Gebroiki soso den sani di yu kisi fu hori yu lezing

BIJBEL e teki a Kresten gemeente gersi nanga wan libisma skin. Ibri pisi de fanowdu, ma „a no alamala e du a srefi wroko”. Efu wi wani de leki a libisma skin pe ibri pisi de fanowdu, dan wi musu teki ibri grani di wi kisi leki wan frantwortu di wi musu du bun. Disi wani taki dati wi musu frustan o prenspari ibri lezing de di wi kisi. Wi musu sreka ibri lezing bun tu, na presi fu wi feni taki wan tu tori no de so prenspari, bika wi e denki taki den arkiman sa wani arki tra tori moro leki a wan di wi kisi fu taki nanga den (Rom. 12:4-8). A getrow èn koni srafu grupu musu sorgu gi yeye nyanyan „na a reti ten” (Mat. 24:45). Te wi e du ala san wi man fu hori wan lezing soleki fa wi kisi en, dan wi e sori taki wi e warderi a sani di a getrow èn koni srafu grupu seti. Disi e meki taki a heri gemeente kan drai bun.

San yu kan gebroiki tu. Te yu kisi wan tori fu taki tapu a skoro, dan sorgu dati yu e taki soso fu a tori dati, èn no go taki fu wan tra tori. Furu tron, dan yu sa kisi wan spesrutu sani di yu kan gebroiki fu seti a tori fu yu. Ma efu yu no kisi fu yere sortu spesrutu sani yu kan gebroiki fu sreka yu lezing, dan yusrefi kan suku sani di yu wani gebroiki. Ma toku, te yu e sreka yu lezing, dan sorgu taki ala sani di yu o taki abi fu du soso nanga a tori fu san yu musu taki. Te yu e luku san yu o gebroiki, dan yu sa musu hori yu arkiman na prakseri tu.

Te yu kisi wan spesrutu sani di yu musu gebroiki fu hori yu lezing, dan studeri en bun èn ondrosuku den bijbeltekst di kari drape tu. Baka dati, go sidon prakseri fa yu kan gebroiki en na a moro bun fasi so taki den arkiman kan nyan bun fu en. Teki tu noso kande dri penti fu a buku di yu kisi fu seti yu tori, èn gebroiki den leki den moro prenspari penti fu yu lezing. Du a srefi sani nanga bijbeltekst di yu wani leisi èn di yu wani taki fu den. Teki den bijbeltekst disi fu a sani di yu musu gebroiki fu sreka yu lezing.

Omeni fu den sani di yu kisi, yu musu tyari kon na fesi? Soso den sani di yu kan gebroiki bun. No meki a de so, taki yu no e gi bun leri moro, nomo fu di yu e fruteri wan lo sani di yu leisi. Efu wan tu fu den sani di yu feni, no e fiti na san yu wani doro nanga yu lezing, dan poti yu prakseri nomo na den pisi di sa yepi yu doro a marki dati. Gebroiki soso den pisi di yu arkiman kan leri wan sani fu dati èn di o gi den moro furu winimarki. A marki di yu wani doro nanga a les disi, a no fu si o furu sani yu man tyari kon na fesi, ma fu gebroiki den sani di yu kisi fu hori yu lezing.

A lezing fu yu a no soso wan syatu luku baka fu a pisi tori di yu kisi fu sreka yu lezing. Ma yu musu abi na prakseri fu tyari wan tu spesrutu penti kon na krin, fu taki moro fini fu den, fu gi wan eksempre fu den, èn efu a kan, fu sori den arkiman fa den kan gebroiki den na ini den libi. Gebroiki tra sani di yu abi na prakseri fu taki, fu meki den horibaka gi den moro prenspari penti fu a lezing fu yu, ma no meki den tra sani disi kon na ini a presi fu a pisi tori di yu kisi fu taki.

Te fu kaba, den brada di tron bun leriman kan kisi a kari fu gi leri tapu a Diniwroko Konmakandra. Den e frustan taki a de fanowdu fu gebroiki a pisi tori di den kisi, na presi fu puru dati èn gebroiki wan tra sani. Na so a de tu nanga brada di e hori publikitaki. Den e kisi wan schema, so taki den kan hori densrefi na a schema dati. Den schema disi e gi den takiman na okasi fu densrefi taki wan tu sani tu di no skrifi tapu a schema. Ma toku den schema e sori krinkrin san na den moro prenspari sani fu san a takiman musu taki, san na den sani di e horibaka gi den prenspari sani disi, èn san na den moro prenspari bijbeltekst fu a lezing. A sabi di yu e kon sabi fa fu gi leri nanga yepi fu a pisi tori di yu kisi fu hori yu lezing, na wan prenspari sani fu sreka yu gi tra grani di yu kan kisi leki takiman.

A leri di yu e kisi na ini a les disi, kan yepi yu sosrefi fu hori bun oso-bijbelstudie. Yu sa leri fu hori yusrefi na a tori na ini a buku di yu e studeri nanga yu bijbelstudenti, na presi fu yu go fruteri tra tori di kan de moi fu yere ma di no e yepi a studenti fu frustan a tori moro bun. Na a tra sei, efu yu frustan a les disi heri bun, dan a no sa de so taki yu sa hori yusrefi soso na den sani di de na ini a les di yu e studeri nanga wan studenti, ma yu sa man taki fu tra sani tu di a studenti musu sabi kande.