„Gi kotoigi dorodoro fu a bun nyunsu”
1. San na a bun nyunsu di wi abi fu prati gi sma?
1 Na ini wan grontapu pe nofo tron wi no e yere bun nyunsu, wi abi a grani „fu gi kotoigi dorodoro fu a bun nyunsu di e fruteri wi fa Gado e sori sma no-frudini bun-ati” (Tori. 20:24). Disi wani taki tu dati wi musu fruteri sma taki heri esi „den lasti dei” sa kon na wan kaba, èn na presi fu dati a nyun regtfardiki grontapu fu Yehovah o kon, pe „den fositen sani [sa] pasa gowe” (2 Tim. 3:1-5; Openb. 21:4). Na a ten dati siki no sa de moro (Yes. 33:24). Den lobiwan fu wi di dede sa komoto na ini den grebi èn den sa miti baka nanga den famiriman èn nanga den mati (Yoh. 5:28, 29). Heri grontapu sa kenki kon tron wan moi paradijs (Yes. 65:21-23). Disi na wan tu eksempre nomo fu a bun nyunsu di wi abi fu prati gi sma!
2. Fu san ede a ten fu a Memrefesa na wan tumusi moi okasi gi wi fu gi kotoigi fu a bun nyunsu?
2 Na ini den mun maart, april, nanga mei wi sa kisi moi okasi fu prati a bun nyunsu disi. Na ini den mun disi, na ini furu kondre alen no e fadon furu èn son no e dongo tumusi fruku. Disi e meki taki wi kan tan moro langa na ini a preikiwroko. Boiti dati, na heri grontapu wi sa hori a moro prenspari fesa fu a yari, namku a Memrefesa, èn dati sa de tapu satra 22 maart, baka te son dongo. Now na a ten fu bigin sreka sani fu du moro na ini a preikiwroko.
3. San o yepi wi fu du moro na ini a preikiwroko leki osofamiri?
3 Yepi-pionierwroko: Yu kan seti yu schema fu du a yepi-pionierwroko na ini wán, tu, noso ala dri mun? Kande yu kan gebroiki pikinso ten na yu osofamiri studie fu poti prakseri na a tori disi. Te unu e yepi makandra na wan bun fasi, dan kande wán noso moro memre fu na osofamiri kan du a yepi-pionierwroko (Odo 15:22). Begi fu a tori disi, èn yu sa si fa Yehovah sa blesi a muiti di yu e meki (Odo 16:3 ). Srefi te nowan sma na ini na osofamiri man du a yepi-pionierwroko, toku ala memre fu a famiri kan poti spesrutu marki gi densrefi fu du moro na ini a preikiwroko. Boiti dati den kan wroko makandra nanga den sma di e du a pionierwroko.
4. Fa wi kan seti sani fu du a yepi-pionierwroko aladi wi abi wan grontapuwroko?
4 Efu yu abi wan grontapuwroko, dan kande yu kan meki wan bun schema so taki yu kan du a yepi-pionierwroko. Kande yu kan preiki na ini a pauze. Noso yu kan aksi fu kisi yu eigi kontren krosibei fu yu oso noso yu wrokope, pe yu kan du a preikiwroko wán yuru noso moro langa leki dati bifo yu e bigin nanga wroko, noso baka wroko. Kande yu kan poti moro ten na wan sei, fu di yu e du den sani di no de so prenspari na ini wan tra mun. Disi kan gi yu na okasi fu wroko heri dei na ini a preikiwroko tapu satra nanga sonde. Son sma ben e teki wan tu dei fakansi fu den grontapuwroko fu du a preikiwroko.
5. Fa yu kan yepi sma di grani noso di siki fu du a yepi-pionierwroko?
5 Efu yu grani, efu yu siki, noso efu yu no man du furu, dan kande yu kan du a yepi-pionierwroko fu di yu e preiki pikinso ibri dei. Aksi Yehovah fu gi yu „a krakti di bigi pasa marki” (2 Kor. 4:7). Wán sisa di abi 106 yari ben man du a yepi-pionierwroko. Den Kresten famiriman fu en, nanga tra sma na ini a gemeente ben yepi en, so taki a ben man preiki oso fu oso, a ben tyari gobaka, a ben go na bijbelstudie, èn a ben du a preikiwroko na tra fasi tu. A ben yepi fu bigin bijbelstudie nanga tin sma. A sisa disi taki: „Te mi e prakseri a moi grani di mi kisi fu dini leki yepipionier, dan mi e kisi furu lobi nanga warderi gi Yehovah, en Manpikin, nanga a lobi-ati organisâsi fu En. Nanga mi heri ati mi wani taigi Yehovah tangi!”
