Yepi bijbelstudenti fu tron preikiman fu a Kownukondre bun nyunsu
1 A wroko di Yesus ben gi den disipel fu en èn di skrifi na ini Mateyus 28:19, 20 na wan bigi wroko trutru. Den disipel fu Krestes ben kisi a komando fu meki disipel di fu den sei, ben o go doro nanga a wroko fu meki tra disipel. Disi ben o de a bigin fu a preiki di a bun nyunsu fu Gado Kownukondre ben o preiki na heri grontapu na ini a ten fu a kaba. Now wi e libi na ini a spesrutu ten dati.—Mat. 24:14.
2 Den bijbelstudenti fu wi kan de wi pikin noso tra sma di wani studeri Bijbel nanga wi. Wi wani yepi den sortu sma disi trutru fu teki a frantwortu fu yepi trawan fu kon tron disipel fu Yesus Krestes.—Luk. 6:40.
3 Sreka den fu gi kotoigi: Gi den bijbelstudenti deki-ati fu fruteri trawan fu den sani di den e leri. Fruteri den ondrofenitori fu a preikiwroko di kan gi den deki-ati. Yonguyongu yu kan tyari yu pikin go na ini a preikiwroko. Yu kan leri den fu taki wan sani, so taki den srefi kan teki prati na a preikiwroko (Ps. 148:12, 13). Den sani di yu e taki èn di yu e du musu sori den taki a diniwroko prenspari gi yu trutru.—1 Tim. 1:12.
4 Yehovah e gebroiki soso den wan di e agri nanga den hei markitiki fu en èn di e gi yesi na den tu. A tru taki nyun preikiman no abi so furu ondrofeni leki preikiman di gi densrefi abra èn dopu wan langa pisi ten kaba. Ma toku, den nyun preikiman disi musu bribi den moro prenspari Bijbel leri èn den musu man fruklari den tu. (Luku Wi orga-buku, blz. 79-83.) Den no musu de wan pisi fu „Babilon a Bigiwan” moro, den no musu bumui nanga politiek afersi, èn den musu go na de Kresten konmakandra doronomo.—Openb. 18:4; Yoh. 17:16; Hebr. 10:24, 25.
5 So esi leki yu e si taki wan bijbelstudenti fu yu doro den markitiki fu tron wan preikiman di no dopu ete, dan yu musu taigi a fesiman-opziener. A sa seti sani taki tu owruman kon taki nanga yu èn nanga yu bijbelstudenti. Den o luku efu a studenti doro den markitiki fu tron wan preikiman di no dopu ete èn di e wroko makandra nanga a gemeente fu preiki a Kownukondre bun nyunsu. A sa de wan grani gi yu fu go doro fu leri a bijbelstudenti moro sani te a e go nanga yu na ini a preikiwroko.