Wan tu sani fu a Bijbel disi

A BUKU disi, Bijbel—Nyun-Grontapuvertaling, abi difrenti moi sani na ini di e yepi sma fu kon sabi den finifini tori fu Bijbel na wan soifri fasi. Den kefalek computer sistema di de now ben de wan bigi yepi fu du disi.

MOI SANI DI DE FU FENI NA INI A NYUN BIJBEL DISI

A FASI FA DEN KAPITEL NANGA VERS SETI: Den nomru fu den kapitel nanga den vers de a srefi leki na ini na Ingrisitongo Nyun-Grontapuvertaling. Na so fasi a moro makriki gi Yehovah Kotoigi te den e gi leri na heri grontapu. A no ala den vers e bigin nanga wan nyun paragraaf. Den vers di taki fu wan pisi tori poti makandra na ini wan paragraaf, so taki sma kan frustan a heri tori moro bun. Boiti dati den puwema na ini Bijbel, soleki den Psalm, skrifi leki fa sma gwenti skrifi puwema. Sonwan fu den puwema abi den letter fu a Hebrew alfabet na tapusei fu den.—Luku Psalm 119.

SANI DI SKRIFI NA TAPUSEI FU DEN BLADZIJDE: Na tapusei fu pikinmoro ala den bladzijde, sani skrifi di e sori yu sortu tori de na tapu a bladzijde dati. Na so yu kan feni den Bijbel tori moro makriki.

AKA: Te yu e si dobru aka [[ ]], dan disi wani taki dati den wortu na mindri den aka skrifi na ini son owruten pisi fu Bijbel, ma na ini trawan a no skrifi.

MORO SANI FU DEN BIJBEL BUKU: Na bladzijde 2321 nanga 2322 yu abi wan pisi di e fruteri tra sani fu den Bijbel Buku, soleki o ten den skrifi, den presi pe den skrifi èn suma na a skrifiman.

WORTU DI DE NA INI A BIJBEL DISI: A Bijbel disi abi wan pisi na bakasei di nen „Wortu di yu kan feni na ini a Bijbel disi”. Drape yu o feni wortu di de fu feni na ini difrenti tekst na ini Bijbel. Nofo tron yu o si wan pikin pisi fu a tekst pe a wortu disi skrifi. A Bijbel disi abi wan pisi na bakasei tu di nen „Wortu di yu kan feni na den marki na ini a Bijbel disi”. Drape yu o feni den wortu di skrifi na den difrenti marki na ondrosei fu den bladzijde.

MORO SANI: Na ini a pisi di nen „Moro sani” yu o feni sani di kan yepi fu fruklari difrenti prenspari leri fu Bijbel moro bun. Na a kaba fu „Moro sani” yu abi pisi di e sori san sma ben e gebroiki fu du bisnis, fu wegi sani èn fu marki sani na ini Bijbel ten. Wan pisi de tu di e sori den difrenti mun na ini Bijbel. Wan tu karta de tu di e sori pe difrenti presi ben de na ini Bijbel ten. Na a bigin fu „Moro sani” den leisiman o si wan bladzijde di e kari ala den tori di yu kan feni na ini a pisi disi èn di e sori pe yu kan feni den tori disi. „Moro sani” musu yepi sma fu man studeri den Santa Buku fu Bijbel moro bun èn fu man sori moro bun taki den sani di skrifi na ini Bijbel tru.—1 Petrus 3:15.

WORTUBUKU: Na bakasei fu a Bijbel disi yu abi wan wortubuku nanga sowan 49 wortu nanga grupu fu wortu. Drape yu kan si san son Bijbel wortu soleki „Granpriester”, „Lusu-paiman”, noso „Mesias” wani taki.

TRA TEKST DI YU KAN LUKU: Den langa faki na seisei fu den bladzijde fu a Bijbel disi abi sowan 125.000 tekst. Ala den tekst disi e sori taki yu kan feni wan tra tekst di e horibaka gi pikinmoro ala Bijbel tori. Te yu teki ten fu luku den tekst disi èn te yu ondrosuku den sani di skrifi na den marki na ondrosei fu den bladzijde, dan dati o yepi yu fu si fa den difrenti tori na ini Bijbel e kruderi nanga makandra. Na so fasi yu o si krin taki ala den 66 buku makandra na wán Bijbel nomo èn taki na Gado meki sma skrifi en trutru.

