Wan nyun artikel fu bigin Bijbelstudie
1. Sortu nyun artikel o kon na ini A Waktitoren gi a publiki èn nanga sortu marki na artikel disi skrifi?
1 Na ini a mun di e kon, A Waktitoren gi a publiki o abi wan nyun artikel na ini di o yepi wi fu bigin Bijbelstudie nanga sma. Na artikel nen „Teki leri fu Gado Wortu”. Aladi son sma na ini a kontren lobi fu leisi ibriwan fu den artikel disi, toku den artikel skrifi fu hori wan takimakandra nanga na ososma.
2. San na wan tu spesrutu sani fu den artikel disi?
2 Spesrutu sani fu na artikel disi: A nen nanga den ondro-edeprakseri fu na artikel skrifi leki aksi di yu kan poti te yu abi wan takimakandra nanga na ososma. Prenspari Bijbeltekst skrifi na ini na artikel so taki na ososma kan teki leri langalanga fu Gado Wortu. Den paragraaf syatu, so taki yu kan taki fu den nanga na ososma leti na en mofodoro. Ibri artikel e sori go na a Bijbel leri-buku èn disi o meki en makriki gi yu fu hori a studie na ini a buku disi te dati fiti.
3. Te wi e preiki oso fu oso, dan fa wi kan gebroiki na artikel disi fu bigin wan Bijbelstudie leti na sma mofodoro?
3 Fa fu gebroiki en: Te yu e pristeri den tijdschrift, dan yu kan poti wan aksi di abi fu du nanga na artikel èn di e hari a prakseri fu na ososma. Fu eksempre, A Waktitoren fu 1 yanuari e taki o prenspari Bijbel de. Yu kan aksi na ososma: „Yu e si Bijbel leki a Wortu fu Gado, noso yu e si en leki wan bun buku nomo? [Gi a sma na okasi fu piki.] Mi abi wan moi artikel di e taki fu a tori disi.” Poti prakseri na a fosi aksi, leisi a fosi paragraaf, èn suku a Bijbeltekst di kari na ini na artikel. Leisi na aksi ete wan tron èn aksi na ososma fu taki fa a e denki. Te a fiti, dan gebroiki den sani di skrifi so furu leki yu man, èn gebroiki den difrenti aksi pe wan nomru skrifi na fesi fu taki nanga na ososma. Fosi yu gowe, dan poti prakseri na a aksi di e kon, èn seti sani bun so taki yu kan go baka fu taki fu en. Go baka fu taki moro fara fu na artikel ibri wiki teleki yu kan tyari a nyun tijdschrift gi a sma. Wan tra sani di yu kan du, na fu aksi na ososma langalanga efu a wani studeri Bijbel. Efu a wani dati, dan yu kan gebroiki na artikel fu sori en fa wan Bijbelstudie e hori.
4. Fa wi kan gebroiki den artikel disi te wi e tyari gobaka?
4 Yu kan gebroiki a nyun artikel disi tu te yu e go na den sma di e teki tijdschrift doronomo èn te yu e tyari gobaka. Yu kan taki: „A Waktitoren abi wan nyun artikel. Meki mi sori yu fa fu gebroiki en.” Wi e begi taki a nyun artikel disi o yepi moro furu sma fu „kon sabi a waarheid soifri”.—1 Tim. 2:4.