Disi na san „yu musu taigi den”

1. (a) Na sortu fasi Yesus nanga Yeremia ben de a srefi? (b) Fu san ede wi musu teki na eksempre fu Yeremia te wi e du a diniwroko fu wi?

A MORO prenspari eksempre di wi e teki te wi e preiki a bun nyunsu, na a di fu Yesus Krestes. Ma a moi fu sabi taki, sma fu a fosi yarihondro di ben e si Yesus, ben e denki son leisi taki a ben de a profeiti Yeremia (Mat. 16:13, 14). Neleki fa Gado ben gi Yesus a wroko fu preiki, na so a ben gi Yeremia wan srefi sortu wroko tu. Wan leisi, Gado taigi en: „Yu musu taigi den: ’Disi na san Yehovah . . . taki’” (Yer. 13:12, 13; Yoh. 12:49). Boiti dati, di Yeremia ben e du a diniwroko fu en, a ben e sori den srefi fasi fu Yesus.

2. Sortu yepi sma na ini a ten disi abi fanowdu, neleki fa a ben de nanga den Dyu na ini a ten fu Yeremia?

² Ma son Kotoigi ben kan taki: ’A preikiwroko fu wi no de leki a di fu Yeremia. Gado ben gebroiki en fu taki nanga wan pipel di ben gi densrefi abra na En. Ma furu fu den sma di wi e preiki gi no sabi Yehovah.’ Dati tru. Ma na ini a ten fu Yeremia, furu Dyu ben kon „don” èn den ben drai baka gi a tru Gado. (Leisi Yeremia 5:20-22.) Den ben musu kenki fu man anbegi Yehovah na wan fasi di a feni bun. Na so a de tu taki sma na ini a ten disi, awansi den na Kresten noso awansi den abi wan tra bribi, musu leri fu frede Yehovah èn fu suku a tru anbegi. Meki wi go luku fa wi kan dini a tru Gado èn fa wi kan yepi sma neleki fa Yeremia ben du dati.

’YEHOVAH FASI MI MOFO’

3. Sortu sani Gado du nanga Yeremia di a ben o bigin nanga a wroko fu en? Fa a profeiti ben feni a sani dati?

³ Wi sabi ete taki na a bigin fu a profeitiwroko fu en, Yeremia ben yere den wortu disi: „Yu musu go na ala den sma pe mi o seni yu go èn ala san mi taigi yu, yu musu taki. No frede te yu e si den fesi, bika mi, Yehovah, taki: ’Mi de nanga yu èn mi o frulusu yu’” (Yer. 1:7, 8). Ne Gado du wan sani di Yeremia no ben fruwakti. Yeremia e taki: „Yehovah langa en anu èn a fasi mi mofo. Dan Yehovah taigi mi: ’Luku, mi poti mi wortu na ini yu mofo. Tide mi gi yu a wroko [fu wan profeiti]’” (Yer. 1:9, 10). Sensi di a sani dati pasa, Yeremia ben sabi taki a ben e taki gi na Almakti Gado.a Yeremia ben e tan du a santa diniwroko fu en nanga moro faya, fu di Gado ben e horibaka gi en.​—Yes. 6:5-8.

4. Yu sabi wan tu eksempre fu sma di e preiki fayafaya?

⁴ Na ini a ten disi, Yehovah no e fasi den futuboi fu en neleki fa a ben fasi Yeremia. Ma a yeye fu en, e yepi den fu de fayafaya fu preiki a bun nyunsu. Furu fu den abi a faya disi. Luku na eksempre fu Maruja di e libi na Spanyorokondre. Pasa 40 yari kaba, en anu nanga en futu lan. A muilek gi en fu preiki oso fu oso, èn dati meki a e suku tra fasi fu du a preikiwroko. Wán fasi, na taki a e skrifi brifi. Maruja e taki èn en umapikin e skrifi den sani di a taki. Wan heri mun langa Maruja nanga en umapikin teki den ten fu skrifi moro leki 150 brifi gi sma, èn na ini ibriwan fu den brifi a e poti wan traktaat. Fu di a du a muiti dati, meki a bun nyunsu doro furu sma na ini wan dorpu krosibei fu pe a e tan. Maruja ben taigi en umapikin: „Efu wan fu den brifi doro wan reti-ati sma, dan Yehovah o blesi wi nanga wan Bijbelstudie.” Wan owruman fu a kontren drape skrifi: „Mi e taki Yehovah tangi taki wi abi sisa leki Maruja, di e leri sma fu warderi den moro prenspari sani.”