Na ini den faki na seisei fu den bladzijde yu o si den syatu nen fu den Bijbel buku nanga den vers. Na ini den tekst yu abi letter soleki: a, b, c, d, te go miti z. Den letter disi e sori yu sortu tekst na ini a faki na seisei fu a bladzijde abi fu du nanga a tori na ini a vers di yu e leisi. Sobun, te yu si wan „a” na ini a tekst, dan yu kan luku den tekst di skrifi na ini a faki na a letter „a”. Te a faki no man hori ala den tekst, dan yu o si den tra tekst na ondrosei fu a bladzijde. Efu sonwan fu den tekst na ini a faki na fu wan tra kapitel, dan a kapitel skrifi tu.

Den tekst di kari na ini a faki e taki fu wan srefi sortu tori, a srefi sani di pasa, noso a tori srefi. A kan tu taki den e taki fu wan sma noso wan presi di kari na ini a tori. Na ini a faki yu abi tekst tu di e sori fa Bijbel profeititori kon tru èn tekst di abi den srefi wortu noso den srefi sani di wan sma taki na wan tra presi na ini Bijbel. Den e sori tu fa den sani fu a Wètfrubontu kon tru bakaten, soleki fa skrifi na ini den Kresten Griki Buku fu Bijbel. Ala den sani disi o yepi yu fu kon sabi furu fu Bijbel.

SANI DI SKRIFI NA ONDROSEI FU DEN BLADZIJDE: Na ondrosei fu den bladzijde yu kan leisi tra sani di abi fu du nanga prenspari wortu soleki „Syeol” nanga „Hades”. Disi na fu yepi den leisiman fu frustan fa den wortu disi gebroiki na ini Bijbel. Son tron den pisi disi e sori san na a Hebrew noso Griki wortu, son tron den e sori fa yu kan taki en tra fasi, noso san a wortu wani taki trutru na ini Hebrewtongo noso Grikitongo. Den e yepi yu tu fu frustan son muilek wortu noso pisi fu Bijbel nanga son odo noso tra sani di sma ben gwenti taki na a ten dati. Yu kan leisi tu fu sani di abi fu du nanga den nen fu son sma noso fu son presi. Efu a prenspari fu sabi a Hebrew noso Griki wortu gi son moni, noso gi den sani di sma ben gebroiki fu wegi noso marki sani, dan yu o si dati na ondrosei fu a bladzijde tu. Boiti dati den pisi ondrosei fu den bladzijde e sori go tu na bakasei fu a Bijbel na a pisi di nen „Moro sani” pe yu kan leisi moro fu a pisi tori.

Te yu e si a marki disi * baka wan wortu na ini wan tekst, dan yu sabi taki na ondrosei fu a bladzijde wan sani skrifi fu a tori, a wortu, noso den wortu di yu leisi na a marki. Na ondrosei fu a bladzijde yu o si a tekst èn a srefi marki na ini fatu letter. Efu wan tekst abi moro wortu di abi sani na ondrosei fu a bladzijde, dan yu o si difrenti marki soleki: *^, #^, *^, *^, *^, *.

WORTU DI SKRIFI SYATU: Boiti den nen fu den Bijbel buku yu abi tra wortu sosrefi di skrifi syatu son leisi:

b. - baka

B.K. - Baka Krestes

blz. - bladzijde

dok. - dokumenti

Ede - na edesei fu a kapitel

f. - fosi

F.K. - Fosi Krestes

Jg. - Jaargang

kap. - kapitel

km - kilometer

LXX - Septuaginta Bijbel

N - noordsei

nr. - nomru

NT - Nyun Testamenti

w. - na wan ten fu

KABAPISI

Den furu tekst di e sori go na tra tekst èn den tra moi sani na ini a Nyun-Grontapuvertaling disi fu 2011, e yepi sma fu kon si fa den 66 buku fu Bijbel e kruderi nanga makandra. Den de wán buku di Gado meki sma skrifi, so taki sma kan leri a „soifri tongo”, sobun den tru tori fu Gado (Sefanya 3:9). Efu yu na wan sma di e „lespeki” a Santa Wortu fu Yehovah èn yu e ondrosuku den tori fu Bijbel finifini, dan yu o kon sabi nyun sani di yu no ben e frustan ete (Yesaya 66:2, 5). Wi howpu taki ala leisiman wroko nanga den difrenti moi sani di de fu feni na ini a Bijbel disi, so taki den kan kisi soifri sabi fu den tru tori fu Gado èn so taki den kan frustan moro bun taki ’a wortu fu Gado de na libi èn a abi krakti’ (Hebrewsma 4:12). Fu tru, ala den wan di abi a gwenti fu nyan bun fu a tumusi switi leri di Yehovah e gi na ini en Wortu Bijbel di de na libi, o de koloku trutru.—Mateyus 5:3.