6. Fa yonguwan di dopu kaba èn di de na skoro ete kan du a yepi-pionierwroko?
6 Efu yu na wan yonguwan di dopu kaba, èn yu de na skoro ete, dan yusrefi kan du a yepi-pionierwroko. Neleki den sma di e du grontapuwroko, kande yusrefi wani gebroiki satra nanga sonde spesrutu fu du a preikiwroko. Kande son dei yu kan preiki wán yuru noso moro langa leki dati, te yu komoto na skoro. Efu yu abi fakansi, dan kande yu kan teki prati na a preikiwroko na a ten dati. Efu yu wani du a yepipionierwroko, dan yu kan taki nanga yu papa nanga mama fu a tori disi.
7. San den owruman kan du fu gi den preikiman deki-ati fu du moro na ini a preikiwroko na a ten fu a Memrefesa?
7 Gi den preikiman deki-ati: Den owruman kan gi a gemeente furu deki-ati nanga na eksempre fu den (1 Petr. 5:2, 3). Den kan teki a bosroiti fu hori moro preikiwroko konmakandra gi den sma di sa teki prati na a preikiwroko fruku mamanten, baka skoro, noso baka wroko. A dienst-opziener musu sorgu taki preikiman di man teki fesi e hori den preikiwroko konmakandra, taki nofo kontren de fu wroko, èn taki nofo tijdschrift nanga tra publikâsi de na ini a gemeente na ini den mun disi.
8. San wi kan leri fu den sani di ben seti na ini wan gemeente?
8 Na ini wán gemeente, den owruman bigin gi den preikiman wan tu mun na fesi deki-ati fu du a yepi-pionierwroko. Ibri wiki den ben fruteri a gemeente omeni yepipionier ben de kaba. Disi ben gi den preikiman di ben wani du moro na ini a preikiwroko a dyaranti taki furu sma ben de fu wroko nanga den. Den ben seti moro preikiwroko konmakandra di ben hori fruku mamanten èn na mofoneti. A bakapisi ben de taki 53 preikiman du a yepi-pionierwroko na ini april, èn disi ben de pikinmoro afu fu a gemeente!
9. Fu san ede a ten fu a Memrefesa na wan bun ten gi den sma di doro den markitiki fu tron wan preikiman, fu bigin preiki a bun nyunsu?
9 Yepi trawan fu du a preikiwroko: Te nyunwan nanga yonguwan doro a marki fu bigin nanga a preikiwroko, dan preikiman di abi ondrofeni kan aksi den fu wroko makandra nanga den. So wan okasi den kan kisi na a ten fu a Memrefesa, te furu sma na ini a gemeente sa du moro na ini a preikiwroko. Yu abi wan bijbelstudenti di e go na fesi èn di e hori ensrefi na den regtfardiki markitiki fu Yehovah? Yu abi pikin di no de preikiman ete, ma di e go na fesi èn di e tyari densrefi na wan fasi di fiti? Efu den sma disi taki dati den wani tron preikiman di no dopu ete èn yu feni taki den doro den marki dati, dan yu kan taki nanga wan fu den owruman fu a tori disi. A fesiman-opziener sa seti sani so taki tu owruman taki fu a tori disi nanga yu èn nanga yu pikin, noso nanga yu bijbelstudenti.
10. San den owruman kan du fu yepi den sma di no e preiki moro?
10 Den mun di e kon na wan bun ten tu gi sma di no e preiki moro, fu bigin preiki baka nanga a gemeente. Gemeente Bukustudie-opziener nanga tra owruman musu du ala muiti fu go na den sma disi, èn den musu aksi den sma disi na wan lobi-ati fasi fu wroko makandra nanga den na ini a preikiwroko. Efu den no du a preikiwroko fu wan langa pisi ten, dan tu owruman musu taki fosi nanga den fu luku efu den doro den markitiki fu du a preikiwroko ete.—km 11/00 blz. 3.
11. San na a moro moi fasi fa „Gado e sori sma no-frudini bun-ati?”
11 Sreka sani gi a Memrefesa: A lusu-paiman na a moro moi fasi fa „Gado e sori sma no-frudini bun-ati” (Tori. 20:24). Milyunmilyun sma na heri grontapu di de nanga tangi na ati sa kon makandra tapu satra 22 maart, baka te sondongo, fu de na a Memrefesa pe den o memre a dede fu Krestes. Wi wani kari ala opregtisma èn wi wani yepi den fu go na a prenspari okasi disi di e kotoigi fu a no-frudini bun-ati di Yehovah e sori a libisma famiri.
12. Suma wi musu gi wan kari gi a Memrefesa?
12 Skrifi den nen fu den sma di yu wani gi wan kari gi a Memrefesa. A no de fu taki dati yu sa skrifi den nen fu famiriman, birtisma, sma fu wrokope noso skoro, sma di ben studeri Bijbel fosi èn sma di e studeri Bijbel now, èn sosrefi den nen fu ala tra sma di yu e fisiti doronomo. Efu sonwan fu den sma di yu e gi wan kari e poti aksi gi yu di abi fu du nanga a Memrefesa, dan a kan de wan yepi gi yu fu gebroiki a tori di e taki fu na Neti-nyanyan fu Masra na tapu bladzijde 206-208 fu a Bijbel leri-buku. Disi kan gi yu na okasi fu bigin wan bijbelstudie nanga a sma, fu di yu o taki nanga en fu a buku di wi e gebroiki fu hori bijbelstudie.