5. (a) Fu san ede wi kan taki dati Yeremia no lasi a faya di a ben abi gi a preikiwroko, aladi sma no ben wani arki? (b) Fa yu kan tan preiki a bun nyunsu fayafaya?

⁵ Na ini a ten fu Yeremia, furu fu den sma fu Yerusalem ’no ben lobi’ den tru tori fu Gado. San a profeiti du di furu sma no ben wani arki a boskopu fu en? A ben tapu nanga a preikiwroko? Kwetikweti! Yeremia ben taki: „Mi kon furu nanga na atibron fu Yehovah. Mi kon weri fu hori en na inisei” (Yer. 6:10, 11). Fa yu kan tan preiki fayafaya neleki Yeremia? Wan fasi, na fu denki dipi fu a bigi grani di yu abi fu taki gi a tru Gado. Yu sabi taki prenspari sma na ini a grontapu disi gi a tru Gado porinen. Prakseri tu fa kerki fesiman kori den sma na ini a kontren fu yu, neleki fa den priester ben du dati na ini a ten fu Yeremia. (Leisi Yeremia 2:8, 26, 27.) Ma a bun nyunsu fu Gado Kownukondre di yu e preiki, e sori krin taki Gado abi a bun fu libisma na prakseri (Sari 3:31, 32). Iya, te yu e prakseri a tori dati, dan dati kan yepi yu fu tan preiki a bun nyunsu fayafaya èn fu yepi sakafasi sma.

6. Sortu bigi problema ben miti Yeremia?

⁶ Kande yu o agri taki a no makriki ala ten fu tan du a preikiwroko fayafaya. Bigi problema miti Yeremia tu di a ben e du a wroko fu Yehovah, èn falsi profeiti ben e gens en. Yu kan leisi fu wan fu den okasi dati na ini Yeremia kapitel 28. Furu fu den sma no ben e poti prakseri na a boskopu fu en, èn son leisi a ben e firi leki a ben de en wawan (Yer. 6:16, 17; 15:17). Wanwan leisi feanti ben e suku fu kiri en tu.​—Yer. 26:11.

„YU KORI MI YEHOVAH”

7, 8. Fa Gado ’kori’ Yeremia na wan fasi di tyari wini kon gi en?

⁷ Wan pisi ten di sma ben e spotu èn ben e kosi Yeremia ibri dei, dan a fruteri Gado fa a ben e firi. Fu san ede yu kan taki dati Yehovah „kori” a tru profeiti fu en, soleki fa a skrifi na Yeremia 20:7, 8?​—Leisi en.

⁸ Di Yeremia taki dati Gado „kori” en, dan a no ben de so taki Yehovah bedrigi en. Na presi fu dati, a sani di Gado du ben tyari wini kon gi a profeiti. Yeremia ben feni taki a ben e kisi tumusi furu gens èn taki a no ben o man du a wroko di Gado ben gi en. Ma fu di na Almaktiwan horibaka gi en èn a yepi en, meki a ben man du a wroko. Sobun, yu kan taki dati Yehovah ben wini Yeremia fu di a sori taki a ben tranga moro en nanga den libisma denki fu en. Di a man disi fu Gado ben denki taki a du ala san a ben man èn taki a no ben man moro, dan Yehovah gi en krakti fu du san a ben denki taki a no ben o man du. Gado ben tranga moro den swakifasi fu a profeiti. Aladi sma no ben wani arki Yeremia, aladi den no ben lobi en, èn aladi den ben wani du ogri nanga en, toku a ben man go doro nanga a preikiwroko fu en.

9. Fu san ede den wortu na Yeremia 20:11 kan gi yu deki-ati?

⁹ Yehovah ben horibaka gi Yeremia leki „wan tranga fetiman di ala sma e frede” (Yer. 20:11). Gado kan gi yu krakti tu so taki yu kan tan teki prati fayafaya na a tru anbegi èn so taki yu kan horidoro awansi bigi problema e miti yu.

