanga tra sma na wan lobi-ati fasi. Na so wan fasi wi sa sori taki wi de tra fasi leki a grontapu disi pe sma no abi firi gi trawan srefisrefi èn pe den no e broko den ede nanga trawan.
3 Wan sisa di ben de na tapu wan boto na se, ben si wan yongu uma di ben siki so kefalek fu a se ede, taki a no ben man sorgu en nyofi pikin. A sisa ben taki dati a o luku a pikin gi en. Di na uma aksi fa a ben kan sori taki a e warderi san a sisa du, dan a sisa ben taki: ’Grantangi, arki Yehovah Kotoigi a tra leisi te den kon na yu.’ Na uma ben du dati, èn now en nanga en masra na Kotoigi. Den bun sani di a sisa du ben meki taki den ben arki a Kownukondre boskopu.
4 Wi Heri Libi De ini a Tori: A fasi fa wi e tyari wisrefi na ini a birti pe wi e tan, na wrokope noso na skoro èn te wi e meki prisiri, o meki taki trawan e kon kisi wan denki fu wi èn fu a bribi fu wi. Fu dati ede wi musu aksi wisrefi: ’Fa tra sma di e luku wi e denki fu mi nanga mi famiri? Den birtisma e feni taki na oso nanga a dyari fu wi krin èn taki wi e sorgu den sani disi bun? Den kompe-wrokoman nanga kompe-studenti e feni taki wi na sma di de biten ala ten? Den si wi leki sma di lobi fu wroko? Tra sma o feni taki wi de bescheiden èn e sori lespeki ini a fasi fa wi e sorgu wisrefi èn ini a fasi fa wi e weri krosi?’ Den bun wroko fu wi e meki taki na anbegi fu Yehovah e kon de wan sani di e hari sma moro.
5 Petrus ben warskow taki sma ben o spotu Kresten (1 Petr. 4:4). Wi musu de seiker taki a fasi fa wi e tyari wisrefi no e meki taki sma no e taki bun fu wi (1 Petr. 2:12). Efu den sani di wi e du ala dei e gi grani na a Gado di wi e anbegi, dan wi o de neleki lampu di sma e hori hei èn di e hari trawan kon na a kibripresi di Yehovah seti.—Mat. 5:14-16.