Fa wi musu gebroiki a brochure Suma e du a wani fu Yehovah na ini a ten disi?
A nyun brochure disi meki fu yepi den Bijbelstudie fu kon na a organisâsi fu Gado
1. Kari dri sani fu san ede a brochure A wani fu Yehovah meki.
1 Yu bigin gebroiki a nyun brochure Suma e du a wani fu Yehovah na ini a ten disi? A meki fu (1) yepi Bijbelstudie fu kon sabi suma na Yehovah Kotoigi, (2) yepi den fu kon sabi san na den difrenti sani di wi e du èn (3) yepi den fu si fa na organisâsi fu wi e wroko. A wani fu Yehovah-brochure abi lès di e teki wán bladzijde nomo. Disi o meki en makriki fu luku a lès na ini feifi noso tin miniti nomo na a kaba fu ibri studie.
2. Fa a brochure disi seti èn sortu moi sani a abi?
2 Fa a brochure seti: A brochure prati na ini dri pisi, èn ibriwan fu den e taki fu wan tra tori fu Yehovah en organisâsi soleki fa a skrifi na ini paragraaf wán. A nen fu ibriwan fu den 28 lès skrifi leki wan aksi èn den edeprakseri di skrifi nanga fatu letter e piki na aksi dati. A brochure abi fowtow fu moro leki 50 kondre, èn disi e sori taki a wroko fu wi e du na heri grontapu. Furu fu den lès abi faki di nen „Kon sabi moro”, di yu kan gebroiki fu gi den Bijbelstudie deki-ati meki den du san den leri.
3. Fa wi kan gebroiki a brochure A wani fu Yehovah?
3 Fa yu kan gebroiki en: Yu kan bigin sori a studenti na aksi di de a nen fu a lès. Te yu e leisi a lès nanga en, dan poti prakseri na den edeprakseri di skrifi nanga fatu letter. Na a kaba, luku den lasti aksi di de na ondrosei fu a bladzijde. Yu kan leisi a heri les wantron noso leisi pisipisi èn taki fu en. Gebroiki koni fu si sortuwan fu den tekst yu o leisi. No frigiti fu taki fu den prenki nanga a faki „Kon sabi moro”. Nofo tron a bun fu luku den lès baka makandra. Ma te dati de fanowdu, dan yu kan go wantewante na wan lès di a sma wani taki fu en. Fu eksempre, efu wi o abi wan kring konmakandra noso kongres, dan wi kan luku lès 11 wantewante.
4. Fu san ede yu breiti taki yu abi a nyun brochure disi?
4 Te wi e studeri Bijbel nanga wan sma, wi e yepi en fu kon sabi wi hemel Tata moro bun. Ma a de prenspari taki wi e leri en fu kon sabi na organisâsi fu Yehovah (Odo 6:20). Wi breiti trutru taki wi abi a nyun brochure disi di e meki en makriki gi wi fu du dati!