10. San yu o du te yu e kisi gens?

¹⁰ Na apostel Paulus ben poti prakseri na a sani dati. A ben gi Kresten di ben kisi gens a deki-ati disi: „Tyari unsrefi nomo na wan fasi di fiti a bun nyunsu fu Krestes, so taki . . . mi kan yere . . . taki unu e tanapu kánkan, taki unu abi wán denki èn taki unu e feti sei na sei leki wán man gi a bribi di unu kisi di unu yere a bun nyunsu. Na nowan enkri fasi den feanti fu unu musu meki unu kon frede” (Fil. 1:27, 28). Neleki Yeremia nanga den Kresten na ini a fosi yarihondro, yu kan frutrow na tapu na Almaktiwan te yu e du a diniwroko fu yu. Disi na wan sani di yu musu fu du. Efu son sma e spotu yu noso efu den wani du ogri nanga yu, dan hori na prakseri taki Yehovah de na yu sei èn taki a kan gi yu krakti. A ben du dati gi Yeremia èn a du dati gi furu fu wi brada nanga sisa. Sobun, a kan du dati gi yu tu. Begi en fu yepi yu èn abi a frutrow taki a o piki a begi fu yu. Kande yusrefi o feni taki Gado „kori” yu, te yu e si fa a e gi yu krakti fu pasa problema nanga deki-ati èn fu no frede. Iya, kande yu o man du moro leki san yu ben denki.​—Leisi Tori fu den apostel 4:29-31.

11, 12. (a) Sortu kenki yu kan tyari kon fu man preiki gi moro sma? (b) Sortu okasi de fu preiki na ini a kontren fu yu, soleki fa a prenki na tapu bladzijde 51 e sori?

¹¹ Den sani di wi e leisi fu a diniwroko fu Yeremia kan yepi wi na difrenti fasi fu tron moro bun preikiman fu a bun nyunsu. Di Yeremia ben de wan profeiti fu Yehovah moro leki 20 yari, a ben man taki: „Mi tan warskow unu. Mi ben opo fruku fu taki nanga unu, ma unu no ben wani arki” (Yer. 25:3). Iya, a ben e bigin fruku nanga a wroko fu en, a no ben e bigin lati. San wi kan leri fu na eksempre fu en? Na ini furu gemeente, preikiman de di e opo fruku fu taki nanga sma na presi pe sma e teki bus nanga loko. Furu Kotoigi di e libi na boiti presi, e go na gronman nanga tra sma frukufruku mamanten te den sma dati e wroko kaba. Tra fasi de fa yu kan teki leri fu a bun eksempre fu Yeremia? Yu denki taki yu kan opo fruku fu man doro biten na den preikiwroko konmakandra?

¹² Boiti dati, na ini furu birti preikiman abi bun bakapisi te den e preiki oso fu oso te bakadina noso te mofo neti. Son preikiman e preiki te neti srefi. Den e go na presi pe sma e lai oli, na nyanyan-oso, èn na tra bisnis di opo 24 yuru wan dei. Yu kan seti sani so, taki yu kan preiki na ten te sma gwenti de na oso noso na tra presi?

13, 14. (a) San wi kan leri fu Yeremia te wi musu go baka na sma di wani sabi moro? (b) Fu san ede a prenspari fu go baka na sma te wi pramisi den fu du dati?

¹³ Wan leisi, Yehovah taigi Yeremia fu go taki profeititori na den portu fu a tempel, noso na den portu fu Yerusalem (Yer. 7:2; 17:19, 20). Fu di Yeremia ben e meki den boskopu disi bekènti na den portu, meki bigi grupu sma kon yere a boskopu fu Yehovah. Furu sma, soleki prenspari man fu a foto, seriman, nanga bisnisman ben gwenti pasa na den portu disi. Dati meki a kan taki Yeremia taki nanga son sma ibri leisi baka, fu di a ben wani yepi den fu kon frustan san a ben e fruteri den. San a tori disi e leri wi fu a tyari si wi musu tyari gobaka na sma di wani sabi moro?

¹⁴ Yeremia ben sabi taki a wroko di a ben e du leki a profeiti fu Gado ben abi fu du nanga a libi fu sma. Wan leisi di a no ben man go taki nanga sma soleki fa Gado ben taigi en, dan a seni en mati Baruk go. (Leisi Yeremia 36:5-8.) Fa wi kan teki na eksempre fu Yeremia? Te wi taigi wan sma taki wi o kon baka na en, wi e du dati tu? Kande yu meki mofo nanga wan sma taki yu o go baka na en noso taki yu o studeri nanga en, ma yu no man go. Yu e aksi wan tra sma fu go gi yu? Yesus ben taki: „Te unu taki ’iya’, dan meki a tan iya” (Mat. 5:37). A prenspari taki wi e du san wi pramisi fu di wi e taki gi wan Gado di lobi san tru èn di lobi te sani seti bun.​—1 Kor. 14:33, 40.

15, 16. (a) Fa furu sma pruberi fu du moro na ini a preikiwroko, neleki fa Yeremia ben du dati? (b) San yu kan leri fu na ondrofenitori fu Chili, soleki fa a prenki na tapu bladzijde 53 e sori?

