Fa fu yepi den wan di no wani studeri a Bijbel leri-buku na a bigin
1. Fu san ede a no ala sma wani studeri a Bijbel leri-buku na a bigin?
1 Fosi wan sma tron wan anbegiman fu Yehovah, a musu kon sabi fosi san Bijbel e leri. Ma a no ala sma de fu wan Kresten kerki èn den no e bribi taki Bijbel na a Wortu fu Gado. Trawan no e bribi na ini Gado srefisrefi èn den no abi warderi gi Bijbel. Sortu publikâsi ben yepi den wan di no ben wani studeri a Bijbel leri-buku na a bigin? Den eksempre di wi o kari now na fu preikiman fu sowan 20 difrenti kondre.
2. Efu wan sma e taigi wi taki a no e bribi na ini Gado, dan san wi musu pruberi fu kon sabi èn fu san ede?
2 Den wan di no e bribi na ini Gado: Efu wan sma e taki dati a no e bribi na ini Gado, dan a ben o bun fu aksi en fu san ede. Na fu di a e bribi na ini na evolutie-leri? A de so taki a no e bribi na ini Gado fu di a e si furu kruktudu na grontapu èn fu di kerki e hoigri? A de fu wan kondre pe den e leri sma fu no bribi na ini Gado? Kande a e bribi taki Gado de, ma a no feni taki a prenspari fu bribi na ini En. Furu preikiman e aksi a sma a sani disi: „Na so yu ben denki ala ten?” Den preikiman feni taki na aksi disi e gi a sma deki-ati fu taki fu san ede a e bribi so. Arki a sma èn no koti en mofo. Te wi e frustan fu san ede a sma no e bribi na ini Gado, dan wi o sabi fa fu piki en èn wi o sabi sortu publikâsi wi o gi en.—Odo 18:13.
3. Fa wi kan sori taki wi e lespeki a sma èn den sani di a e bribi?
3 Te yu e piki a sma, dan luku bun taki yu no e meki a sma firi taki a denki fu en no bun. A rai disi e kon fu Amerkankondre: „A de prenspari srefisrefi fu lespeki a fasi fa a sma e denki. Na presi fu sori a sma taki a fowtu, a ben o moro bun fu poti aksi di e meki a sma go denki èn di o meki a teki en eigi bosroiti.” Baka te wan ososma taki fa a e denki, dan wan distrikt-opziener abi a gwenti fu poti na aksi disi fosi gi a sma: „Yu denki taki a sani disi kan tu?”
4. Fa wi kan yepi den sma di abi a Buda bribi?
4 Furu sma di abi a Buda bribi no e bribi taki wan Gado de. Son preikiman na ini Ingrisikondre lobi gebroiki a brochure Lasting Peace and Happiness—How to Find Them (Fa wi kan tan abi freide èn de koloku?) te den e preiki gi den sma disi. Baka te den kaba taki fu den pisi na a bigin, den e taki fu a pisi di nen „Wan Gado de di meki ala sani?” Baka dati den e taki fu a pisi di nen „Wan buku di e yepi ala sma fu kisi blesi.” Bakaten den o man bigin taki fu a Bijbel leri-buku èn taigi na ososma: „Aladi yu no e bribi na ini Gado, toku te yu o studeri Bijbel, yu o kisi wini fu den furu bun rai di de na ini.” Wan pionier na ini Amerkankondre di e dini na ini wan Sneisitongo gemeente e taki: „Furu sma na ini a kontren fu wi lobi leisi. Sobun, nofo tron den e leisi a heri buku fosi wi kon baka na den. Ma kande den no e frustan san a wani taki fu studeri Bijbel. Fu dati ede mi lobi gi a sma a Bun nyunsu-brochure a fosi leisi te mi miti en, fu di a brochure disi skrifi na so wan fasi taki wi kan abi wan bun takimakandra.” Wan kring-opziener di e dini na ini wan Sneisitongo kring na ini Amerkankondre e taki dati a fosi leisi te wi miti na ososma wi kan bigin nanga a Bijbel leri-buku. Ma a ben o moro bun fu bigin nanga kapitel 2 di e taki fu a Bijbel, na presi fu bigin nanga kapitel 1 di e taki fu Gado.
5. Fu san ede wi musu abi pasensi?
5 Wan sma abi furu ten fanowdu fu bigin abi bribi na ini Gado, sobun wi musu abi pasensi. Kande na a bigin te wi e taki nanga wan sma, a no e agri taki wan Mekiman de. Ma a kan taki bakaten a o kon si taki kande wan Mekiman de. Noso a kan taki a e frustan fu san ede tra sma e bribi taki wan Mekiman de.