13. Fa Yehovah blesi a muiti fu tu preikiman di ben bosroiti fu kari sma kon na a Memrefesa?
13 Wan sisa ben skrifi den nen fu 48 osofamiri di a ben wani gi wan kari. Te a ben gi den wan kari kaba, dan a ben skrifi dati èn a ben skrifi a dei di a gi den wan kari. A ben prisiri srefisrefi di 26 fu den sma di a ben kari, kon na a Memrefesa! Wan brada di abi wan wenkri, ben gi wan kari na wan man di ben wroko gi en. A man disi ben de wan priester fosi. A man go na a Memrefesa, èn bakaten a taki: „Na ini wán yuru mi leri moro fu Bijbel, leki san mi leri na ini ala den 30 yari di mi ben de na ini Lomsu Kerki.” Syatu baka a Memrefesa, a man bigin studeri a Bijbel leri-buku.
14. Sortu spesrutu wroko sa bigin na heri grontapu tapu 1 maart?
14 Wan spesrutu wroko: Bigin fu satra 1 maart te go miti 22 maart, na heri grontapu wi sa prati wan spesrutu papira fu gi sma wan kari gi a Memrefesa. Ala preikiman sa du ala san den man fu teki prati na a prenspari wroko disi. A moro bun fu gi na ososma a papira na presi fu libi en na baka te nowan sma de na oso. Ma efu a kontren fu unu bigi, dan den owruman kan bosroiti taki den preikiman kan libi den papira disi na oso pe sma no de. Tapu satra nanga sonde wi sa pristeri den nyun tijdschrift tu.
15. San wi kan taki te wi e gi wan sma wan kari gi a Memrefesa?
15 Fu di wi no abi furu ten fu prati den papira disi, meki a moro bun fu abi wan syatu takimakandra. Taki na wan switi fasi, èn du dati fayafaya. Kande yu kan taki disi: „Wi wani gi yu, yu osofamiri, nanga den mati fu yu wan kari fu kon na wan prenspari konmakandra di sa hori tapu 22 maart. A papira disi na gi yu. Tra sani di abi fu du nanga a dei dati skrifi na tapu a papira disi.” Kande na ososma abi aksi. Noso kande a e teki a papira èn a e taki dati a o kon. Skrifi suma wani sabi moro èn seti sani fu go baka na den sma dati.
16. Sortu ondrofenitori e sori o prenspari a de fu du a spesrutu wroko fu kari sma na ini wi kontren gi a Memrefesa?
16 A yari di pasa, wan srudati ben feni wan fu den kari gi a Memrefesa na a doro fu en. A teki a bosroiti fu go na a Memrefesa, ma a ben musu aksi primisi na a komandanti fu en. Di a sori a komandanti a papira, dan a komandanti ben kon tiri. A ben taki dati en papa nanga mama na Kotoigi èn fosi a ben gwenti fu go na den konmakandra makandra nanga den. A no gi a srudati primisi wawan fu go na a Memrefesa, ma a go makandra nanga a srudati na a Memrefesa.
17. Fa wi e sori taki a no-frudini bun-ati fu Gado no de fu soso?
17 Sori taki yu abi warderi: Now di a Memrefesa fu 2008 e kon moro krosibei, meki wi alamala poti prakseri na a no-frudini bun-ati di Yehovah sori wi. Na apostel Paulus skrifi: „Wi e begi unu tu fu no meki a no-frudini bun-ati fu Gado de fu soso” (2 Kor. 6:1). Fa wi e sori taki a no-frudini bun-ati fu Gado no de fu soso? Paulus skrifi: „Ma na ala fasi wi e buweisi taki wi na dinari fu Gado” (2 Kor. 6:4). Fu dati ede wi e sori taki wi e warderi a presenti fu Yehovah, fu di wi e tyari wisrefi na wan bun fasi èn fu di wi e preiki a bun nyunsu fayafaya. Na a ten fu a Memrefesa di e kon, wi sa abi wan moi okasi fu du moro na ini a preikiwroko, fu di wi e gi kotoigi dorodoro fu a bun nyunsu.
[Faki na tapu bladzijde 3]
Suma na den sma di kan du a yepi-pionierwroko?
◼ Osofamiri
◼ Preikiman di abi wan grontapuwroko
◼ Granisma nanga sikisma
◼ Preikiman di de na skoro
[Faki na tapu bladzijde 4]
Te wi e prati den papira fu kari sma gi a Memrefesa, dan wi musu:
◼ Taki syatu èn taki nanga faya
◼ Skrifi den nen fu sma di wani sabi moro, èn go baka na den
◼ Prati den tijdschrift tapu satra nanga sonde