¹⁵ Yeremia skrifi wan brifi gi den Dyu na ini Babilon fu gi den deki-ati taki Yehovah ben o ’du san a pramisi’. Iya, Yehovah ben o tyari den go baka na a kondre fu den (Yer. 29:1-4, 10). Na ini a ten disi, wi kan skrifi brifi tu gi sma noso wi kan bèl den fu fruteri den san Yehovah o du heri esi, soleki fa ’a pramisi’. Yu kan du den sani dati fu yepi yu famiri, sma di e tan na farawe presi, noso sma di yu no man miti so makriki?

¹⁶ Te Kownukondre preikiman na ini a ten disi e du a wroko fu den bun neleki fa Yeremia ben du dati, dan nofo tron den abi bun bakapisi. Wan Kotoigi na ini Chili go taki nanga wan uma di ben e komoto na ini wan presi pe sma e teki loko. Na uma ben breiti fu yere a boskopu fu Bijbel èn a ben wani taki a sisa kon na en oso fu taki nanga en. Ma a sisa no ben skrifi pe na uma disi e tan. A sisa ben sabi o prenspari a de fu yepi na uma fu kon sabi moro fu den tru leri fu Bijbel. Dati meki a begi Yehovah bakaten fu yepi en. A tra dei fu en, a go baka na a srefi presi pe a ben miti na uma èn na a srefi yuru. A miti na uma baka. Disi leisi, a skrifi pe na uma e tan èn bakaten a go na en oso fu yepi en fu kon frustan Gado Wortu. Heri esi Gado o pori a grontapu fu Satan. Ma howpu de gi den wan di abi berow èn e bribi a bun nyunsu. (Leisi Sari singi 3:31-33.) Sobun, meki wi hori a sani disi na prakseri èn meki wi wroko a kontren fu wi finifini.

„KANDE DEN O ARKI ÈN DEN O TAPU NANGA DEN OGRI DI DEN E DU”

17. Fa yu kan sori taki yu e broko yu ede nanga den sma na ini a kontren fu yu, neleki fa Yeremia ben du dati?

¹⁷ Yehovah no wani taki sma lasi den libi. Sowan tin yari fosi Yerusalem kisi pori, a ben meki Yeremia taki sortu howpu ben de gi den wan di ben de na ini katibo na Babilon. Wi e leisi: „Mi o luku den baka èn mi o du bun gi den. Mi o meki den drai kon baka na a kondre disi. Mi no o broko den, ma mi o bow den. Mi no o rutu den puru, ma mi o prani den.” Yeremia ben kan taigi den sma disi: „Yu musu abi howpu gi a ten di e kon” (Yer. 24:6; 26:3; 31:17). Yeremia ben e si sma soleki fa Gado e si den. Fu di a ben e broko en ede trutru nanga den sma di a ben e miti na ini a diniwroko fu en, meki a ben e taigi den san Yehovah wani. A ben e taki: „Grantangi, kenki den ogri fasi fu unu èn du bun” (Yer. 35:15). Fa yu kan sori taki yu e broko yu ede trutru nanga den sma na ini a kontren fu yu?

18, 19. (a) Sortu denki wi no musu abi te wi e preiki a bun nyunsu? (b) Sortu denki di Yeremia ben abi wi musu abi tu?

¹⁸ A trutru lobi di Yeremia ben abi gi den sma fu Yerusalem, noiti no kon kowru. Di Yerusalem kisi pori, a ben tan firi sari gi den sma dati. (Leisi Sari singi 2:11.) Na den Dyu srefi ben meki taki rampu miti den. Ma noiti Yeremia taki: ’A kisi unu moi, mi ben bari unu.’ Na presi fu dati, a ben sari srefisrefi fu a sani di ben miti den. Na so a de tu taki wi no musu si a preikiwroko fu wi leki wan plekti nomo. A muiti di wi e du fu preiki, musu sori taki wi lobi a bun Gado fu wi èn taki wi lobi den sma di a meki.

¹⁹ Nowan grani noso posisi na ini a grontapu disi bigi moro a grani di wi abi fu taki fu a tru Gado. Na so Yeremia ben denki tu di a skrifi: „Di mi feni den wortu fu yu, mi nyan den. Dan mi ati bigin prisiri. Iya, mi e prisiri srefisrefi, bika mi e tyari a nen fu yu, Yehovah” (Yer. 15:16). Te wi e preiki a bun nyunsu, dan moro sma kan kon sabi a Gado di gi den libi èn den kan kon lobi en tu. Te wi e du wi diniwroko fayafaya èn te wi e sori lobi gi sma neleki fa Yeremia ben du dati, dan wi o man yepi den fu du dati.