6. Fu san ede son sma no wani sabi san Bijbel e taki?
6 Den wan di no wani arki noso di no e bribi na ini Bijbel: Nofo tron wan sma di e bribi taki kande wan Gado de, no wani sabi san Bijbel e leri, fu di a no e bribi taki Bijbel na Gado Wortu. Kande a e libi na ini wan kondre pe sma no abi a Kresten bribi èn a feni taki Bijbel na wan buku fu den Kresten. Noso kande a e libi na ini wan kondre pe sma e taki dati den na Kresten, ma den no e go na kerki èn kande a e feni taki a no man feni nowan wini fu Bijbel. Fa wi kan yepi den sortu sma disi fu wani sabi moro fu Bijbel èn fu bigin studeri a Bijbel leri-buku?
7. San na wan bun fasi fu meki sma wani sabi moro fu Bijbel?
7 A bijkantoro na ini Grikikondre skrifi: „A moro bun fasi fu yepi den sma di no wani sabi noti fu Bijbel, na fu opo a Bijbel èn sori den san de na ini. Furu preikiman kon si taki a boskopu di de na ini Bijbel abi krakti tapu na ati fu sma moro leki san wisrefi ben o taigi den (Hebr. 4:12). Te den e si a nen fu Gado na ini Bijbel, dan dati o yepi furu sma fu wani ondrosuku Bijbel.” A bijkantoro na ini India skrifi: „Furu Hindu wani sabi trutru fa fu libi èn san e pasa trutru te wan sma dede. Den lobi a pramisi na ini Bijbel tu taki sma no o si densrefi hei moro trawan.” Te wi e taki fu problema di sma na ini a kontren fu wi abi, dan nofo tron den preikiman e kisi na okasi fu sori na ini Bijbel san Gado Kownukondre o du fu puru den problema disi.
8. San wi kan taigi den sma di no abi wan bun denki fu Bijbel fu di kerki no tyari densrefi na wan bun fasi?
8 Son sma abi wan fowtu denki fu Bijbel, fu di kerki no e tyari densrefi na wan bun fasi. Fu dati ede, meki a sma sabi taki a no kerki abi Bijbel. A bijkantoro fu India skrifi: „Son leisi wi musu yepi a sma fu frustan taki a no ala sani di kerki e taki fu Bijbel, tru.” A bijkantoro e taki tu dati nofo tron Hindu lobi pisi 4 fu a brochure Wat is het doel van het leven? — Hoe kunt u het vinden? A pisi disi e taki fa kerki pruberi fu drai den leri fu Bijbel èn san den du fu meki nowan sma abi wan Bijbel. Wan pionier na ini Brasyonkondre e taigi sma: „Yu no wani sabi san skrifi na ini Bijbel? Furu sma e ondrosuku Bijbel sondro taki den de fruplekti fu go na kerki. Yu o si taki yu o leri furu.”
9. Fu san ede wi no musu gi abra efu na a bigin wan sma no wani sabi san Bijbel e leri?
9 Yehovah e si na ati fu ibri sma (1 Sam. 16:7; Odo 21:2). A e hari den reti-ati sma kon na ini a tru anbegi (Yoh. 6:44). Furu fu den sma disi noiti kisi leri fu Gado èn den no sabi furu fu Bijbel. A diniwroko fu wi e gi den na okasi fu ’kisi frulusu èn fu kon sabi a tru leri finifini’ (1 Tim. 2:4). Fu dati ede, no gi abra efu sonwan fu den no wani arki wantewante san Bijbel e taki! Gebroiki wan fu den publikâsi na ini yu tongo, so taki yu kan yepi den fu wani kon sabi moro. Bakaten yu kan bigin nanga a buku San Bijbel e leri wi trutru? di wi e gebroiki fu studeri nanga sma.
[Faki na tapu bladzijde 4]
Efu na ososma e taki dati a no e bribi na ini Gado, dan pruberi disi:
• Aksi a sma: „Na so yu ben prakseri ala ten?”, fu sabi fu san ede a e prakseri so.
• Efu a de fu a Buda bribi, dan gebroiki bladzijde 9-12 fu a brochure Lasting Peace and Happiness—How to Find Them (Fa wi kan tan abi freide èn de koloku?).
• Efu a e bribi na ini na evolutie-leri, dan den publikâsi disi kan yepi en:
Den artikel na ini na Ontwaakt! „Toeval of ontwerp?”
A DVD De wonderen van de schepping onthullen Gods heerlijkheid
Den brochure Een voldoening schenkend leven — Hoe u dit kunt bereiken, pisi 4; Is het leven geschapen?; nanga Vijf belangrijke vragen over het ontstaan van het leven
• Efu a no e bribi moro na ini Gado fu di furu kruktudu nanga pina de, dan den publikâsi disi kan yepi en:
A buku Is er een Schepper die om u geeft?, kapitel 10
Den brochure Gado e broko en ede troetroe nanga wi?, pisi 6, nanga Wat is het doel van het leven? — Hoe kunt u het vinden?, pisi 6
• Te yu si taki a sma e bigin bribi taki Gado de, dan yu kan bigin nanga a Bijbel leri-buku. A ben o bun fu bigin nanga kapitel 2 noso wan tra kapitel di fiti na ososma.
[Faki na tapu bladzijde 5]
Pruberi a sani disi efu na ososma no e bribi na ini Bijbel:
• Taki fu kapitel 17 nanga 18 fu a buku Leven — Hoe is het ontstaan? Door evolutie of door schepping?
• Gi den Hindu yu kan gebroiki a brochure Waarom dienen wij God te aanbidden in liefde en waarheid?
• Gi den sma fu a Dyu bribi yu kan gebroiki a brochure Zal er ooit een wereld zijn zonder oorlog?, bladzijde 3-11.
• Taigi a sma sortu wini a o kisi te a e du san Bijbel e taki. Disi na wan tu publikâsi di yu kan gebroiki fu sori sma sortu wini den kan kisi fu Bijbel:
Den Ontwaakt! artikel „Hulp voor het gezin”
A DVD De bijbel — Een boek dat kracht uitoefent in uw leven
Den brochure Gado abi bun nyunsu gi wi!, lès 9 nanga 11; Een boek voor alle mensen, bladzijde 22-26; nanga Een voldoening schenkend leven — Hoe u dit kunt bereiken, pisi 2
Gi den sma fu a Buda bribi, gebroiki a brochure The Pathway to Peace and Happiness (Fa wan sma kan kisi freide èn de koloku?), bladzijde 3-7.
Gi Moslimsma, gebroiki a brochure Echt geloof leidt tot een gelukkig leven, pisi 3.
Efu yu e preiki na ini wan kontren pe sma no e bribi na ini Bijbel, dan a ben o moro bun fu no taki dati na ini Bijbel yu puru den sani disi di yu e taki. Ma yu kan du dati te yu go na a sma wan tu leisi kaba.
• Sori a sma fa den Bijbel profeititori kon tru. Disi na wan tu publikâsi di yu kan gebroiki fu du dati:
A DVD De bijbel — Nauwkeurige geschiedenis, betrouwbare profetieën
A brochure Een boek voor alle mensen, bladzijde 27-29
• Te a sma aksi san Bijbel e taki fu wan tori, dan bigin nanga a Bijbel leri-buku.
[Faki na tapu bladzijde 6]
Efu na ososma e taki: „Mi no e bribi na ini Gado”, dan yu kan taki:
• „Mi kan fruteri yu syatu san meki taki mi bigin bribi taki wan Sma de di meki ala sani?” Dan gebroiki wan tu penti na ini a buku Redeneren aan de hand van de Schrift, bladzijde 383-385, noso a brochure Gado e broko en ede troetroe nanga wi, pisi 3, noso seti sani fu tyari wan publikâsi gi a sma di yu ben lobi leisi.
• „Ma efu wan Gado de trutru, dan sortu fasi yu ben o wani taki a abi?” Furu ososma ben taki dati den ben o lobi wan Gado di abi lobi, retidu, sari-ati èn di no lobi a wan sma moro a trawan. Sori en na ini Bijbel taki Gado abi den fasi disi. (Kande yu ben o man gebroiki kapitel 1 fu a Bijbel leri-buku, bigin nanga paragraaf 6.)
Efu na ososma taki: „Mi no e bribi na ini Bijbel”, dan yu kan taki:
• „Furu sma e denki so tu. Son sma e denki taki Bijbel no e kruderi nanga sabidensi, noso taki den wèt na ini Bijbel no e tyari wini gi den. Yu leisi Bijbel kaba? [Gi a sma na okasi fu piki. Baka dati, sori a sma den bigin wortu fu bladzijde 3 na ini a brochure Een boek voor alle mensen, èn gi en a brochure.] Furu sma no wani bribi na ini Bijbel fu di kerki no e du san Bijbel e leri. Wan tra leisi mi wani taki fu wan eksempre tapu bladzijde 4 nanga 5.”
• „Furu sma e denki so tu. Mi kan sori yu wan sani fu Bijbel di mi feni moi? [Leisi Yob 26:7 noso Yesaya 40:22 di e sori wi taki Bijbel e kruderi nanga sabidensi.] Bijbel abi koni rai tu di de wan yepi gi den osofamiri. Tra leisi mi ben sa wani sori yu wan eksempre.”
• „Grantangi taki yu taigi mi a sani dati. Efu a ben de so trutru taki Gado skrifi wan buku gi libisma, dan san yu denki ben o de na ini?” Baka dati, yu kan sori a sma wan sani na ini Bijbel di e horibaka gi a piki fu en.